الاكتراثيه

بالنسبه لنا ,, أي حد ميكونش مؤمن بالأديان يبقي علطول " ملحد " atheist , مع أن عدم الإيمان في الأديان مش مجرد إلحاد بس ,, أنما في مدارس و اتجهات فكريه كتير ,,,

الإلحاد الـ atheism هو إنكار وجود الله , يعني واحد مـتأكد ان مفيش حاجه أسمها ربنا و عايش علي الحقيقه ديه .. أما لو عنده أعتقاد ان في الله بس مفيش أديان ده أسمه ربوبي تبع مدرسه الـ deism .. في كمان اللي مش قادر يوصل ليقين هل في الله و لا مفيش , و ده بيكون تبع مدرسه الـ " لاأدريه " الـ Agnosticism , و ده مش قادر ياخد موقف حازم بخصوص قضيه الله ... طبعا في مدراس و أتجهات فكريه كتير مختلفه بخصوص نظرة كل واحد لفكرة الله , و مينفعش اي حد مش مؤمن بدين يتقال عليه ملحد ... 

من أهم المدارس ديه و اللي يمكن مش معروفه كتير بين الناس , هي الـ " لاإكتراثيه " الـ Apatheism ,, الشخص " اللاأكتراثي " بيكون أنسان غير مهتم اصلا بفكره البحث عن وجود الله او عدمه , هو مش atheist ولا Agnostic و لا تبع مدرسه الـ deism .. هو غير مُكترث للكلام ده كله ... فلسفة الـ Apatheism قايمه علي ان الأنسان بيشغل نفسه في البحث عن الله , و في الأخر عمره ما حيعرف يبرهن او يأكد اي حاجه , طب ليه يضيع من وقته و فكره و مجهوده علي حاجه مستحيله زي ديه ؟؟ , و حتي لو أثبت بطريقه ما ان الله موجود , او حتي مش موجود , مش حيفرق مع اللاإكتراثي في اي حاجه .. هو كده كده عايش حياته و مش فارق معاه اي نتيجه .. 

الـ Apathy (اللاأكتراث ) , بعيدا عن اي اتجاه فكري او ديني , هو في الأساس طريقه هروب سحريه من اي مشكلة .. و خصوصا لو المشكله خلاص استنفذت كل قدرات و أمكانيات الشخص المطلوب منه حلها .. فعشان يوفر علي نفسه الاستمرار الغير مجدي في البحث علي حل , بيختار اللاأكتراث , بيختار انه يبعد نفسه عن القلق و التفكير , بيختار انه يستسلم لضعف أمكانياته و قدراته .. , و عشان كده اللاأكتراث عمره ما كان حل , للأسف لسه المشكله موجوده و لسه مطلوب لها حل .. 

علي قد ما الـ Apatheism أتجاه فكري له فلاسفته و مفكرينه , إلا ان الفيلسوف لما يقرر ان يكون عدم أهتمامه بقضيه فكريه – مهما كانت ايه – هو الحل , أعتقد بكده هو بيخون أمانته الفكريه .. و لما يقرر ان اللاإكتراث هو النتيجه النهائيه لإي بحث يبقي ميستحقش لقب مفكر !! اه فعلا , قضيه إثبات وجود الله من عدمه تكاد تكون من أصعب القضايا الفكريه ,, و بالرغم من كده إلا ان البحث عن ماهيه الله و التأمل في فكره وجوده ليها سحرها و جاذبيتها , و مهما كانت نتيجتك إلا ان متعه الرحله مبيكونش أبدا في الوصول للنهايه , أنما في الرحله نفسها .. 

ممكن أكون مختلف مع الـ atheism , بس علي الأقل مدرسه قررت تاخد موقف واضح من قضيه وجود الله , و مختلف كمان مع الـ Agnosticism , إلا انها مدرسه فكريه قويه لسه مأعلنتش إنصرافها عن القضيه .. فحاول متحرمش عقلك أو فكرك من رحله مهما بانت صعبه او غير واضحه ... مهما بانت بعيده و مخيفه .. مهما بانت مستحيله ! .. انك تستلم او تتراجع ... بحجه اللاإكتراث ...