كان زي اي نايب أمراض كلي , كل طموحه في الحياه انه يعدي فترة نايبته علي خير .. و يطلع منها و هو محافظ علي أهم 3 حاجات عند اي نايب جامعه ,, الصحه , العقل , الموبيل ,, و لكن في يوم من الايام .. كان قاعد في القسم لوحده , بيدور علي بيتادين .. فضل يدور و يدور, لغايه ما لمح ازازه بيتادين موجوده فوق دولاب الادويه .. و هو بيصارع عشان يجيبها , اتزحلق في نقطه دم كانت وقعه من عينه مريض و اتخبط في الدولاب ,, وقعت ازازه البتادين , اتكسرت علي راسه !!! و نزل كل البيتادين علي وش صاحبنا .. اللي فاق بعد 12 يوم من الغيوبه , بس فاق بقوه خارقه .. تحت مسمي "بيتادين مان " !!
محمد علي ( بيبو ) , او زي ما بيتقال عليه بين التمريض و دكاتره المستشفي , "بيتادين مان " .. كان بيمارس موهبته المميزه و قوته الخارقه من غير ما حد يحس او يعرف هويته الحقيقيه , و هي انه كان بيقدر يطلع كميات غير محدوده من البيتادين من إيده , كان كل يوم الصبح يلف علي عنابر المستشفي و يملي كل ازايز البتادين الفاضيه , كل الناس كانت بتدعي لبيتادين مان و هي مش عارفه هو مين او حتي اسمه الحقيقي ايه ! كان سبب سعاده و فرحه لكل مريض كان بيكون في اشد الحاجه لبيتادين و مش لاقي .. بيبو كان طول الوقت حاسس انه الصوبر هيرو الوحيد اللي في الدمرداش , و كان حاسس بمسؤوليه كبيره تجاه المستشفي , لغايه ما جيه يوم المنشود ! .. ساعتها كان عدد كبير من المرضي بيدخل المستشفي لسبب مجهول ! و "بيتادين مان " كان متضايق انه مش قادر يساعدهم او حتي يقلل من اوجاعهم .. قوة البتادين مكنش قادره تسعفه .. دخل اوضه النواب و قفل الباب علي نفسه و فضل يسمع أغنيه (الغربه ) للفنان اسماعيل البليسي و يعيط , لغايه ما مره واحده الباب خبط ... و نورهان نايبه الكلي فتحت الباب ..
نورهان : ايه يا بيبو , مالك ؟؟
بيبو : مفيش يا نورهان , بس متضايق شويه
نورهان : عندك في القسم حالات arrest ؟؟
بيبو : لا , الحمد لله
نورهان : أتعملك شكوي عند المدير ؟؟
بيبو : لأ , الحمد لله
نورهان : أتعملك محضر في القسم ؟؟
بيبو : لأ برضه
نورهان : اومال متضايق ليه ؟!!
بيبو (بغضب ) : تبعان يا نورهان !! حاسس اني عايش بحمل تقيل ! عايش بوش غير وشي الحقيقي !!
نورهان : كل ده عشان .. بيتادين مان !
بيبو (بدهشه ) : انتي بتقولي ايه؟ !! لأ ..لأ طبعا !! أأأنــا ..أنا مش بيتادين مان
نورهان : أهدي يا بيبو ,,, هو انتا فاكر انتا الصوبر هيرو الوحيد اللي في دمرداش ؟ اللي بتكلمك يا بيبو مش نورهان نايبه الكلي بس , أنا "كانويلا وومان " يا بيبو
بيبو (مصدوم ) : كانويلا وومان الأسطوره !!
نورهان : لعلمك يا بيبو , أحنا مش قليلين , بس محتاجين نلاقي بعض !
- فجأه تشتغل موسيقي فيلم روكي (eyes of the tiger ) , و يظهر نور قوي جدا ..يخرج من خلاله باقي الصوبر هيروز ..
نورهان : قبل اي حاجه أحب أعرفك علي باقي الصوبر هيروز , ندي أو "جولوكوز وومان " و قوتها الخارقه بطلع جلوكوز من ايدها , بدر أو "قطن مان " و قوته الخارقه بيطلع قطن من أيده .. و جوجو
بيبو (باستغراب ) : ايوه ؟؟ ايه قوته ؟؟
نورهان : لا جوجو ملوش قوه خارقه بس بيجي معانا كده .. المهم دؤلتي , احنا فعلا لازم نركز عشان الدمرداش بتتعرض لهجوم , و هجوم شرس .. و جيه الوقت اللي لازم نوقف ايد واحده و نحل المشكله ديه
بدر : لو تركزوا يا جماعه , تلاقوا في حاجه مشتركه في كل العيانين اللي داخلين انهارده , كلهم متركب لهم القسطره غلط !
بيبو : و ده معناه إيه !!
ندي (برعب ) : مفيش غيره !! هو قسطره مان !!
جوجو (بخوف ) : طب ازاي !!! احنا قضينا علي قسطره مان من زمان ! لا يمكن يكون لسه عايش
بيبو : يا أخوانا فهومني ؟ مين قسطره مان ده رخر ؟!
نورهان : ده كان زمان معانا في الصوبر هيروز , و كان بيخاف علي سلامه المرضي فعلا و بيحاول يساعدهم , و في يوم من الأيام أتحول من حد بيحب المرضي و نفسه يخدمهم , لحد عاوز ينتقم منهم و عاوز يأذيهم !! احنا عرفنا الموضوع ده و قررنا نوقفه عند حده , بس هو كان مصمم علي خطته الشرير , و كانت النهايه اننا قضينا عليه بقوتنا الخارقه ! , بس الواضح انه لسه عايش .. و بيمارس الاعيبه مع المرضي !
بيبو( بيأس ) : و انتي متخيله ابطال عظماء زيكوا مقدورش عليه , انا حقدر عليه لوحدي .. أجي انا فين وسط قطن مان و لا جولوكوز وومان و لا كاننويلا وومان ! انا و لاحاجه . و لا حاجه ..
نورهان (بجديه ) : أنتا مش لوحدك يا "بيتادين مان " انتا وسط أهلك و اخواتك ..فكر كده , اشمعنا انتا من دون باقي نواب المستشفي اللي تتميز بموهبه قويه جدا زي ديه ؟! تفتكر ليه قسطره مان قرر يهاجمك انتا مخصوص في يوم استقبالك ؟! تفتكر ليه انتا بقيت "بيتادين مان " !!!
فجأه تشتغل أغنيه "لا حتاخد ايه و لا كام و ليه " من فيلم مافيا .. و كله يقرب من بيبو و كلهم بصوت واحد : نهايتك حتبقي علي ايدنا يا قسطره مان !!
No comments:
Post a Comment