نجوي و هناء , نازلين كلام عن صاحبتهم شيرين .. (( هي كانت لابسه ايه أمبارح , و ليه ضحكت كده للواد شريف , و ازاي أهلها سابوها تخرج لوحدها .. و هكذا )) ,, ببساطه نجوي و هناء كانوا بينموا عن شيرين .. و لأن الموضوع كان شيق , فضلوا يتكلموا عن صاحبتهم اللي مش موجوده ديه , بتاع نص ساعه ! لدرجه انهم محسوش بالوقت !! و لما اتخنقوا اخيرا , قرروا يجيبوا سيره واحده صاحبتهم تانيه اسمها نرمين !
النميمه , بساطه هي الكلام اللي ملوش اي ستين لازمه , بين مجموعه من اشخاص ملهومش اي ستين لازمه , عندهم متسع من الوقت الفاضي الكتير في حياتهم اللي ملهاش اي ستين لازمه ! و بالرغم من ضحاله فعل النميمه , إلا انه جميل بغباء ! في سحر و جاذبيه و انتا قاعد بتنتف في ريش شخص مش موجود , متعه مش طبيعيه و انتا قاعد تحلل و تفسر ,, تتسأل و تجاوب ,,, تنصح و تنهي ,, و مش بعيد تزود و تسرح بخيالك شويه ,,, المهم متبطلش كلام .. متبطلش نًم !! .. بس ايه السر ورا النميمه ديه ؟! .. حسب مقاله بعنوان " The Psychology Of Gossip: Why Talking Sh*t Makes You Happy " في موقع Elite Daily و اللي مقتبسة أجزاء كتير من موقع Psychology Today , أتذكر أهم 5 أسباب عشان ليه الناس بتنم :
1- بالنميمه بنكون أصحاب : تخيل نجوي عاوزه تكون صداقه قويه مع هناء , أكيد حتكون عاوزه توري لها انها بتثق فيها اوي ! و عشان تثبت لها كده , حتقولها علي أسرار ! بس نجوي مش هبله عشان تقولها علي اسرارها الشخصيه , لأ هي حختار اسرار واحده موضع اهتمام لنجوي و في نفس الوقت صديق مشترك بينهم و تقولها علي اسرارها .. و بكده نجوي حتثبت لهناء قد ايه هي واثقه فيها , انها بتشاركها حاجه عظيمه جدا زي النميمه !!
2- النميمه بتقربنا لبعض : لما نجوي بتكون عاوزه تقرب اوي من هناء , أكيد مش حتقولها اي كلام ممل عن شيرين (صديقتهم تعيسه الحظ اللي اختاروا سيرتها عشان تكون موضوع النميمه بتاع الليله ديه ) , لا ديه حتقولها علي حاجات تضحك و مهازل و مواقف مسخره , المهم في موضوع النميمه ان الاتنين اللي بينموا مع بعض يهزروا و يتبسطوا , مش مشكله اي حاجه تانيه , و لو وصلت لصاحب الموضوع الأصلي , يولع
3- النميمه بتخلينا في القطيع : كله بينم , يعني هي جت علي نجوي و هناء .. ما سعاد و كوثر بينموا , صابر و شكري بينموا , ده مش بعيد شيرين نفسها (نفس صديقتهم تعيسه الحظ اللي بيتنم عليها ) تكون هي بتنم عن شخص ما في حته تانيه .. في بعض المجتمعات التافهه اللي مورهاش شغله و لا مشغله , النميمه حاجه منقدرش نستغني عنها زي المايه و الهوا و اللب الصوبر ..
4- الـ Social Capital : النميمه بتعمل تأثير نفسي عبقري في اي اتنين بينموا , و هي انها بتحسسهم انهم ملوك الموقف ! انهم جامدين بطريقه مش ممكنه , انهم عندهم اسرار و معلومات عن الناس اللي بيتكلموا عليهم ,.. لك ان تتخيل ,, ده بكلمه واحده , ممكن يشوهوا صوره اي حد او يعلوا صوره اي حد !!
5- النميمه بتخلي كل البشر ناس طبيعيه : لو نجوي كانت متضايقه جدا من شيرين و متغاظه انها أحسن منها , ببساطه النميمه بتكون زي انتقام داخلي منها , عشان تحطها في الصوره اللي نجوي شايفه ان شيرين تستحقها .. و ده سبب رئيسي ان برامج التوك شو اللي بتجيب حياه الفنانين او المشاهير الشخصيه و تكلم عن تفاصيلها باسلوب رخيص , بتحقق اعلي ايرادات , الناس بتجري ورا النميمه حتي و لو في التليفزيون !
دول أهم 5 أسباب بتدفع الناس انها تنم , و اللي ملخصهم , أن النميمه شيئ ممتع جدا , و حل سحري لسد فجوات النقص اللي عند اي شخص , فياريت الناس متهاجمهاش او ترفضها لمجرد الرفض .. عشان حقيقي النميمه عندنا أسلوب حياه .. فأستمتعوا
No comments:
Post a Comment