الإنحيازات

للاسف مهما حاول الانسان يبان محايد او منصف في طريقه تعامله مع الوقائع و الحقائق في دايما و لو نسبه بسيطه من الانحياز ... هي ديه الطبيعه الانسانيه ... و لكن المثير في الموضوع , ان حتي الانحياز في اتخاذ اي قرار مش يبقي عشوؤائي , او حتي بطريقه غير مفهومه او معلومه , انما شكل انحياز البشر له مدراس و انواع , و من هنا ابتدي علماء الفلسفه و المنطق يقسموا انواع الانحيازات البشريه , يدرسوها و يطبقوها في علوم كتير زي الاقتصاد و العلوم السياسه و الاداره , و عندنا عالم اسرائيلي اسمه عاموس تفيرسكي اخد جايزه نوبل في الاقتصاد بسبب ابحاثه في مجال الانحيازات ديه : http://ar.wikipedia.org/wiki/عاموس_تفيرسكي ... 

, و مجرد امثله بسيطه عن الانحيازات ديه : 

1- الانحياز التأكيدي : و هو انحياز الناس لمعلومات او اخبار تتوافق مع ادراكهم المسبق للحاله الموجوده دلؤتي ... بمعني ( انا شايف ان الاخوان عالم ولاد كلب ارهابيبن , صحيت الصبح قاريت خبر ان في انفجار في شارع شبرا , يبقي علطول اللي عمله الاخوان .. او العكس انا شايف ان الاخوان ناس كويسيين جدا و اللي يجي عليهم هو اللي ابن كلب ارهابي , صحيت الصبح قاريت خبر القبض علي 55 اخواني لتخربهم في المنشئات العامه , يبقي علطول ظلم و فساد و الاخوان ملهومش ذنب ) مع ان الحقيقه في المثل ده ان لا الحاله الاولي صح و لا الحاله التانيه صح , كل اللي حصل في الحالتيين اني مسمحتش لنفسي باي فرصه اني حتي افكر او اوزن المعلومات , مسمحتش باي فرصه اتاكد من صحه الدلائل المقدمه قصادي , اي فرصه اشك في معرفتي السابقه ! و مشكله الانحياز التأكيدي انه لما بيزيد عند الانسان فعلا بيعميه ! بيخليه مش شايف و لا سامع الا صوته هو , هو مقتنع بحاجه , يبقي اكيد الحاجه ديه هي الصح ... و بالمناسبه الموضوع ده موجود في كل فروع العلوم الحياتيه سواء , حتي الطب و الرياضه فيها انحياز تأكيدي 

2 - الانحياز للاعتقاد : و هو انحياز الناس لمعلومات او اخبار تتوافق مع عقائدهم اللي متربين عليها من و هما صغيريين ... و هنا الموضوع مبقاش مجرد معرفه سابقه لا ده احنا دخلنا في صميم الادراك ! و هو الاعتقاد ... بمعني ( انا شايف ان انحيازي بموضوع ما اعلي من اي منطق , اعلي من اي تفكير , حتي اعلي من اي مناقشه و انحيازي ده في الاول و الاخير قايم علي اعتقاد شخصي ليا سواء كان ديني او اجتماعي او اي مسلمات غير قابله للجدال متربي عليها من و انا صغير , مسلمات موجوده في خانه اعلي من خانه التفكير المنطقي ) .. المشكله في الانحياز ده ان لو مره واحده في عمر الانسان سمح لنفسه يصدق اي حقيقه من غير منطق , حيبقي علطول بيئه صالحه لكل ما هو لا منطقي ... الفكره هنا مش ضد الاعتقاد , و لكن ضد الانحياز اللاعقلاني تحت مسمي الاعتقاد !

3- الانحياز للمصلحه الذاتيه : و هو انحياز الناس لمعلومات او اخبار تتوافق مع التحسين من صورتهم الشخصيه بس ! ... بمعني ( انا طالب جيبت دراجات كويسه في الفزيا , يبقي علطول ده عشان انا حد جامد فشخ و عبقري .. بس انا هو هو نفس الطالب جبت درجه زي الزفت في الكيميا , يبقي عشان مدرس الكيما حمار , او عشان انا اتظلمت , او عشان بيضطهدوني عشان عيني لونها خضرا و هما ضد الثوره , و ابتدي اختلق اي انحيازات عشان صورتي قدام نفسي متتهزش ... ) نظريا ممكن فعلا يكون في ظلم او تعسف , و فعلا ممكن يكون سبب تفوقك في مجال ما , هو صراعك العنيف ضد كل الظروف , بس اللي بيعمل المشكله هو غرور الانسان و فقدانه للبصيره , مش عيب ان الانسان يطمح دايما لتحسين صورته قدام ذاته , بس العيب انه يكدب علي نفسه و يغشها و ينحاز لحقايق مزيفه لمجرد تحسين الصوره ديه ... 

4- انحياز الاسناد الاساسي Fundamental attribution error : و هو انحياز الناس لمعلومات او اخبار تتوافق مع رؤتهم لشخصيه الاخرين بغض النظر عن البيئه او الظرف اللي كانوا فيه ... بمعني ( انا رايح اقابل صديقي ماجد في الشغل , لاقيته بيشتم و عصبي و لا يمكن يكون ده ماجد اللي انا اعرفه .. علطول اروح منحاز ان ماجد اتغير , ماجد بقي عصبي , بقي قليل الادب , بقي ابن ### , كل ده من غير ما افكر في الظروف اللي عملت في ماجد كده ؟! ) ... بكل بساطه انا خرجت ماجد برا الظروف اللي هو فيه لمجرد جهلي بالظروف ديه و اصدرت حكم في شخصه و تعاملت مع ماجد علي هذا الاساس .!

5- انحياز IKEA : هو اسمه كده بجد :D 

http://en.wikipedia.org/wiki/IKEA_effect , ده ببساطه هو انحياز الناس التافهه او الفارغه للماركات بغض النظر عن المحتوي او الجوده ... بمعني ابسط لمجرد ان قطعه العفش ديه من مكان مشهور تبقي حاجه فخمه , مجرد القميص ده من المحل الفلاني ده , يبقي علطول الانحياز انه جميل جدا و اجمد حاجه في السوق ... و قيس علي المثل ده حاجات كتير و وجهات نظر اكتر اتنبت علي اساس حاجات سطيحه و شكليات مجرد الانسان انحاز ليها عشان بس هو متربي او متعود علي نوع عقيم معين من التفكير .. مع العلم ان المشكله مش في IKEA , المشكله هي ربط او الانحياز لحقيقه ما بمجرد التصاقها بكلمه IKEA ... 

طبعا موضوع الانحيازات ده كبير جدا جدا جدا , و كل الانحيازات ديه هي مجرد نقطه في بحر , فلو عاوز تقرا اكتر : 

http://en.wikipedia.org/wiki/List_of_cognitive_biases, ابتدي من هنا و كل موضوع يشدك دور عليه في جوجل ......