الإنسان الواطي

" أنا قذرٌ يا ميلينا، قذر بلا حدود، ولهذ أصرخُ كثيراً بشأن الطهارة !! " 

من رسائل فرانز كافكا لمحبوبته ميلينا ... 

الكاتب العبقري كافكا من حوالي ميت سنه وصل لاهم قاعده من قواعد الحياه و هي حتميه قذاره الانسان بل و اعترف بكده ! للاسف في بعض الناس بتغفل الحقيقه المهمه ديه , و هي قد ايه انسان بطبعه منافق لذاته و مبادئه , قد ايه الانسان بطبعه ضعيف قدام غرايزه و شهواته , قد ايه الانسان قذر قد ايه الانسان واطي !! بس كل الحاجات ديه مش مشكله خالص , و مدام الانسان عارف يأمن نفسه و شكله قدام الناس ,, مدام الناس بتشوفه بيصلي , بتشوفه مش بيعاكس , بتشوفه بيرفض يتعامل مع الناس اللي مش مؤدبين , بتشوفه مش بيشتم , بتشوفه ملاك , اصل اهم حاجه الناس تشوفه !! ... عارف انت لو ركزت حتلاقي بدل الموقف ألف موقف يبرهنوا علي كلام كافكا , ده كمان حتلاقي ان في كل موقف منهم , المبرر علي القذاره و الوطيان الانساني كان دايما موجود و كان مقنع بشكل لا يمكن تتخيله !! , المبرر اللي بيحللنا كل حاجه , و يسهلنا كل حاجه , المبرر اللي بنخترعه في الوقت اللي احنا عاوزينه و نخفيه علي غيرنا برضه في الوقت اللي احنا عاوزينه !!

تخيل كده لو مدرب الكراتيه بتاع المحله مكنتش فيدوهاته ديه اتشافت كده , عارف كان ايه اللي حيحصل ؟؟ و لا اي حاجه .. كان حيفضل مدرب الكارتيه الرياضي الشهم اللي كل الاطفال الصغيره نفسها تبقي زيه ! , عارف لو الستات اللي كان بيمارس معاهم الجنس في الخفا دول متعرفوش , كان حيحصل ايه ؟ كانوا حيفضلوا الستات الفاضلات اللي يشتموا في هيفا و سما المصري عشان بيعروا جسمهم قدام الناس , كانوا حيفضلوا سيدات المجتمع الاخلاقي اللي ممكن يشوفوا واحده بنت شابه مع زميلها يفضلوا يتريقوا علي اخلاقها و يفضلوا يقولوا فين اهل البت ديه عشان يربوها ؟! .. قضيتي هنا مش محاسبه اي طرف من الطرفين اللي فاتوا , هما احرار مع بعض و يعملوا اللي عاوزينه , بس قضيتي هنا هو قد ايه الضلمه حلوه و بتستر .. الضلمه اللي بتستر راجل دين الحرامي المهوس جنسيا اللي لسه مخلص وعظه عن التقرب من الله , الضلمه بتستر المدرس الفاضل اللي بيغتصب البنات صغيره عنده في الفصل و يزعق في بنت مش محجبه , الضلمه اللي بتستر الموظف ابو دقن اللي بيرتشي , الضلمه اللي بتستر خادم الكنيسه اللي بيتكلم عن الهدوء و السلام الروحي و هو لو حد كسر عليه بالعرابيه حينزل يطلع ديك امه ,, الضلمه اللي بتسترنا احنا ! بتستر كلامنا في ضهر بعض المستخبي تحت الابتسامه و الضحكه الحلوه , بتستر نقصنا و عيوبنا , بتستر جلهنا و عجزنا , الضلمه اللي بتستر كل انسان واطي .!

اه لو الانسان يقدر و لو لحتي لثواني معدوده , يقدر يخرج بره نفسه , بره حياته , بره نظرته الغير حياديه , بره دايره افكاره و ادراكه , يخرج و يشوف نفسه من بره زي ما بيسمح لنفسه يشوف غيره , حيشوف اد ايه هو مسخ ! , حيشوف اد ايه هو اكتر واحد محتاج لنصايحه , حيشوف ان بدله الفضيله اللي هو لابسها او قشره السمعه الكويسه اللي مستخبي تحتها , كل ده لو اتشال من عليه حيعرف قد ايه هو عريان و مفضوح ! اصل لو يمكن في حاجه واحده وحيده اثبتها التاريخ الانساني علي مدار الزمان , هي ان الطبيعه البشريه فسدت من الجوهر و لا محاله لاصلاحها .. بقينا نعيش علي انصاف القيم و اشباه المبادئ ,,, حتي حواسنا باظت , نشوف الاسود ابيض و الابيض اسود ! .. و اللي يعمل نفسه احسن من الباقي ملوش مكان وسطيهم .. , و يبقي الانسان افضل و اجمل و احسن كائن يتكلم عن المبادئ و هو ميعرفش عنها اي حاجه , يبدع في التنظير عن الاخلاق و الفضائل هو ابعد ما يكون عنها .... و هو كله في الاخر كلام في كلام .. فخلينا احنا كمان نتكلم ...