في شريحة كبيرة من الناس مش بتعرف تفرق بين مصطلح الحزن Sadness و مصطلح الإكتئاب Depression , مع ان في أختلاف كبير بين الأتنين ,,
فالحزن ده شعور , و شعور طبيعي جدا انه يحصل مع اي حد , و دايما في سبب للحزن ده ... علي عكس الأكتئاب و اللي مش مجرد شعور أنما مرض ! و مش اي حد حزين يبقي مكتئب , و للأسف الأكتئاب ممكن يحصل من غير اي سبب واضح ,, فمريض الأكتئاب مريض مزمن , فهو مش شخص حزين لو تلاشي سبب الحزن حيرجع عادي , أنما فيه اعراض بتفضل ملازمة المكتئب لفترات طويلة , منها خلل في عملية النوم , انحراف في عملية حفظ الذكريات , و حاجة مهمة جدا أسمها الـ Anhedonia ( إنعدام التلذذ )
الموضوع بيبتدي في نهاية القرن الـ 19 , لما عالم النفس الفرنسي Théodule-Armand Ribot لاحظ ان مرضي الأكتئاب بيعانوا من ظاهرة غريبة مشتركة , و هي عدم قدرتهم علي المتعة , فالحالة مش حزن و مش فرحة , أنما حالة فراغ ! , فالـ Anhedonia يعني أنتا مش قادر تتفاعل باي شكل , لا بالايجاب و لا حتي بالسلب .. فبتفقد أهم حاجة بتميزك ككائن حي و هي التفاعل مع الوسط اللي انتا عايش فيه ,, زي اي جماد موجود بكاينه المادي بس مش عايش !
بس أيه اللي يوصل المكتئب لحالة عدم التلذذ ديه ؟! يعني ايه اللي بيحصل في مخ مريض الأكتئاب عشان يأدي لكدة ؟! .... خلينا نقول ان في مراكز في المخ مسؤولة علي ترجمة شعور اللذة من خلال هرمونات معينة بتتفرز أسمها brain's reward system .. فمثلا أنا شوفت حبيبتي فعلطول المركز ده حيطلع مادة معينة زي الـ dopamine حيقولي أفرح ,, بس في مريض الأكتئاب مش ده اللي بيحصل , و السبب هو ان المراكز ديه بتكون اتضربت او باظت .. فهو شخص وصل بيه حد اليأس ان حتي مسببات السعادة مبقتش تفرق معاه , فحتي لو شاف اي حاجة زمان كانت بتبسطه و لو كانت حبيبته برضة مش حيحس باللذة ..
المدون " أحمد مختار عاشور" كان له جملة بتقول : (( عندما أضحك، أشعر أن شخصاُ بداخلي ینظر إلي بمنتھى القرف ! )) , و اللي من وجهة نظري ديه من أكتر الجمل اللي قدرت تعبر عن الـ Anhedonia ..فمريض الأكتئاب مشكلته مش انه مجرد حزين , لا ده انتا ممكن تلاقيه مبتسم و وشه عادي جدا ..بس جواه فيه كم بشع من الطاقة المظلمة مش سامحة له باي بهجة او فرحة , .. فهو أسير الأكتئاب .. لا قادر يخرج براه , و لا حتي بيقاوم لاي بصيص حياة يدخل ينور العتامه اللي جوا .. فمفيش لذة , مفيش متعة , مفيش تفاعل ! .. فهو تحت سيطرة الفراغ الأسود ..
No comments:
Post a Comment