المخدرات اللعينه

في صالون احد المنازل ,

عاطف ( مسطولا ) : ولا يا اسفنجه حته الحشيش ده بسكوته مش مغربي .. !! 

كيرلس : ههههه بسكوته ازاي ؟؟؟ طب بسكوته لوكس و لا نواعم هههههه ؟؟؟

(يضحك مع نفسه حيث ينظر له الباقي في صمت ! )

عاطف (مشيرا علي كيرلس ) : مين الكابتن ده يا اسفنجه ؟؟ 

اسفنجه ( في حاله سطل مريعه ) : ده واحد صاحبي يا عم ... 

ماجد (مسطولا ) : صاحبك يعني ضامنه ؟؟ و لا صاحبك و يبلغ عنا ؟؟!! 

اسفنجه : عيب بقي !! كيرلس ده اضمنه برقبتي يا جدعان , ده اكتر من اخويا ,, غير بطلوا قلق بقي , الشرطه اصلا مش فاضيه لنا , بتحارب الارهاب .. 

ماجد (فجأه يتوقف عن شرب الحشيش ) : لو سمحت يا اسفنجه ! متقولش علي شرطه الانقلابين ديه بتحارب الارهاب ! عشان الانقلاب نفسه هو الارهاب !!!! 

اسفنجه : ايه ده ؟! انت اخوان يلا يا ماجد ؟!! 

ماجد : و مالهم الاخوان يا عم !؟؟

اسفنجه ( يتوقف هو ايضا عن شرب الحشيش !! ) : مش ممكن !!!! و انا اللي كنت مصاحبك بقي لي 8 ايام و عمري ما تخيلت انك تبقي اخوان ابدا !! ..... اتفضل اطلع بره بيتي !!! 

ماجد : و انا اصلا ميشرفنيش ألف مع انقلابين زيكوا ! و تحرم عليا بفرتي لو جيه عليها حشيشكوا الانقلابي... يا عبيد البياده !! 

يهم للقيام , و الجلوس بعيد عنهم , 

فيتجه كيرلس لاسفنجه : ليه كده يا اسفنجه ؟؟ حتي لو اخوان يا عم ,, ميصحش تطرده من بيتك ,,, ممكن عشان خطري تلف له سجاره و تقوم تديها له ..

اسفنجه : ابدا ! ده ارهابي يا جدع !!! ده و امثاله هما اللي خاربين البلد , بس لما السيسي يمسك حيفشخ امهم !! 

كيرلس : معلش يا اسفنجه , ارهابي بس برضه مصري و اخوك في الوطن .. لف له حته الحشيش ديه و قوم اشربها معاه , خليك اجدع منه , انتوا برضه اصحاب :) 

يقتنع اسفنجه و يقوم ليصالح ماجد , ليترك كيرلس مع عاطف , 

كيرلس : ازيك انا كيرلس بهجت صاحب اسفنجه , 22 سنه و في سته طب , ممكن نتعرف ؟؟ 

( عاطف ينظر له باستغراب و صمت و يكمل شرب الحشيش ..)

كيرلس : انا بحب القرايه و الكتابه , و بكتب علي الفيس , اسمك ايه و انا ابعت لك طلب صداقه ؟؟ بس اوعي تعمل لي حظر .. زي 6 ابريل ههههه و لا زي حظر التجوال كده .. هههههه 

(تتغير نظره عاطف من الاستغراب لنظره استحقار ! ) 

كيرلس (بضحكته البلهاء ) : ايه يا عم انت مش بترد علينا ليه ؟؟ لعلمك انا عمري ما شربت حشيش , و خايف اشربه عشان بيقولوا بيحرق الزور .. انت عارف انه كمان بيضعف القدره الجنسيه عند الرجاله .. و بزود نسبه سرطان الرئه و امراض القلب .. غير ان ده حرام اصلا و ربنا بيزعل من اللي بيشربوا حشيش .. !! 

يدخل اسفنجه و في يده ماجد , فيبتسم كيرلس , 

كيرلس : ايوه كده يا جدعان , ده عمر الدم ما يبقي مايه , احنا اصحاب مهما السياسه فرقتنا .. 

ماجد (ناظرا لكيرلس ) : هو مين الكابتن ده يا اسفنجه ؟؟ هو الكابتن ده كان قاعد معانا من بدري ؟؟ 

اسفنجه يشبه علي كيرلس : مش فاكر والله يا ماجد !! انا شفته قبل كده , بس مش فاكر الصراحه فين ؟!!

ماجد يهجم علي كيرلس !!

ماجد : انت ايه اللي دخلك هنا , انت حرامي يلا ؟!!! 

كيرلس : اهدي يا استاذ ماجد!! انا كنت قاعد معاكوا من بدري حتي باماره ما انت اخوان و .. 

ماجد : مين يلا قالك عليا اني اخوان !!! انت امن دوله ؟؟

اسفنجه (مذهولا مسطولا ) : نهار اسود امن دوله و في بيتي ؟؟!! فاكرين كده حتخوفونا !! طب يسقط يسقط حكم العسكر !!! 

كيرلس : فيه يا عم اسفنجه ؟!! انا كيرلس صاحبك !! و عسكر ايه و بتاع ايه ؟! انت مش لسه من شويه كنت عاوز السيسي يمسك !!

اسفنجه : سيسي يمسك !! حرام عليك يا اخي ! و دم الشهدا يروح هدر !! 

ثم يهجم عاطف علي كيرلس : بقي يلا انت مطلع ديك امي من الصبح !! و الحشيش بيجيب ضعف جنسي و الحشيش بيزعل ربنا و شويه و حتقلب علي ريهام سعيد ! , و انا ساكت لك , فاكرك حد معانا !! و انت في الاخر تطلع حرامي و امن دوله !! 

كيرلس (يبدأ بالبكاء ) : و الله يا جدعان عيب اوي اللي بيحصل ده !! يعني ده بدل ما ترحبوا بيا و تعاملوني زي اخوكوا الصغير , تعملوا فيا كده !! , ديه اول مره في حياتي اجرب اشرب حشيش و كنت متخيل انكوا حتساعدوني اني اجتاز التجربه ديه .. و توقفوا جنبي .. بس للاسف اتصدمت في اقرب الناس ليا .. (ثم ينهار بكاء )

ماجد (يطبب عليه ) : خلاص يا عم كفايه عياط و اقوم اغسل وشك ,,, و متقلقش حنوقف جنبك و نساعدك كمان .. قول لي بقي اسمك ايه ؟؟

كيرلس ( يتوقف عن البكاء و يمسح دموعه و برابيره النازله من انفه بكم قميصه ) : اسمي .. كيرلس 

ماجد يبتسم و يشير لكيرلس علي علامه الصليب في يده و يقول : و انا يا سيدي اسمي ماجد صليب , يعني نصاري زي بعض اهو .. اومال انت عامل قلق ليه ؟؟ علي العموم عاشت الاسامي يا كيرو , قول لي بقي بتصلي في كنيسه ايه ؟؟ 

ثم فجأه اثناء حوارهم يسمعون صوت سيده كبيره من احدي غرف الشقه :

ماجد ؟! ايه الدوشه اللي عندك برا ديه يا حبيبي ؟؟؟! 

ماجد : مفيش يا ماما , كملي نوم انتي يا حبيبتي .. ديه باين عليهم ناس اصحابي من الكنيسه جاين يقعدوا معايا ... 

ام ماجد : و ايه ريحه الدخان اللي عندك ديه يا حبيبي ؟؟ 

ماجد (ينظر حوله فيجد دخان كثيف حوله ) : .. ديه غالبا بخور يا ماما ... اصلهم اتنين خدام و معاهم شماس اسمه كيرلس لسه متعرف عليه دلؤتي , شبه كيرلس بهجت صاحبي .. تصبحي علي خير انتي يا ماما و متقلقيش يا حبيبتي .... احنا كلنا بخير ..