ليه البنت اللي عنيها واسعه جميله ؟؟

ليه البنات اللي عنيها واسعة جميله ؟؟ 

في وجهة نظري الشخصيه , Anne Hathaway تعتبر أجمل و أرق تفاصيل و ملامح وش أنثوي شوفته , فـ Anne Hathaway بالنسبه لي لوحة بستمتع كل ما أشوفها , و علي الرغم من أن في جميلات كتير في هوليوود غيرها و يمكن علي الـ golden beauty ratio (معادلة لقياس مستوي جمال الوش) يحققوا نتايج أعلي من Anne , إلا ان Anne فيها حاجه غريبه بتشدك ليها و تنقلك لعالم تاني .. و اللي أعتقد السر موجود في عنيها .. 

من أوائل الناس اللي أستخدموا الماسكره و الحُكل – رجاله و ستات – , هما الفراعنه ,, و لغايه دلؤتي , الأدوات ديه تعبر من الأساسيات في مُعدات المكياج .. و السبب هو أنهم بيحددوا إطار خارجي لشكل العين و بيضيفوا زي عُمق ليها ... و ده بيصوروها علي أنها أوسع .. بس ليه البنت بتسعي أنها تخلي عنيها أوسع ؟؟ أو ليه العين الواسعه رمز من رموز الجمال ؟؟ 

في نظريتين للإجابه : 

1- نظرية وش الطفل : بيقولك أن الطفل أول ما يتولد بتكون تفاصيل وشه مقارنه براسه , أكبر من تفاصيل وش الناس الكبيره مقارنه بوشها .. فبتبان عينهم واسعه و كبيره .. و اللي بتصغر مع الوقت , مش عشان هي حجمها الفعلي اللي بيصغر , قد ما عشان باقي الملامح بتكبر فنسبتها من الوش بتقل .. فالعين الواسعه - نفس فكره الغمازات – مربوطة عند أغلبنا بالبرأه و الطفوله .. فلما بنشوف بنت عينها واسعه أو حتي ولد بنقول عليه Baby face , و بيبقي محط إعجابنا .. 

2- نظرية الهرمونات : بيقولك أن لما هرمون الأنثوة يزيد في جسم البنت , بيخليها تكتسب صفات جسديه معينه و اللي بتظهر أوي في مرحله البلوغ .. من حاجات اللي الـ estrogen (هرمون الأنوثة ) بيشتغل عليها , هي تفاصيل الوش ,, فحسب مقالة في جريده الـ Telegraph بعنوان " Attractive women are more than just a pretty face " , بيقول أن الـ estrogen من وظايفه منع نمو عضمة الخد , زياده علي كده ترسيب دهون في المنطقه ديه , كل العوامل ديه بتساعد علي إدراك العين في صورة و حجم أكبر و أوسع .. فيبقي كل ما العين بانت أوسع , كل ما كانت صاحبة العين ديه عندها هرمون أنوثة أعلي , كل ما كانت أجمل و أصلح ! 

و هو ده بالظبط اللي حصل في مُخي - علي مستوي اللاوعي - لما شوفت صورة Anne Hathaway , و بيحصل في مُخ اي حد يشوف اي واحده عينها واسعه .. ,, طبعا الموضوع مش بالبساطه ديه ,, أنما مثلا لو كان في واحد و هو صغير كان عنده مدرسه بتضربه في الفصل شبه Anne Hathaway او عنيها واسعه , ممكن يكره اللي عينهم واسعه ! ,, أو ممكن واحد متربي وسط شكل وش معين , زي أمه و أخته و اقرايبه , أكيد حيبقي ده مقياس الجمال عنده مختلف , فأعتقد lucy lu (ممثلة ليها ملامح أسيويه ) ممكن تكون أجميل بكتير بالنسبه لراجل صيني او ياباني مقارنة بـ Anne Hathaway ... فقضية الجمال , قضية نسبيه جدا و مفهاش ثوابت كتير ,,, بس يمكن لو حبينا نطلع بنقطه أغلبنا يتفق عليها , حتبقي ان العين واسعه سحر محدش يقدر يقاومه .. و الأمتع من أنك تتشوف الجمال , هو انك تفهم سر جاذبية و روعة الجمال ده ..