سنه 1948 , طقت في دماغ الدكتور B. F. Skinner يعمل تجربه لدراسه السلوك النفسي علي الحمام ! و اللي ملخصها السريع ان الدكتور سكينر جاب 10 حمامات و حبسهم في قفص كبير و قام بتجوعيهم جامد !! ( خد بالك من تجويعهم ديه ) .. بعد فتره من تجوعيهم , عمل زي فتحه صغيره في القفص عشان ديه اللي حيدخل منها الأكل للحمام , و فتحها لهم عشان ياكلوا اخيرا بعد التجويع , طبعا كلهم هجموا علي الأكل .. بس الرخم علطول بعد فتره قصيره رجع قفلها ! الحمام لسه جعان ... ابتدي سكينر يكرر التجربه ديه كذا مره بنفس الاسلوب ... لغايه ما وصل لملاحظه غريبه , و هي :
ان اول ما الفتحه بتاعه الأكل ديه كانت تتفتح ,, الحمام كان بيعمل حركات غريبه و كلها مختلفه عن بعض !! يعني مثلا في حمامه تلف حوالين نفسها , في حمامه توقف علي راسها , في حمامه تجري لبعيد , في حمامه تفضل واقفه مكانها ؟! استغرب .! بس مع استمراره في التجربه وصل للنتيجه المدهشه اللي اتسمت بيها التجربه بعدين و هي 'SUPERSTITION' IN THE PIGEON , بمعني ( الخرافه عند الحمام ) .... ,,
سكينر اكتشف ان كل حمامه من دول بتعمل الحركات الغريبه بتاعتها ديه لايمان داخلي جواها ان الحركه ديه هي اللي فتحت الفتحه بتاعه الاكل , او ان الحركه ديه هي اللي حطول مده استمرار الفتحه بتاعه الاكل لمده اطول !! و من هنا جيه تعريف الخرافه ... و هي الايمان بحدوث احداث مترابطه بعضها البعض بغير ان تكون تلك الاحداث مبنيه علي اي مسبب منطقي او دليل مادي ..
كل اللي حصل ان مثلا حمامه X , اثناء فتح سكينر للفتحه في اول يوم , كانت الحمامه X ديه رافعه راسها , فاستنجت علطول ان رفع الراس هو اللي بيجيب الاكل , عكس حمامه Y اللي كانت بتجري بعيد و اللي برضه استنتجت ان الجريان بعيد هو اللي بيجيب الأكل , اما مثلا حمامه Z , كانت بتتفرج علي مقدمه برنامج الاعلامي احمد موسي ساعه ما سكينر فتح الفتحه , فخلاص هي استنتجت ان برنامج الاعلامي احمد موسي هو اللي بيجب الأكل ... و كل حمامه عاشت مع نفسها بقي في الخرفات , و المصيبه ان كل حمامه فيهم لو جيت تكلمها او تقنعها لا يمكن تصدقك و لا حتي تسمعك !! ديه حاجه هي مجربها بنفسها !!
التجربه ديه طبعا فيها تفاصيل اكتر و ارقام و علاقات بشكل اعمق من الشرح الساذج اللي شرحته و لو عاوز تقرا عنها اكتر اتفضل :
او تقرا عن سكينر و مجهوداته في مجال علم النفسي الاجتماعي , برضه اتفضل :
.. اخر نقطه بس حابب اوضحها في تجربه الخرافه عند الحمام ديه , ان سكينر مكنش عمره حيقدر يعمل التجربه بنجاح الا لو كان جوع الحمام و وصلهم لمرحله الانعدام الشديده ديه , مرحله ما لا يمكن ان يتحمله حمام ! الخرافات عشان تتنشر لازم بيئه متعطشه للخرافات ديه , الخرافات ساعتها بتكون زي القشايه اللي بتكون سبب النجاه للانسان اللي حاسس اني حيغرق من غيرها .. سكينر كان بيلعب بالحمام و هو زي الباشا بعيد تمام عن الصوره .. مجرد استخدم جوعهم و تعبهم عشان يظهر جهلهم و سذاجتهم .. من بعيد اتفرج علي الحمامه اللي كانت بترقص عشان الاكل ينزل , و الحمامه اللي كانت توقف علي راسها عشان الفتحه تطول كمان 5 ثواني و الحمامه المسكينه اللي تفضل تزعق و تصرخ متخيله ان الفتحه بتسمع
No comments:
Post a Comment