في منتصف الغابه حيث مكان المحاكمه .. وقفت اللبؤه امام القاضي الاسد ..
الاسد : انتي فعلا نمتي قبل ما تجيبي لجوزك الاكل و سبتيه هو اللي يحضره ؟!
هي : ايوه .. حصل
الاسد : انتي فعلا قمتي بدري و سبتي عرين جوزك و نزلتي تتمشي في الغابه من غير ما تستأذني منه ؟!
هي : ايوه .. حصل
الاسد : انتي فعلا ... ؟!
هي (مقاطعه) : ايوه .. ايوه .. ايوه .. كل اللي مكتوب عندك حصل !
الاسد : تبقي مذنبه و تستحقي العقاب !!
هي : مذنبه عشان تعبت فنمت ؟! و لا مذنبه عشان قررت اتمتع بنسيم هوا الصبح فنزلت اتمشي ؟! و لا مذنبه عشان قررت و لو لمره واحده اختار , مره واحده اقرر , مره واحده ارفض اكون كائن تابع ؟!
الاسد : انتي مخلوقه اصلا عشان تكوني كائن تابع ! هي ديه وظفتك في الطبيعه !
هي : الطبيعه مقلتش ان انا اللي اجيب الاكل و اعمله و اقدمه لجوزي و هو ياكل بس ، الطبيعه مقالتش اني متحركش , معملش اي حاجه غير باذنه بس هو يخرج و يرجع , و يعمل كل اللي هو عاوزه وقت ما يحب ، الطبيعه مقالتش اني اعيش من غير اراده حره او فكر مستقل ، الطبيعه مقالتش اني الغي نفسي !! ,، انا مبطليش الغي جوزي او احجر علي وجوده ، انما كل اللي بطلبه ان هو اللي ملغينيش !!
الاسد : انتي كمان بتعترضي علي الطبيعه ! ديه تهمه تانيه , تهمه ازدراء الطبيعه !!!
هي : متقولش ازدراء الطبيعه قول ازدراء تفسيرك انت الظالم للطبيعه !!
الاسد : تفسيري انا ظالم و تفسير جوزك ظالم و تفسير كل الاسود اللي قبله برضه ظالم , انتي باين عليكي مجنونه !!!؟!
هي : اديك قولتها كلهم اسود !!
الاسد : طبعا ! الاسد هو اقوي و اذكي ، هو يقدر يتحمل و يتعامل مع حيوانات الغابه , انما انتي لأ , انتي كائن ضعيف , ذكائك محدود , كائن ناقض ؟!
هي : مين قال كده ؟! فهمكوا المريض هو اللي اقنعكوا بكده ؟! شعوركم المستمر بالنقص هو اللي خلاكوا بتدوروا علي اي حاجه تفرضوا عليها سيطرتكوا !! ليه لازم يكون هو احسن و اقوي و اعلي مني ؟! ليه منكوش بنكمل بعض ؟! ليه منكونش زي بعض ، اللي بنا قايم علي الاحترام مش الخوف ، قايم علي تقدير الاخر مش استغلال الاخر ، قايم علي العدل !!! و انتوا ابعد ما تكونوا عن العدل !!
الاسد : اخرصي يا لبوه !!!!
هي : حتي اسمي بالنسبه لكوا شتيمه ! صوتي بالنسبه لكوا عوره !! وجودي بالنسبه لكوا تهديد !!
الاسد : بقولك اخرصي !!
هي : لازم تعلي صوتك عشان الحق مش في صفك ! تزعق و تهجم عليا عشان مش عارف تسكتني !! تخوفني و متخيل انك حترجع سيطره مفقوده او كرامه ضايعه ... حقيقي انا بشفق عليك ...!
الاسد : حكمت مكحمه الاسود استنادا لقوانين طبيعتنا العادله و عرف غابتنا العريق ، اجبار هذه اللبوه المجنونه علي ملازمه عرين زوجها بقوه لقضائنا الشامخ .. رفعت الجلسه !
هي : باسم طبيعتكوا حيتم اغتصابي من جوزي ! باسم عرف غابتكوا حيتم منعي عن كل سبل الحياه .. باسم قضائكوا الشامخ حيتم حرماني من الامل و عزلي عن الوجود !! حكمكوا الظالم ممكن ينهيني انا , بس لا يمكن حينهي قضيتي ! .. قضيتي اللي حتفضل مفتوحه مهما اشتد زئيركوا , مهما قوي همجكوا ,قضيتي اللي حتفضل مسمار بيدق في نعش نهايتكوا .... نهايتكوا اللي قربت ...
No comments:
Post a Comment