“ كلهم خنازير يتناطحون في سبيل الحكم، وإنه لمجنون الذى يخسر حياته أو مستقبله فى معركة زائفة ” ....... نجيب محفوظ
في المسلسل الكرتوني المشهور Simpsons , في الموسم الـ 20 الحلقة الـ 7 .. ظهر دوا خيالي مهم جدا أسمه " Ignorital "
حسب المسلسل , Lisa ( بنت Homer الأب ) , كانت بنت حساسة جدا , كان معروف عنها أهتمامها, بقضايا البيئة و الفقرا و كانت بتدعو الناس انهم ينشرو السلام و يبطلوا عنف .. لكن بعد فترات من اللاتغيير , أدركت Lisa أن مفيش فايدة في العالم , و ان الناس حتفضل طول عمرها كدة , في عنف و قهر و فساد ! .. فأصيبت بأحباط و يأس و كان العلاج عشان تخرج من الحالة النفسية السيئة ديه هو الـ Ignorital ( دوا التجاهل ) ... و اللي أول ما خدته Lisa شافت العالم وردي و الناس كلها وشوشها بتضحك .. الحياة كلها كانت زي الفل و مفيش اي مشاكل او كوارث .. فرجعت Lisa تاني من غير يأس و أحباط .. أنما في حالة من السعادة و الأمل .. فساعات لما يكون مفيش حل في تغيير الواقع بيكون الحل تغيير أدراكنا للواقع ! .. فأه في ناس بتموت من الجوع و المرض , في ناس بتتعذب ظلم و ذل , في ناس بتتقتل لمصالح سياسة و دينية ! بس أشطه مفيش في أيدنا حاجة نعملها ! فأحنا أضعف و أحقر و أقل بكتير من أن يكون لينا أي تأثير يذُكر .. أحنا نكرة .. لا ديه يمكن ساعات مش بنوصل للنكرة !
فالشاعر " برتولت بريشت " قال قبل كدة : " .. أنها لجريمه ان نتحدث عن الازهار الجميله حين يكون هناك بشر يقتلون .. ! " ,, بس أيه في حياتنا مش جريمة ؟! , ده كل حاجة حوالينا جريمة , فلو هما بيعملوا جريمة فأحنا بنعمل ألف جريمة ! .. فسكوتنا جريمة و غضبنا جريمة , معرفتنا جريمة و جهلنا برضة جريمة !! , حتي حضورنا و وجودنا في قلب الحدث جريمة .. و غيابنا و تجاهلنا هو قمة الجريمة !! ... فالكائن البشري هو الجريمة ..
بس الممتع في الأنسان أنه غير الكرتون .. مش مستني Ignorital عشان يتجاهل أو ينسي .. هو بس يومين و كأن مفيش أي حاجة حصلت .. أي حاجة تاخد حقها في الـ Trend و بعد كدة نشوف غيرها ... و عمر الأحداث ما حتخلص و لا عمر الأنسان ما حيلاقي حل ... فزي ما قال عمنا "صمويل بيكيت " : أنت على الأرض ، لا يوجد علاج لذلك ! ...
No comments:
Post a Comment