في الزباله

في قا ع .. قاع .. قاع .. احد اكياس الزباله , يدور هذا الحوار .. بين كيس شيبسي فارغ و قشره موزه .. 

كيس الشيبسي : انا خلاص قررت اسيب كيس الزباله ده ..

قشره الموزه : و حتروح فين يعني ؟؟ ما انت كده كده مصيرك كيس زباله في الاخر 

الكيس : اهو اي زباله حتبقي ارحم من الزباله ديه .. خلاص الزباله ديه مبقتش تنفعني .. بقت زحمه و مقرفه و رحتها وحشه .. بقت ممله و متعبه و لا تطاق .. من الاخر , احنا ملناش مكان فيها تاني .. 

القشره : و هو مين خلاها زباله مقرفه و متعبه زي ما انت بتقول ؟! مش احنا ... الزباله ديه من غيرنا عباره عن كيس فاضي نضيف , و يمكن كان حيبقي مليان عيش , او يمكن مليان صابون , او اي حاجه غير الزباله اللي بوزته و بهدلته ! هو مين اللي خلاه زحمه ؟؟ مش احنا , سبب الريحه الوحشه ؟؟ مش احنا ؟! 

الكيس : لا مش احنا , اللي عمل الريحه الوحشه , بواقي الاكل اللي كانت بتترمي فيه , و اللي عمل الزحمه و القرف , الكانزات الناشفه اللي زنقت الدنيا , انا عن نفسي كيس شيبسي نضيف لا رحتي وحشه و لا بعمل زحمه , ليه اتحمل قرف انا مليش ذنب فيه 

القشره : عشان المفروض , انت مسؤول عن الكيس ده , و في حاجات كتير المفروض بتربطك بيه , علي الاقل عشرتك مع اللي جواه , او حتي ذكرياتك جوا كل حته في الكيس , 

الكيس : طب بلاش بس الكلام الكبير ده , و كلميني عن الواقع ! يعني مثلا حيجي اليوم و الاحوال حيتغير ؟؟ .. لا , طبعا ..حتفضل الحاله زي ما هي و يمكن اسوء مدام اللي فيه مبسوطين , و مش فارق معاهم يتغيروا , او يبقوا احسن .. هما عاجبهم حالهم , خلاص اسبهم و امشي 

القشره : تصدق عندك حق .. سبها .. سبها و اهرب .. سبها و دور علي مصلحتك في اي حته تانيه .. ما اصل اي حته تروحها بالنسبه لك مش اكتر من كيس زباله يلمك !! 

الكيس : طب ليه الغلط يعني ؟!! انا حسبها عشان لو قعدت فيها اكتر ممكن يحصلي حاجه ... و ثم ايه المشكله لما الواحد يدور علي مصلحته , ما كله بيدور علي مصلحته ..

القشره : عندك حق .. دور علي مصلحتك .. و سيبك من الكلام الفاضي بتاعي .. بس عارف الفرق بيني و بينك ايه ؟؟ الفرق ان الكيس اللي انا فيه ده , بالنسبه لي و بالنسبه لكتير غيري اكبر من مجرد كيس زباله .. 

الكيس : عشان عالم مجانين و مضحوك عليكوا .. متخيلين انكوا حتخلوا الزباله ديه فندق خمس نجوم بالشعارات و الكلام الحمضان اللي بيتعب الواحد و خلاص !! قولي لي سبب واحد يخليني اعيش في الزباله ديه ؟! سبب واحد يخلني افكر حتي اني اصلحها , و لا اتعب نفسي فيها دقيقه تاني ؟! مش حتلاقي .... و للاسف , انا معنديش استعداد اضحي بعمري و حياتي عشان شويه مناديل فيها برابير مبتفكرش او اعواد كبيربت محروقه لغايه دلؤتي مش عاوزه تدرك الواقع المعفن اللي احنا فيه ,, طبعا حتقولي عليا وحش و شرير .. بس كل اللي في الموضوع اني تعبت من احلامي اللي مش بتسبني في حالي .. تعبت من طموحي اللي في كل ليله يأنبني اني حبسه و خنقه .. تعبت من مستقبلي اللي مش شايفه و لا حاسس بيه .. 

القشره : لا طبعا انت لا وحش و لا شرير انت كل اللي في الموضوع انك اناني و متعرفش يعني ايه انتماء ! مش بتفكر غير في مصلحتك و في شكلك و وضعك .. عايش لنفسك بس ..تقدر تهرب , فحتهرب و مش مهم اللي يحصل يحصل , الوضع اللي ضايقك ده حيفضل يضايق غيرك , بس مش مشكله طالما انت بعيد و في الامان !! , و للعلم انت لو حتقارن وضعنا الحالي باي فندق حتي لو نجمتين مش خمس نجوم كمان , حتلاقي الفندق أحسن ,, .. بس اللي انت متعرفوش في الفندق , انك مهما دفعت او مهما سكنت في اجمل اوده فيه انك مش اكتر من مجرد ضيف , نزيل , مقيم .. او مهما كان المسمي بس عمرك ما حتكون صاحب مكان , و مهما عشت في الفندق سنين كتير .. عمرك ما حتعوض لحظات الضحك و التعب و الحب و التضحيه اللي ممكن تعشها وسط اصحابك و حبايبك .. عارف لما تمشي يمكن فعلا تفضل الزياله من سيئ لاسوء , بس يمكن لو اللي زيك كلهم قعدوا , يمكن تتغير لمكان افضل !