في البيت
هو : صباح الخير يا احلي ام في الوجود ..
امه : صباح الخير يا حبيبي
هو : معلش يا حبيبتي ، مشوفتيش قميصي الازرق ؟
امه : لا يا حبيبي ، شفت الاحمر بس ، اهو متعلق هناك ..
هو : اه شكرا , شوفته ... بس ده القميص الازرق يا امي !
امه : سلامه عينك يا حبيبي لا ده الاحمر ...
في الشغل
صديقه : ايه يا ابني اللي اخرك ؟!
هو : مفيش يا سيدي ، فضلت بتاع ربع ساعه اتخانق انا و امي علي لون القميص هي تقول لي احمر و انا اقولها ازرق !! و في الاخر نزلت و سبتها ,
صديقه : طب ما هو فعلا لونه احمر !!
هو : احمر !!!! حتي انت كمان !! يا ابني ده قميص ازرق .. انتو في اي في عيونكوا يا جدعان ؟!
صديقه : لا انت اللي في حاجه في عنيك او باين عليك اتجننت !! ده احمر !! حتي اسأل اي حد ..
هو (يضحك) : انتوا شكلكوا عاوزين تعملوا فيا مقلب , صح ؟! طب علي العموم مقلب باين و مكشوف اوي ... و مش يوم ما تعملوا فيا مقلب يبقي في لون القميص ههههه ؟!
في الشارع
سيده عجوز : ممكن يا ابني تعديني الشارع ..
هو : طبعا يا امي
السيده العجوز : ربنا يخليك يا ابني
هو : معلش ممكن سؤال يا امي , هو لون القميص اللي انا لبسه ايه ؟!
السيده العجوز : لونه احمر يا ابني ...
هو : احمر ؟!!!! انتي متأكده يا حاجه ... ؟
السيده العجوز : ايوه يا ابني احمر .. هو فيه حاجه ؟!
هو : لا خلاص يا امي .. شكرا
عند دكتور الرمد
الدكتور : انت زي الفل يا استاذ ، مين قالك ان في مشاكل في عنيك ؟!
هو : ربنا يخليك يا دكتور ، اصلي كنت شاكك لا يكون جالي عمي الالوان و لا حاجه زي كده
هو : لا خالص , انت معندكش عمي الوان .. ده انت حتي نظرك احسن مني ..
هو : هههه ربنا يطمنك يا دكتور و شكرا .. طب استأذن انا
الدكتور : مع السلامه , بس معلش ممكن سؤال ؟
هو : اوي اوي اتفضل يا دكتور
الدكتور : هو القميص اللي انت لابسه ده جايبه منين ؟؟ اصل الصراحه اول مره اشوف درجه الاحمر ديه في قميص كده ..
هو : احمر ايه يا دكتور ؟! ده ازرق !! هو مش حضرتك لسه قايلي اني معنديش عمي الوان !!
الدكتور : لا يا استاذ القميص احمر !! يا سماح !!
سماح (مساعده الدكتور ) : اؤمرني يا دكتور ؟؟
الدكتور : هو قميص الاستاذ ده لونه ايه ؟!
سماح : احمر يا دكتور ... هو فيه حاجه ؟!
هو (بعصبيه) : احمر ايه يا مجانين ؟!! انتوا عاوزين تجنوني !! القميص ازرق , ارزق , ازرق !!
يخرج من عند الدكتور كالمجنون ، يجري في الشارع و يصرخ "ازرق !! القميص ازرق !! " , يمر علي المحلات ليقول لاصحابها ان "القميص ازرق" , يستوقف السيارات ليقول لسائقيها ان"القميص ازرق" .. يصرخ في وجه الماره بان القميص ازرق ! و لكن اخيرا يتملكه التعب ..فيجلس علي احد الارصفه , يلتقط انفاسه بصعوبه , ينظر للسماء طالبا الرحمه و ينظر للارض طالبا الفناء ! يبكي بدموع اليأس , بدموع الخوف , مشقف علي ذاته الوحيده ! و لكن فجأه يسمع صوت خطوات اقدام تقترب منه ... يرفع عينه ليجد رجل كبير السن يتقدم نحوه ..
الرجل : ايوه ازرق يا ابني ..
هو : حضرتك قلت ازرق , صح ؟!؟!
الرجل : ايوه يا ابني , القميص ازرق ..
هو : يعني انت شايفه زي ما انا شايف , يعني ده مش احمر ! يعني انا مش مجنون ؟؟ و لا عندي عمي الوان !!
الرجل : لا يا ابني انت سليم ..
هو (بفرحه شديده كمن عاد مره اخري للحياه ): طب ممكن لو سمحت تيجي معايا تقولهم اللي انت شايفه ! تقولهم ان انا صح , تقولهم انه ازرق !
الرجل : اهدي يا ابني , انا و انت بس اللي شايفنه ازرق , بس هما لأ !
هو : يعني ايه ؟! نكدب عنينا عشان خاطرهم ؟ نلغي عقولنا عشان يصدقونا !
الرجل : لو معملناش كده .. حنفضل لوحدنا يا ابني , منبوذين , مطرودين , مستحقرين ؟! فكر كده , مين حيتعامل مع مجنون بيصارع عشان يثبت حاجه ملهاش وجود اصلا ؟! مين حيصدق واحد مش عارف الفرق بين الاحمر ازرق ؟!! مين حيقف مع الغلط ضد الصح ... ؟
هو : بس احنا الصح !!! انت مش لسه قايل لي كده من شويه ..؟
الرجل : الصح بتاعي انا و انت , المهم الصح بتاعهم هما !! هما اللي بيعملوا القوانين , هما اللي يعملوا القواعد , هما بيعملوا الحقيقه ! , شغلك هما , حبك هما , مستقبلك هما , كل حاجه هما !! انا و انت مجرد نقطه في بحر كبير اسمه هما , بحر لو بعدنا عنه حنموت !! و لو معرفناش نعيش جواه برضه حنموت ! حنموت ملعونين ! بلعنه الصح , لعنه الحقيقه , لعنه المعرفه ..!!! انت صح يا ابني بس مش الصح بتاعهم ! انت اه شايف بس مش اللي شايفنه ! انت فعلا بتقول الحقيقه بس مش اللي عاوزين يسمعوها !
هو : و العمل ؟!
الرجل : قولهم كل اللي هما عاوزنيه .. سمعهم اللي مستنين يسموعوه .. قولهم انا ابن كلب غلطان و انتوا الصح اللي ميبغلطش .. تقبل حقيقتهم و امشي علي صحهم !
هو : و لحد امتي حيبقوا هما الصح و احنا الغلط !؟! لحد امتي حتبقي الحقيقه معاهم ؟!
الرجل : لحد ما هما يخلصوا و احنا نكتر , او لحد ما هما يكتروا و احنا ننتهي !!! بس مفيش حقيقتين بيبقوا , هي حقيقه واحده بس ! , يا تبقي معاك او تبقي مع غيرك ! .. فمتصرخش عشان مهما تقول حتبقي غلطان و لازم يسكتوك , متقاومش عشان مهما تعاند حتبقي مجنون و لازم يعالجوك !! ركز و بص حواليك , انت مجرد صوت قدام ملاين الاصوات, مجرد كلمه قدام ملاين الكتب , انت مجرد وهم قدام واقع فارض نفسه بقي له سنين !.. متضحكش علي نفسك يا ابني .. عشان اللي عاوزينه احمر حيبقي احمر , و اللي عاوزينه ازرق حيبقي ازرق ... !!
يرجع البيت ..
امه : حمد الله علي السلامه يا ابني .. مالك وشك تعبان ليه كده يا حبيبي ؟؟
هو : مفيش شويه تعب في الشغل يا امي ..
امه : ربنا يكرمك يا ابني و يوفقك في شغلك , قولي بقي عرفت بقي ان القميص كان احمر مش ازرق ؟!
يهز رأسه ميبتسما ابتسامه مكتومه ....
امه (مبتسمه) : اه صحيح يلا ادخل سلم علي اخوك و مراته و ابنه , جاين يتغدوا معانا انهارده ...
في الصالون ...
ابن اخوه : عمو عمو , واحشني اوي
هو : انت اكتر يا حبيب عمو , قولي عامل انت ايه ؟؟ و ايه اخبار المذاكره ؟؟
ابن اخوه : الحمد الله , خدنا انهارده الالوان في المدرسه ..
مرات اخوه : طب يلا يا حبيبي قول لعمو لون القميص اللي هو لابسه ؟؟
ابن اخوه : ده ... ده ...
هو : ده لونه احمر ...... اللون ده يا حبيبي , احنا بنسميه احمر ... !!
No comments:
Post a Comment