لوحه Saturn Devouring His Son ( زحل يلتهم ابنه )
للفنان Peter Paul Rubens
حسب الاسطوره , زُحل كان كبير الآلهة عند الرومان و في يوم من الايام جت له رؤيه ان حد من ولاده السته حيقتله عشان يأخد منه العرش , اللي بالمناسبه هو نفسه عمل كده مع ابوه ,,, شعور خوفه علي عرشه خلاه يفكر في التهام ولاده كلهم (يتغدا بيهم قبل ما يتعشوا بيه ! ) و اللوحه هنا بتجسد المشهد ده ... باقي الاسطوره ان مراته اوبس خدت اصغر اولادها جوبتير و حط مكانه حجره عشان ميقدرش زحل يوصله , و خبته عنه , لكن لما كبر جوبتر رجع و قتل ابوه فعلا و خد العرش منه ...
في لوحات كتير اتكلمت عن مشهد التهام زحل ( او كرونوس حسب الاسطوره الاغريقيه ) لحد من ولاده و اللي من اهمها لوحه فرنسوا جويا اللي كنت اتكلمت عنها قبل كده : http://goo.gl/VUrMXQ , بس اللوحه اللي قدامنا ديه مختلفه شويه عن لوحه جويا :
1- هنا زحل اول حاجه ابتدي يلتهمها في ابنه , كانت صدره او قلبه , او بمعني اصح مصدر طاقته .. عكس جويا اللي خلاه يلتهم راسه بطريقه شرسه و حيوانيه ..
2-هنا ملامح زحل مفهاش اي معالم جنون او خلل عقلي , بالعكس في ثبات و سكون باين علي وش زحل .. اما في لوحه جويا , باين علي الاب ملامح الذعر و الصرع !
3 - زحل باين هنا انه في حاله ضعف او تعب , بيتسند علي عكاز , مكنتش واضحه ملامح الضعف ديه في لوحه جويا ... و بالرغم من كل الضعف و العجز ده , زحل لسه متمسك بالحياه و معندوش اي مشاكل يقتل اولاده للحفاظ علي عرشه !
في ناس كتير بتحلل اسطوره زحل ديه , ان زحل بيرمز للماضي او الذكريات القديمه السيئه , اللي لو حست ان الانسان ممكن يتخلي عنها عشان يستبدلها بمستقبل او ذكريات جديده افضل , تبتدي علطول تسيطر علي الانسان ده فتحرمه من راحه البال و تسرق منه طاقته و امله ... زحل برضه ممكن يرمز للاجيال القديمه اللي مش بتحب تشوف اجيال جديده متفوقه و أحسن منها و تبذل اقصي جهودها انها تكسرها و تحبطها او لو وصلت تلتهمها بشهيه الظلم و القهر ! .. زحل ممكن يرمز للحروب اللي بتتغذي علي نشاط الشباب و احلامهم , زحل ممكن يرمز للدول او مماليك الفاسده اللي بتقتل ولادها بدم بارد تحت مسمي المصلحه العليا , زحل ممكن يرمز للشر اللي وجوده قايم علي التهام الخير ,, و من هنا اختلف المحللون علي رموز زحل , بس اتفقوا ان الدافع الوحيد ورا سلوك اي زحل موجود هو الخوف !!
صدق او لا تصدق , من اكتر المشاعر الصادقه اللي بيمر بيها الانسان هي مشاعر الخوف .. الخوف مفهوش ادعاء او نفاق لكن بالعكس وقت الخوف لما بيسطر علي الانسان بيجبره انه يطلع كل اللي جواه بجد , بيظهر الانسان علي حقيقته و اصله ... و عشان كده , الشجاعه و الخوف نختبرهم بالخوف , الحب و الكره بنختبرهم بالخوف , حتي المبادئ سواء صادقه او مزيفه بنختبرها بالخوف ... الخوف هو اللي بيحركنا مهما تخلينا قوتنا او صلابتنا , كام مره مشينا عكس اللي بنحبه عشان الخوف من المستقبل , كام مره مشينا جنب الحيط عشان الخوف من الاسوء , كام مره التهمنا ذاتنا و احلامنا عشان الخوف من المجهول !! و بالمناسبه , الخوف مش هو اللي قتل ابن زحل انما زحل نفسه اللي عمل كده !! كتير اوي بنظلم الخوف و نصوره انه ضددنا او عدونا مع ان الخوف عمره ما كان العدو , انما كانت اول وسيله بيستخدمها العدو ضدننا , حتي لو عدونا ده هو احنا نفسنا ! الخوف مش هو المتهم انما ضعف الانسان و عجزه !! و مع كده عمرنا ما حنقدر نعمل تطعيم او مصل ضد الخوف , عمرنا ما حنقدر نلاقي حل جذري للقضاء علي الخوف , عمرنا ما حنقدر نوصل في يوم من الايام لعالم بلا خوف , الخوف موجود علي الارض و مفيش علاج لكده !!.. بس نقدر نروضه , نقدر نوقفه عند حده , نقدر نستغله لتحفيزنا و توجيهنا للافضل ... استسلمنا للخوف بيخلق منا زحل , اشخاص مقتولين جوا سجن خوفنا ,, و ما اكتر زحل في هذه المدينه !!
“ ..... الخوف لا يمنع من الموت و لكنه يمنع من الحياة ... ”
نجيب محفوظ, أولاد حارتنا
No comments:
Post a Comment