شادي مُعجب بمروة ,, و مروة برضه مُعجبه بشادي .. شادي بيحاول يعبر عن اعجابه ده , علي عكس مروة اللي بتتعمد تبين لشادي انها مش مهتمه او مش واخده بالها منه ,, أصل مروة بتحاول " تتقل " علي شادي ... !
مصطفي أتصل بيه واحد صاحبه ,, و قاله انها عاوز منه خدمه ,, مصطفي يقدر يعملها له دلؤتي و مش حتاخد منه مجهود او تعب ,, بس مصطفي قرر انه يسيبه شويه ,, أصل مصطفي قرر "يتقل " علي صاحبه ... !
اللي بتعمله مروة و اللي بيعمله مصطفي أسمه الـ Scarcity Principle (مبدأ الندرة ) ..
الأنسان بطبعه بيحب الحاجات النادره , الحاجات اللي صعب يوصل لها , الحاجات اللي ( بتتقل ) عليه ! .. مروة بتتقل علي شادي , عشان عارفه ان ده حيخليه يتعلق بيها اكتر ,, حيبذل مجهود زياده عشان يبقي معاها و يثبت لها حُبه , بكده مروة بتعلي من قيمه حب شادي ليها ,,,, مصطفي بيتقل علي صاحبه , عشان عارف ان ده حيخليه يقدر موقفه ده اكتر , حيخليه يدرك أهميته في حياته , و بكده مصطفي حيخلي صاحبه شاكر جدا لوجوده معاه ....,, بس هو ازاي الـ Scarcity Principle بيتشغل من الأساس ؟؟
أول نظريه بتفسر الـ Scarcity Principle , هي نظريه الـ commitment and consistency ,, بمعني ان الانسان لما بيتعلق بحاجه او بيكون عاوزها , بيبتدي يرسم لنفسه مستقبل و حياه ان خلاص الحاجه ديه معاه ,, و فكره ان الحاجه ديه تضيع من ايده , بتسبب له ألم و تعب ,, فبيبذل اقصي مجهود عشان الحاجه ديه متضعش .. بنشوف الموضوع ده مع الطفل اللي بيشبت في الحاجه ,, و اللي رغبته فيها بتزيد لما يعرف انها مش حتيجي له .. الانسان بطبعه مبيبحش يتقال له لأ !!
النظريه التانيه , هي ان الحاجه اللي بتكون صعب الحصول عليها , بتكون في غالب نادره او مش اي حد يقدر يوصلها ,, ده بيترجم في اللاوعي عند الانسان , ان اكيد الحاجه ديه مميزه و جميله ,, و عشان كده لازم تبقي بتاعتي أنا !! .. بمعني ان الحاجه اللي موجوده بكتره و بسهوله بتفقد جزء كبير من جاذبيتها ,, جاذبيتها اللي بتعتمد علي فضول الانسان في الاساس و رغبته لاسكتشاف كل حاجه ...
الـ Scarcity Principle بيُستخدم في حاجات كتير في حياتنا ,, في الاقتصاد , في السياسه , في فنون الادراه و القياده , حتي في تعاملاتنا بينا و بين بعض ... بنتقل علي بعض .. عشان نعلي من سعرنا و نحسس الاخر اننا نستحق اي مجهود او وقت بيبذله عشان يوصلنا ... نظريا , المبدأ ده فعال و كتير اوي بيحقق الهدف منه ,, بس ساعات برضه بيجي بنتايج عكسيه ... و يوصل الانسان اللي تحت تعويذه الـ Scarcity Principle انه يزهق و يمل ! .. و علي الناحيه التانيه لو انتا نفسك تحت سحر الـ Scarcity Principle , و حاسس انك بكل جنون و عفويه بتتساق لحاجه من غير ارادتك .. حاجه بتستغلك زي اللعبه في ايدها و بتسرق وقتك و فكرك ... اسأل نفسك هي فعلا تستحق كل اللي انا بعمله ده , و لا ده مجرد Scarcity Principle ... ؟!
No comments:
Post a Comment