شادي شاب مصري قرا عن الـ No Pants Day و ده يوم في بلاد برا , بيبقي أول جمعة في شهر 5 , بيتفق فيه سكان البلد ينزلوا فيه الشارع من غير بنطلون !! فعجبته الفكره و فكر في دماغه , طب ليه معملش كده في مصر ؟! أنا حر أنزل باللي أنا عاوز أنزل بيه , مادام مش بأذي حد او بجبر حد انه يعمل حاجة هو مش عاوزها , فده تبع نطاق حريتي ! ... أنا بكرا حنزل من غير بنطلون , حنزل بالـ underwear ! محدش ليه حاجة عندي ..... بس هل شادي صح ؟! هل من حق شادي يعمل كده ؟!
الكاتب الأمريكي William Randolph كان له جملة في غاية العبقرية بتتكلم عن الحرية فبتقول The greatest right in the world is the right to be wrong ( أعظم حق في العالم , هو حق أن تكون علي خطأ ) !! ... مين عاقل يعتقد ان النزول بالـ underwear ده شيئ طبيعي ؟! مين عاقل ممكن يتخيل ان الـ No Pants Day له اي هدف او فايده ؟! مين عاقل مش شايف ان شادي تفكيره غلط في غلط !! .. بس بالرغم من كل شادي مازال له الحق أنه يعمل الغلط ! فأنتا شاطر و محترم متعملش الغلط بس مش من حقك تجبر الناس علي الصح !! , و هي ديه فايده الحرية , مش أنك تقدر تعمل الصح اللي الكل متوافق عليه , أنما انك تقدر تعمل الغلط اللي مش كتير موافق عليه في ظل قانون يحمي حقك ده !!
ثانية واحدة !! أعمل الغلط !! طب شادي ينزل يقتل و يغتصب و يعمل اي غلط بقي هو عاوزه , مادام هي ديه بقي الحرية !! .. لا ديه مش حرية ديه جريمة !! ,, فمن أهم بنود الحرية هي انها ممتعادش علي حرية الناس التانية , فعدم اللامؤخذة شادي لما يقتل ده حياخد حياة شخص , لما يغتصب حيأذي واحدة , بس لما يقلع حيأذي مين ؟!! ... لأ حيأذيني , لما انا اكون ماشي في الشارع و أشوف واحد ماشي بالـ underwear حتأذي .. فشادي لازم ميستخدمش حريته عيان ميجيش علي حريتي !!
في رجالة كتير , بيدعوا ان حاجة زي شعر البنت بيثير غرايزهم او حتي و لو مغطيه شعرها , فلبسها بيثرهم و بيأذيهم .. و بيكون الحل عشان الرجالة ديه ميتمش أثارتها او أذيتها , إن البنات ديه تغطي شعرها او تلبس لبس معين يتوافق مع غريزة الرجاله ديه !! طب مش ديه نفس فكرة underwear شادي !!! ؟
من المشاكل اللي بتواجها الحرية , هي انها لازم تنبع من مجموع العادات و التقاليد اللي موجودة في المجتمع اللي فيها الحرية ديه , بمعني .. ان مفيش ابدا ابدا حد منطقي و عقلاني يقول ان البنت لازم تلبس لبس معين عشان ميتمش الاعتداء عليها او أذتيها ! , بس في نفس الوقت مينفعش اجي في بعض الدول اللي بتلتزم فرض زي معين علي الستات و أدعو ان الست تتحرر و تنزل باللي هي عوزاه ! مش عشان ده مش من حقها , إنما عشان خايف عليها حد جاهل متعصب يروح راميها بماية نار وسط تسيب من القائمين علي تنفيذ العدل !! و اللي حيخلي الخوف ده ذكاء مش مجرد جبن , هو تغيير المجتمع .. بالتنوير و التوعيه , بالقوانين الحقيقة و القائمين علي تنفذيها .. فمثلا , انتي من حقك تلبسي فستان و تعملي كل اللي انتي عوزاه , بس لازم يتم تأهيل المجتمع لكده .. و هو ده واجب اي انسان مؤمن بالحرية , مش أنه بس يدعو للممارسة الحرية , انما يضمن تنفيذها !
فالهدف عمره ما كان ان شادي ينزل بالـ underwear او حتي نبقي زي بتوع برا الكفره الوحشين بتوع الـ No Pants day ! أنما الهدف مجتمع فاهم أبسط معاني الحرية و قادر يتعايش بيها ! مجتمع مش بيقهر الحريات تحت اي مسمي سواء ديني او وطني .. مجتمع عادل بمبادئه ... لأن ببساطة , مجتمع غير مؤهل للحرية هو مقبرة لإي إبداع , إي تقدم , إي إنسان .. !
No comments:
Post a Comment