الموضوع بيبتدي في القرن التاسع الميلادي , لما كان في شاعر سوري أسمه (عبد السلام بن رغبان بن عبد السلام بن حبيب ) و شهرته (ديك الجن و اللي أكتسبها من حبه أنه يمشي في ساعات الفجر وقت صياح الديك ) كان ماشي مع صاحبه ( بكر ) , و سمع صوت عذب بيغني قصيدة من قصايده .. ففضل يتتبع الصوت لغاية ما وصل لصاحبته , بنت جميله أسمها ( ورد ) ,, و اللي أتعرف عليها و أبدي ليها أعجابه بصوتها و هي أبتدت أعجابها بشعره , و حبوا بعض رغم إختلاف أديانهم و أتجوزوا .. ديك الجن كان عايش حياة كلها عربدة و مجون قبل ما يقابل ورد , لكن حياتة أختلفت بعد ما حبها و عرف لأول مرة يعني ايه حب و ألتزام .. لكن الطبع دايما بيغلب التطُبع , و حصل ان في مرة شك ديك الجن في مراته ورد .. و حصلت خدعه عليه , فراح رجع لتهوره مره تانيه و قام قاتلها !! و اللي بيوصف اللحظة ديه العبقري نزار قباني في قصيدته ديك الجن و يقول :
" أنت القتيلة.. أم أنا .. حتى بموتك.. ما استرحت
حسناء.. لم أقتلك أنت.. وإنما نفسي.. قتلت.. "
حياة الشاعر ديك الجن كانت كلها فشل و ضياع علي المستوي الشخصي , كان سلوكه المتهور الغير محسوب سبب رئيسي أنه مكنش عارف يوصل لطبقة شعراء الملوك و الحُكام اللي كانوا موجودين وقتها .. و خصوصا بعد موت ورد أنعزل عن الحياة و مكنش بيعمل حاجه غير أنه يبحث في أصول اللأدب و التاريخ و الشعر ,, و كان بيلاقي الحياة في أشعارة و أبداعاته .. اللي كانت قوية لدرجه ان في أدباء كتير سرقوا حاجات منها و نسبوها لنفسهم زي المتنبي مثلا !! , لغايه ما مات في الوحدة و اليأس سنة 236 هجريا ..
سنه 2014 , و خصوصا في شهر 8 , ظهرت صفحه علي الـ Facebook أسمها " كتابات ديك الجن " , الصفحة ديه كانت بتنزل قصص باللغه العاميه الأردنيه و حكايات ساخره و حققت نجاح كبير في عالم التواصل الإجتماعي .. و اللي بالمناسبة بالرغم من أقتراب المشتركين فيها لـ 120 ألف , و تأليف مؤسسها لكتاب ورقي متداول في السوق , إلا ان هوية صاحبها لغايه دلؤتي غير معروفه !! .. و لما اتسأل صاحبه الغير معروف عن سبب تسمية الصفحة بأسم ديك الجن ؟
قارب تجربته بتجربة الشاعر ديك الجن , و اللي كان مؤمن أنه عشان يطلع شعر كويس و كلام يعيش , أنه لازم يملي نفسه و يزود قرايته .. فديك الجن الجديد , بيحكي عن أول قصة كاتبها في حياته , و اللي بعد ما كتبها حس انه لسه محتاج يطور و يحسن من أسلوبه , فانقطع عن الكتابه لغايه ما رجع بهيئته الغامضة ديه .. فمش فارق معاه الناس تعرف هو مين , قد ما فارق معاه كلمته توصل ليهم ..
أهم حاجة بتميز أي كاتب او شاعر , و تخلي انتاجهم يعيش هو صدق الأنتاج نفسه .. فبالرغم من الفشل الشخصي اللي كان في حياة الشاعر ديك الجن , إلا انه كان صادق في كل حاجه بيقولها و مؤمن بكل كلمة بتنطق من لسانه .. فالهدف من الكتابة , مش ان الواحد يبقي مشهور أو تتملي الأسواق بكتبه و اعماله , أنما الهدف , أن لو حتي كلمة واحده طلعت منه , تقدر تصمد و تعيش .. فديك الجن الحديث بيتكلم عن قوة الكلمة و يقول :
" سواء كنت كلباً أو إنساناً ..عندما لا يكون لديك شيء لتقوله.. يجب أن تسكت.. إرتباط شرطي منطقي.. قاوم هذه الرغبة الملحة في الحديث من أجل الحديث .. قاوم فكرة أن تكون مبتذلا... قاوم محاولات لفت الإنتباه.. إستجداء الإهتمام.. البحث عن ذاتك في عيون الآخرين.. إمتلئ بنفسك.. بأفكارك.. بحزنك.. بشريط ذكرياتك .. بفراغك حتى.. إفعل أي شيء عدا أن تصدر عواء خاويا ... فقاوم فكرة أن تعوي بدون سبب.. "
No comments:
Post a Comment