.. اختلفت فيه الاديان و المذاهب في قضيه الملاكيه و الشياطين , .. حتي سبب سقوط الشيطان مختلف حسب كل دين ؟؟ ايه هي طبيعه الملاك ؟؟ و هو اصلا الكلام ده حقيقي و لا خرافه , لا في شيطان و لا غيره ؟؟ طب يعني ايه الاثبات المادي ؟؟ و يعني هو ربنا عاجز عشان يجيب ملايكه تساعده ؟؟ طب يعني الملاك ده اتخلق ازاي و لا امتي ؟؟
سلسله اسئله مش بتخلص .. و كل سؤال يجيب عشره وراه .. و بيكون الحل يا تقرر ان كل ديه خرافات و تريح دماغك .. او اما متفكرش تاني و تعيش بمبدأ هو كده .. او الحل اللي انا بفضله انك تقرر تسأل و تفكر و تعيش علي رجاء ان الهدف مش الوصول للاجابه , قد ما هو الهدف هو السؤال نفسه ..
انا في المقال ده .. اخترت سؤال واحد قررت اسأله .. "هو ليه الشيطان مش راضي يتوب ؟! " و قبل ما ابتدي اعك معاكوا في التفكير .. عاوز اقول ان الدين مش ضد العقل , بس الدين فوق العقل .. بمعني , ان زي من ألف سنه لو كنت انت شوفت النجوم في السما و جيه واحد قالك ان ديه اجسام ضوئيه في الفراغ الفضائي و يا ريت تصدق كلامي .. كنت حتقول ده مجنون او مخبول !! بس لما الانسان ابتدي يبحث و يدور, أكتشف ان ساعتها كان العلم ده فوق العقل و جيه اليوم اللي هو دلؤتي بدل ما كان بيدور في اصل النجوم , ده بقي يدور في حاجات اعمق و أدق في تركيبه الصخور علي النجوم .. و هكذا ..
فالدين بالنسبه لي شأنه , شأن اي مجال بحثي ممكن ادور فيه , كل ما ادور و ابحث فيه بحس ان مداركي بتزيد و طريقه تفكيري المنطقي بتطور .. و علي رأي عمنا الكبير ابن رشد :
" الله لايمكن أن يعطينا عقولا ويعطينا شرائع مخالفة لها ! "
نيجي السؤال ذاته .. ليه عمنا الشيطان مش راضي يتوب ؟!
غلاسه مثلا ؟! معتقدش ان موضوع التوبه ده ممكن يتحمل الغلاسه ! احنا بنتكلم في مصير الشيطان ذاته ؟!
مجبر مثلا ؟! طب مين اجبره ؟! الله اجبره انه يبقي شيطان ؟! طب فين المنطق ؟! كده يبقي الشيطان مغلوب علي امره و الله شريك للشيطان و ده غير عقلاني بالمره !
طب ايه ؟! اهبل مثلا ؟ معتقدش ان الدهاء و الخبث اللي بتوصف بيه الشيطان يتماشي مع وصفه انه اهبل ؟!
الاجابه محتاجه الاول زي مقدمه بسيطه عن سبب سقوط الشيطان .. تختلف الاديان و المذاهب و الاساطير , و مفيش اي حد عارف اليقين الكامل .. بس انا حمشي مع النظريه المسيحيه و هي ديه اللي انا مشيت معاها للاخر حسب قناعاتي الشخصيه .. و حسب النظريه المسيحيه ما بتقول .. الشيطان كان اصله ملاك .. بس انفصل عن الله لغروره و تكبره , و انه تخيل انه ممكن يقارن نفسه بربنا .. و ده دفعه انه يحاول يقلد ربنا بالظبط .. عاوز يبقي اّله باي طريقه ... و عشان يبقي اّله محتاج اتباع يمارس عليهم السلطه الألهيه .. و عشان يعمل أتباع , مفيش غير الاتباع بتوع ربنا .. اللي هما البشر .. بس ميقدرش يغصبهم علي حاجه او يجبرهم انه يبقوا اتباعه بالعافيه , فبيزيف لهم الحقيقه عشان يروحوا له بمزاجهم .. ! الموضوع اشبه باعلان عن منتج مضروب او مغشوش في التلفزيون , هو مش بيجبرك تتصل بيه , بس بيستخدم الاسلوب المناسب عشان تتصل بيه ... نفس الفكره مع الشيطان عايش علي امل انه يوقع اكبر كم من البشر .. من خلال ممارسه الشر اللي هو ضد طبيعه الله ! فيبقي الانسان دلؤتي منفصل عن طبيعه الله بمزاجه و اختياره . و هو ده اللي هو عاوزه بالظبط .. الشيطان مش حيتوب , عشان هو متخيل و حتي وقتنا هذا انه يقدر يتحدي الله , و يكون في مستواه .. و يحصل علي المخلوق اللي هو ربنا نفسه خلقه ؟!
طب ليه ربنا ميتخلصش من الشيطان و يريحنا ؟!؟! سؤال حلو , بس تخيل كده , انت كانسان اول " ادم " قررت بارادتك انك تعمل اول خطيه في الحياه , و تعرف الخير و الشر ! و جيه ربنا قال لا انت قرارك ملوش لازمه بالنسبه لي .. و برضه انت مش حتعرف غير الخير .. اللي ساعتها مش حيكون في خير , عشان الشر اصلا مش حيبقي موجود !! يبقي هنا الله متناقض .! ازاي يديني حريه الاختيار و بعد كده يلغي اختياره , و عشان كده بقي في الاختيارين و الانسان .. يختار اللي يناسبه .. قرار انه يكون مع الله , او قرار الانفصال عن الله , اللي هو في جوهره الحياه تحت سلطه الشيطان .. !
من وجهه نظر الاديان ان الشر دخل العالم , مش نتيجه تجارب اخلاقيه عشؤائيه بين البشر و بعضها , لا ده ليه سبب و سبب واضح .. و هو دخول الخطيه للعالم في اول عصيان لأدم ... و من هنا ظهرت معرفه الخير و الشر .. و ابتدي الصراع علي النفوس و الارواح البشريه بين المعسكرين .. و هو ده من وجهه نظر الاديان الصراع الاخلاقي اللي بنعيشه .. صراغ الفضيله و الخطيه .. صراع الشر و الخير .. !
لغايه دلؤتي كويس ؟! لأ مش كويس !! ايه العك اللي بيتقال ده ؟! انت مصدق نفسك ؟! ايه الفيلم الهندي ده ؟! صراع و بتاع ؟! الموضوع اشبه باساطير و خزعبلات ألف ليله و ليله ؟! يعني هل في عقل يصدق ان الانسان دلؤتي بيمشي علي القمر و بيحاول يخلق انسجه و انت جاي تقولي صراع و شيطان و كلام ملوش اي اساس علمي واحد !!
للعلم مش حقدر اجادلك .. فعلا كل اللي بقوله ده ملوش اي اساس علمي مادس واحد .. انا مش حقدر اوريك الشيطان تحت الميكروسكوب او اخد لك عينه من الملاك .. و عشان كده يجي دور المنطق اللي بتعززه قوه الايمان !
الايمان .. اللي هو في كلمتين : تصديق الغير مرئي ! و هو ده الزيتونه بتاعه كل الاديان , اللي هي بمتنع اي ملحد عن تصديق اي حاجه مترطبه علي الدين .. عشان هو مش بيشغل غير عقله , و متخيل بعقله اللي في كل لحظه بيتطور و فكره اللي في كل ثانيه بيتغير انه قادر علي اتسعاب كل الحقائق ! .. , انا حكلمكوا بصراحه في نقطه الايمان ديه , انا نفسي بفقد الايمان احيانا , ده لو مكنش دايما ! الايمان بالنسبه لي من اصعب العمليات الذهنيه و النفسيه اللي بمر بيها .. تفضل تسأل نفسك ازاي يعني ؟او يعني عشان ايه اصدق من غير ما اشوف بعيني او اسمع بودني ؟! طب مش يمكن اكون عايش في وهم مع ذاتي و عمال اقنع نفسي و خلاص ؟! .. جايز برضه ! و مقولتش جايز و تخيلت اني املك الحقيقه المطلقه ابقي بكدب عليكوا و علي نفسي .. بس انا في حاجه شخصيه جوايا بتدفعني للايمان بالايمان ده !! و عشان كده انا مقدرش اعيب علي اللي ميصدقش كلامي و حتي يقول ايه التفاهه ديه ! عشان فعلا كل الكلام اللي انا قلته ده , لو من غير ايمان , يبقي هو قمه العبث ذاته ..
No comments:
Post a Comment