"بأسم الله , ما شاء الله .. الواد ابنك ده زي القمر .. هاتي لما أعضه ! "
" الله جميل اوي الكلب بتاعك .. شكله يتاكل أكل !! "
" القطه بتاعتك ديه مش ممكن !! عسل , عاوزه أقرقشها ! "
.. كتير اوي لما بنشوف كائنات رقيقه أو جميله سواء حيوانات صغيره او حتي أطفال لسه مولوده , ببنحس جوانا برغبه غريبه في ألتهمهم أو كأننا عاوزين نأكلهم أو نقرقشهم ! و فعلا ساعات بنلاقي الجاره أو القريبه اللي مسكت عيل صغير و نزلت فيه قرص و عض ! أو حتي ممكن تحضنه لدرجه انك تحس انها بتخنقه و بتسد نفسه !! .. و كل ده فعلا بيكون بدافع الحب !!
الـ cute aggression .. ظاهره اكتشفوها علماء النفس حديثا عشان يفسروا التضارب الغريب في المشاعر , لما الانسان بيشوف حاجه برئيه او جميله و يحس تجاها بشيئ من العدائيه .. لكن للأسف مفيش فهم كامل للظاهره ديه , أنما نظريات كتير حواليها , أهمها ان العدائيه ديه هدفها توقيف الانسان عند حد معين من الرقه و الانجذاب ! بمثابه تحذير او انذار ! ان خلاص كفايه مشاعر عاطفيه أكتر من كده ! و ده بيحصل نتجيه صراع نفسي جوا الانسان لما بيشوف الحاجه الجميله اوي ديه , صراع بين الدلع و العدائيه ! .... و الهدف منه الوصول للاتزان النفسي .. و بالمناسبه ده السبب ان ليه بنبكي لما نكون فرحانين ! الهدف التوازن !
بمعني , ان لما البنت بتشوف القطه الجميله او الطفل الصغير و تحس تجاهم بمشاعر مفرطه من الحب و الانجذاب , بيبتدي العقل يصدر زي مشاعر سلبيه مضاده لمشاعر البنت الأصليه.. مش عشان هو عقل رخم مش عاوز البنت تبقي سعيده ! لأ , عشان هو عاوز البنت تبقي متزنه نفسيا ! مش حينفع تفضل تدلع الكلب او القطه ديه لما لا نهايه ! او تفضل مربوطه جنب الـ baby الكيوت ده عشان سكره و مقطقط ! ...
نفس اللي بيحصل في الـ cute aggression , بيحصل برضه مع مشاعر العكسيه زي الحزن الزياده ... بمعني ان الانسان لما بيكون في سنيما و بيشوف مشهد حزين او صعب , بيبتدي عقله يبعت له اشارات تخيله يتماسك أو يحس بحاله فرحه رغم سوء الموقف اللي هو فيه !! لدرجه انه ساعات ممكن توصل انه يضحك ! و الناس تفتكرته أهبل او مش واعي للحدث !! ... بس ده برضه عقله بيقوله كفايه مشاعر سلبيه ..
... فالفكره ببساطه من الـ cute aggression ان لا في مصلحتك او في مصلحة عقلك ان اي حاله نفسيه تسيطر عليك .. بمعني ان عقلك بيحميك من الزياده و التطويل في اي مشاعر حتي و لو سعيده او حلوه !! .. لأن الافراط النفسي لاي مشاعر بيضر صاحبه مش بيفيد ..
No comments:
Post a Comment