كنت مره راكب اتوبيس , و في الشارع بتاع جامعه عين شمس كانت ساعتها الدنيا زحمه اوي , فقررت اسلي وقتي , اني اراقب تصرفات شباب الجامعه شويه .. و لفت نظري مشهد متكرر بطريقه مفرطه الصراحه , مشهد يستعدي الملاحظه ! , و هو مشهد مكون من شاب ساند علي الحيطه او واقف في الشارع عادي , فجأه تمر قدامه واحده , مهما كان لبسها او شكلها او حتي سنها , المهم انها انثي , اول ما الانثي ديه تعدي لازم صاحبنا ده يلف وشه عشان يبص عليها من ورا .. ! في مشهد غريب و كانه بيطمن علي حاجه فيها او مستني يشوف حاجه معينه , و البصه بكل ضمير و الاهتمام الصراحه !! و اعتقد كتير مننا شاف المشهد كتير و كلنا عارف الشاب ده مستني يشوف ايه ... !؟
المشهد ده متكررش مره و لا مرتين و لا حتي عدد قليل عشان يتقال عليه مشهد نادر من نوعه او مجرد حاله فرديه ,, لا ده يكاد يكون مشهد اساسي لاغلب الولاد لحظه مرور اي بنت قدامهم ! و الاغرب ان البنات بقت تعمل حسبها , اللي اول ما تعدي تسرع خطوتها , و اللي تعدي و علطول تنزل التشيرت اللي هي لبساه شويه عشان تخبي حاجه فيها !!! , و اللي تعدي و هي مستعده نفسيا و يبان علي ملامح وشها الخوف من كلمه تتقال او حاجه تتعمل ! و عادي جدااا اول ما تعدي و تبعد حبتين ترجع تاني لطبيعتها , المهم انها هربت ...
انا عارف ان الموضوع ممكن يسبب حرج لبعض الناس و خصوصا البنات , موضوع ممكن يكون فكره طرحه صعبه شويه , بس للاسف ده واقع مينفعش ندعي انه مش موجود ! و يؤسفني برضه اقول لكوا و بكل احباط و يأس , و بكل شفقه و حزن , و بكل كسوف و خجل ! ان مؤخره الانثي في مجتمعنا الغير الناضج , الغير محترم , الغير اخلاقي شيئ مهم للغايه , ده لو مكنش الحاجه الوحيده المهمه بالنسبه لشريحه مش قليله من انصاف الرجال و الشباب !! تيجي تسأل اي شاب من الشباب دول ايه اللي يشدك في البنت !؟ اللي يقول لك القلب الطيب , اللي يقول لك الشخصيه القويه , اللي يقول لك الاخلاق !! و في الحقيقه السر يكمن في الجسم او بمعني اخص المؤخره !!!؟
بس خلينا نشوف الموضوع من وجهه نظر تانيه ؟؟ يعني ايه المشكله ديه مجرد بصه ؟؟ عادي يعني , الواد معملش حاجه عيب و لا جريمه ... و لا حتي اذي البنت , هي عدت و هو بص , هو روح زي الفل و هي روحت بسلام ,, خلص الموضوع ! مش مثلا اتحرش بيها جسديا او اغتصبها ؟!!! يعني يشكر الراجل سابها في حالها ... غير انه يعني يعمل ايه ؟؟ مش ديه غريزه جواه و هو شاب غلبان ؟؟
نظريا هي اه غريزه جواه , و نظريا برضه هو غلبان , و نظريا كمان مهما نقول و نتكلم مفيش اي حاجه حتتغير , و عشان كده انا فكرت في حبه حلول عشان المشهد ده لما يجي يتكرر تاني , يحصل بطريقه شيك و لطيفه عشان حتي عشان لما الولاد يجوا يبصوا (ده لو لسه عندهم حبه دم يعني ) ميتكسفوش او البنات اللي بيتبص علها متحسش انها مقهوره او ضحيه , بمعني ,,
ليه ميصدرش قانون ينظم العمليه ديه شويه ؟؟؟!! يعني ليه مثلا ميكونش للولد في اليوم خمس بصات بس ؟؟؟ او حتي مثلا البنت اللي يتبص علي مؤخرتها , يتبص مره واحده في اليوم ؟؟ ليه منعملش امكان مخصصه للموضوع ده و تكون تحت اشراف الدوله ؟؟؟!! و يكون كمان في عقوبات ؟؟ يعني مثلا البنت اللي ترفض يتبص عليها , نعملها عمليه بتر لمؤخرتها , و الولد اللي يبص اكتر من خمس بصات , نفقع له عينه .. كده يعني
............... عارفين بجد المشكله في ايه ؟؟ المشكله ان بدايه ادمان المخدرات بيكون بسجاره تبغ ؟؟ و بدايه جريمه القتل بتكون مجرد ميول عنف و عدوانيه ؟؟ و برضه بدايه الاغتصاب بيكون بصه !! اصل ايه اللي يمنع اني ابص ؟؟؟ و بعد شويه ايه اللي يمنع اني أتكلم ؟؟ و بعد كده ايه اللي يمنع اني ألمس ؟!! و في الاخر ايه اللي يمنع اني اغتصب !!؟ و في كل مره حتلاقي المبرر .. و برضه حيكون معاك الحق .. حتكون انت الغلبان و هما اللي يستاهلوا , ..عارف الحرامي لما بيسرق جواهرجي بيقول ايه ؟؟ لو مقألش انه جواهرجي علي قلبه فلوس اد كده , حيقول طب اعمل ايه انا محتاج !!! بالظبط نفس منطق الحيوان لما يجي يغتصب او يتحرش باي بنت , لو مقألش هي لبسه لبس اثارني حيقول طب يعني انا اعمل ما انا مش قادر برضه ؟!!!!
في وجهه نظري اعمل قوانين قد ما تعمل , اعمل حمالات ضد التحرش , لبس البنات خيم .. افصلهم عن المجتمع ... اكبت فوق ما تتخيل !! برضه الوساخه حتفضل موجوده في العقول .. حتفضل تكبر زي البكتريا .. و حتلاقي المبررات اللي تقويها و تحميها , و اللي تخليها فجأه مره واحده تتحول من مجرد بكتريا صغيره ممكن نقتلها بمضاد حيوي بسيط .. لتنين ضخم مفيش حاجه قادره تصمد قدامه .. و اعمل قد ما تعمل عمره ما حيخفتي ... بص علي مؤخره البنت ده , و مؤخره اللي بعدها برضه , و اقول لك متسبش بنت تعدي قدامك غير لما تمسكها من فوق لتحت بنظرتك اللي مليانه شهوه و وساخه , تخيل اللي انت عاوزه و ابدع في الوساخه , و متنساش كل ده يكون في سرك ! افضل كده محبوس في عقلك النجس !! .. بس ثق فيا .. بصتك علي البنت ديه و اللي بعدها و اللي بعدها , كل ده حيتحول لتنين ينهش في كرامه امك , و حريه اختك و شرف خطيبتك ..... اصل العيب عمره ما كان في المؤخره , العيب في عقول مفرقتش كتير عن كونها برضه مؤخره ......
No comments:
Post a Comment