أكيد في وقت ما في حياتك , قابلت حد و حسيت و انتا بتتناقش معاه انه مش ممكن يكون طبيعي ! ده بيجادل و خلاص ! لا يمكن يكون مقتنع انه صح و مصدق نفسه .. و قلت في سرك ده "بني ادم دماغه ناشفة " ...
"دماغه ناشفة " , مصطلح بنستخدمه عشان نعبر عن حاله الغشامه و الصلابه بتاعه تفكير اللي قدامنا , و خصوصا لما يكون مصمم علي رأي ما انه صح و خلاص .. و كأنه عاوز يطلع انه هو الصح بأي طريقه ,, يعلي صوته ,, يغلط في اللي قدامه ,, يقول اي هرتله ملوش علاقه الموضوع ,, يتشقلب علي الحيطه , المهم يبقي في الأخر صح !! .. المفاجأه ان العلم بيقولك ان الـ "الدماغ الناشفه " ليها تفسير ... و ان القضيه كلها عباره عن هرمونات !!
الموضوع بيتدي أول ما الانسان بيتدي يدخل في اي منافشه او حوار .. و نظرا ان البشر مش كلهم في رأي واحد , فبيتم غالبا الاختلاف مع الشخص ده .. و يتم جداله بالمنطق او الادله .. هنا تحصل المشكله ,,, لما الانسان يبتدي يحس انه بيخسر الارض في النقاش و انه مش عارف يرد , يبتدي الجسم يفرز هرمون "الكورتيسول" اللي مسؤول عن حالات الـ strees , نظرا ان الجسم هنا عاوز يضغط علي نفسه , يجيب اخره , يفضل في حاله استيقاظ و توتر مستمره عشان يغلب في الحوار ده باي تمن ! و كأنه في حاله حرب مش مجرد نقاش و كأن فكره انتصاره في الحوار ده حياه او موت !! لغايه ما الانسان نفسه ميقدرش يتحمل مقدار التوتر و الضغط ده , فيخرج من شعوره و يفقد هدوءه ,,, بس هو السؤال هنا , ليه الانسان بيتعامل مع الحوار البسيط ده كأنه حياه او موت ؟! ليه الدماغ الناشفة موجوده من الاساس ؟! .. عشان للاسف الصح عند بعض الناس .. أدمان !!!!
للأسف الانسان بيتربي من هو صغير انه لازم يبقي الصح ,, فالجسم بيترجم الصح ده برضه في شكل هرمونات , بمعني ان الانسان لما بينتصر في اي جدال او نقاش , الجسم بيبتدي يفرز هرمون الـ dopamine و اللي بيدي الانسان شعور اللذه و المتعه ,, و كأنه الجايزه اللي بيكسبها الانسان المنتصر .. فيبقي الانسان في عطش دائم للجايزه ديه ! زي المدمن , عاوز الهرمون ده باي طريقه .. ,, اللي خلي الانسان بالشكل ده , هو اسلوب الحياه اللي احنا عايشين فيها , اسلوب المنتصر الأوحد , الانسان من هو طفل بيكبر علي ان فيه صح واحد وحيد لازم كل الناس تتبعه و تحترمه .. فيبقي عاوز يكون هو الصح ده , عشان يُتبع و يُحترم ..
علماء النفس و الأطباء النفسيين , شايفين ان حل المشكله ديه , برضه في الهرمونات .. و هو ان الانسان يستبدل شعور المتعه و اللذه بتاع الـ dopamine , بشعور التعاطف و التشارُك بتاع هرمون تاني اسمه oxytocin , و ده هرمون بيتفرز لما انسان يبتدي يكتسب مشاعر ايجابيه تجاه اللي حواليه و يحس بالتواضع و أمان ناحيتهم ,,, بالمناسبه الـ oxytocin هرمون الانجذاب و الحب ..
بمعني , ان مش مطلوب من الانسان انه يدخل الحوارات و المناقشات كأنه داخل حرب لازم ينتصر فيها عشان شكله و كرامته !! لا ابدا .. انما يدخل حوارات عشان يسمع لرأي مختلف و يشوف وجهات نظر تانيه , يدخل حوارات عشان يفيد اللي حواليه و يستفيد منهم , يدخل حوارات عشان يجادل و يناقش و يتعلم ... اما لو متخيل انه داخل حوار يفرض رأيه و يغلط في اي رأي تاني , يبقي أكرم له و افضل له .. ميدخلش حوارت او نقاشات مع بشر تانيه .. اللي زي ده عاوز كراسي و ترابيزات يكلمهم ,,, مش بشر عندها عقول و فكر مستعده ترد عليه .. !!
No comments:
Post a Comment