لوحه Blessures d'Amour ( جراح الحب )
للفنان William Adolphe Bouguereau
للاسف المعلومات عن اللوحه ديه قليله جدا و ملهاش قصه معينه او حتي تفاصيل محدده عشان يتبني عليها اي تحليل .. بس من تأملك في اللوحه تحس ان في حاجه غريبه او سر عجيب بيشدك انك تفضل باصص عليها كتير .. و تبتدي تسأل نفسك عن سلوك الشخصيات اللي في الصوره .. الصوره عباره عن واحده اتضربت بسهم الحب بتحاول تطلع السهم ده , و في ملاكين حب جنبها , واحد مركز معاها و التاني مش فارقه معاه , غالبا هو اللي ضربها و طلع يجري ...
في اغلب لوحات الحب و العشق , لما حد يتضرب بسهم الحب في قلبه بيقع علطول تحت تأثيره و تتحول حالته لفرح و سعاده و رقص و يبقي كأنه واقع تحت تأثير مخدر ما , عمره ما يفكر يشيل السهم او حتي يجرب يطلعه !! بس هنا الوضع غريب .. لو تركز في مكان ضرب السهم في اللوحه ديه , تلاقي انه علي الناحيه الشمال , بس تحت القلب علطول ؟! للاسف السهم اخطأ هدفه ! الواضح ان ملاك الحب اللي ضربه كان مش لابس النضاره او حاجه , لما السهم اتضرب غلط او في غير مكانه الصحيح , مقدرش يعمل اي تأثير من تأثيراته , ده بالعكس سبب مضايقه للبنت ديه و قررت تشيله بكل بساطه , و كل ده عشان السهم جيه غلط ! .. الفكره و هي بتشيله مفيش اي ملامح هلع او وجع او حتي ملامح انيهار مثلا , لا عادي جدا سهم حب جيه غلط , بنت متماسكه و قويه , بتشيله و بتكمل حياتها عادي , اصلها لو ضعفت او قبلت بوجود السهم الغلط ده , يبقي بتضيع علي نفسها سهم حب حقيقي لسه وقته مجاش ,,
في حاجه برضه غريبه , ملاك الحب التنك اللي اقف جنبها ده عليه واقفه رخمه بشكل و حاطط ايده في وسطه و سايب البنت تشيل السهم لوحدها بس بالرغم انه رخم و مش بيساعد او بيعمل حاجه , بس من نظراته ممكن تستشف انه مهتم باللي بيحصل , متشوق عشان يعرف اخره السهم الغلط ده , هل البنت حتنجح في انها تشيله كله و تنضف الجرح اللي اتسبب فيه و لا حتفشل و يفضل الجرح ده موجود .. حتي ملاك الحب اللي ورا بالرغم من انه بيطير بعيد عن الحدث , بس وشه مع البنت ... البنت هنا محور اللوحه , يمكن وقعت ضحيه لسهم حب غلط , بس هي لوحدها اللي مسؤوله انها تنقذ نفسها .. هي لوحدها اللي لو مشلتهوش صح حتتألم , كل ملاك حب فيهم حيكمل طريقه و يعيشوا حياتهم , و مش بعيد يفضلوا يضربوا اسهم تانيه و برضه يا يصيبوا يا يخيبوا , اما هي لو استنت ان حد منهم يساعدها تبقي عبيطه و كانت من الاساس متستحقش غير سهم غلط !
اللوحه فيها حاجات ممكن انت تشوفها و تعجبك , حاجات ممكن تخليك تفكر و تسأل نفسك اشمعنا طلعت بالمنظر ده او ايه قصد الفنان هنا ,,, و كل ما كترت معاني اللوحه , كل ما بقت لوحه غنيه , عود عينك تشوف الالوان و تحاول تفسر معانيها , تشوف الشخصيات و تفسر ردود افعالهم , تهتم بادق التفاصيل , و تعيش حاله الفنان .. عود عينك تستطعم اللوحه !
, الفنان وليم ادلوف , فنان رومانسي عبقري , له لوحات تانيه جميله و ممتعه , دور عليها و اقرا عنها , و لو عاوز تقرا عنه شويه و تشوف حبه اعمال ليه تانيه اتفضل :
No comments:
Post a Comment