الخطيه

هو ليه الكدب غلط ؟! ايوه يعني ايه الهدف ورا اننا منكدبش ؟! ايه الضرر اللي ممكن يزعل ربنا او فكره الله الاعظم لما نكدب ؟! طب الشهوه
 ؟! حاجه بيولوجيه زي الجوع و العطش مزروعه جوا الانسان ؟؟ و لو الانسان حاول بشبعها الله يزعل ؟؟ هو ربنا بيسعد لما الانسان يتعب !؟؟؟ نفس الفكره في الشتيمه ؟؟ يعني هي الشتيمه ديه حتفرق مع ربنا قي ايه , ديه مجرد الفاظ بتطلع من الانسان .. زي اي كلمه , اشمعنا يعني الكلمه ديه اللي بتفرق ؟! من الاخر مهما تغير المسمي , هي ليه الخطيه غلط ؟! و هو ليه اصلا في مصطلح لافعال معينه اسمه خطيه ؟؟

مبدأيا ... لازم نتفق ان الواحد مش مستني الدين عشان يعرف ان الاغتصاب غلط ... او ان القتل غلط ... او اي حاجه فيها تعدي علي حقوق الاخر غلط .. عشان منطقي حتي باقل تفكير انساني ممكن الواحد يوصله من غير دين حتي , ان الانسان ارقي من انه يكون حيوان في غابه لو قوي حبتين يقدر يتعدي علي الاخر , و اعتقد ان البشريه نفسها وصلت للمفهوم ده بصوره ناضجه كفايه من خلال مواثيق حقوق الانسان و غيرها .. بس حاجه زي الزنا المقنن , واحد بيمارس الجنس مع واحده و الاتنين راضين ؟؟ ايه المشكله ؟؟ و لا واحد بيضر نفسه بالتدخين لوحده ايه المشكله ؟! او حته بيتفرج علي سكس في اودته ؟! هو حر ...ليه الافعال اللي مفهاش اي ضرر علي الاخر ديه ممكن تكون مش مقبوله من الله !! 

محتاجين زي مقدمه بسيطه عن اهميه الدين في حياه الانسان .. يعني الانسان المتدين ليه متمسك اوي يعني بالدين ؟؟ بغض النظر عن الناس اللي مجبره علي الدين او اللي مجرد الدين بالنسبه لها خانه في البطاقه او .. بس لو حبنا نشوف تمسك الناس بالدين , حنلاقي الاغلبيه العظمي متمسكين بدينهم كخوف من ما بعد الموت .. و كأن الدين ملوش اي لزمه في الحياه غير ساعه الموت .. و في حاله زي كده ده ميبقاش دين حياه , ده يبقي دين موت !! لازم يكون في فايده للدين في الحياه !؟ هل مثلا الدين زي العلم ... بيطور حياه الانسان ؟؟! الصراحه , لأ , الدين او حتي الكتب السماويه مش كتب فزيا او احياء .. هل مثلا زي التجاره بيوزد ربح الانسان , يعني المتدين بيكسب حاجه علي الارض بدينه ؟؟ ممكن يبقي اه بالنسبه لبعض الناس ؟! بس برضه عموما لأ , ده بالعكس في ناس بتضحي بحياته مثلا في مقابل دينها او مبادئها العقائديه ؟! طب يعني ايه المبرر ورا الدين في ناس فعلا مؤمنه بالدين من غير خوف او منفعه ؟! .. فكر قد ما تفكر .. حتكتشف ان فايده الدين الوحيده علي الحياه (ده لو انت مؤمن بالدين ) هي انها تقربك من الله .. الله اللي هو رمز ا المحبه الكامله , السمو الكامل , العطاء الكامل , الحياه الكامله غير المقترنه بالفساد , زي ما تقول كده المتدين مؤمن بوجود كيان كامل اسمه الله هو عاوز يوصله , ممكن يكون بيخرف او ممكن يكون بجد , المهم هو عاوز يوصل للكمال ده .. و عشان الله كامل ,فاي فساد في طبيعه الانسان بيساعد علي البعد عن الله , فالله يرغب الانسان في انقي صوره له .., مثل بسيط عشان الدنيا توضح .. الله مش حيتضر في حاجه , لما واحد يتفرج علي سكس .. بالعكس الواحد نفسه هو اللي بيتضر .. هو اللي بيفقد سلامه و يتحول لشخص جبان بيعمل حاجه في الضلمه او يتحول لشخص عبد لحاجه معينه مش قادر يبطلها و كل ده قادر انه يخلي الانسان في انفصال عن الله .. مثل تاني , الانسان اللي بيكدب , لو ركزت في الهدف ورا كدبه هو انه خايف يقول الحقيقه , فبقرر يتنازل عن صوره الله الكامله اللي جواه و يعوضها بصوره فاسده لا يمكن انها تتماشي مع كمال الله .. و هكذا .. ألخ 

الملخص البسيط اوي : ان اه الخطيه لذيذه جدا و ممتعه ... و انها ممكن تكون بسيطه و مش بتضر حد .. و انك حر انك تمارسها و محدش ليه سلطان عليك .. و ان فكره الله مش مشروطه انها تغلس عليك و خلاص , ... بس فكره انسايقك وراء الخطيه بيخليك عبد للخطيه , بيخليك تتنازل عن صوره الله اللي جواك (ده طبعا في حاله انك مؤمن اصلا ان في صوره الله جواك:) ) , .... و اخيرا بعيدا عن اي كلام ديني , بس في زي معادله نفسيه او حتي ممكن تكون اجتماعيه .. ان كل ما الانسان قدر يسيطر علي ملذاته الارضيه , قدر انه يسمو بروحه و فكره .. كل ما الانسان قدر يمنع نفسه من الخطيه و يعيش حياه الزهد و السمو الاخلاقي كل ما ارتاح و قدر يوصل لذاته بصوره اعمق , .. فالخطيه مش في الفعل نفسه انما في ما وراء الفعل .. الخطيه مش انك كديت , لا الخطيه انك جبان فكدبت , الخطيه مش انك زانت , الخطيه انه مقدرتش تتحكم في نفسك فزانت , الخطيه مش انك شتمت , الخطيه انها كنت اضعف من انك تتحكم في غضبك و سمحت لغضبك يتحكم فيك .. المشكله مش في ان الانسان اخطئ , المشكله لو الانسان قرر انه يستسلم للخطيه , فان الهدف الاساسي للاديان هو جهاد الانسان ضد نفسه للوصول لصوره الكمال الاخلاقي و الروحي , حتي لو مقدرش .. المتعه في طلوع الجبل , مش الوصول للقمه , و لكن في الرحله نفسها .. و مش حنهي كلامي بأيه دينيه او موقف ديني خالص .. بس بجمله لكارل ماركس توضح لك ان بدايه الراحه النفسيه عموما لازم تبتدي بتضحيه و ترفع :

فان الترياق الوحيد للعذاب النفسي هو التألّم الجسدي...