في احد البارات القديمه في وسط البلد ,
كيرلس : انا مش مصدق نفسي ! انت ايه اللي جايبك هنا يا بوب ؟؟
البرادعي (بنبره يأس , متجرعا من زجاجه الجعه التي امامه ) : و النبي سبني في حالي يا كيرلس .. انا فيا اللي مكفيا !
كيرلس : مال لك يا بوب ؟؟ و مين الاستاذ اللي قاعد معاك ده ؟؟
البرادعي : ده شباب الثوره ..
كيرلس : تشرفنا , ايوه يعني مين برضه ؟؟
البرادعي (بنرفزه ) : مين ايه يا عم ؟! هو اسمه كده ! اسمه شباب الثوره ! متعرفش شباب الثوره اللي كل شويه يقعد مع عدلي منصور, و السيسي كان لسه قاعد معاه من اسبوع و مرسي كان بيقعد معاه , اهو ده بقي شباب الثوره !
كيرلس : ااااااه اهلا و سهلا , .. بس مال حالك كده متبهدل و شكلك خرمان خالص يا بوب ؟؟
البرادعي : يا عم , انت مش شايف السيسي و المخابرات المصرييه عاملين ايه ؟!.. الناس ديه طلعت جامده اوي يا كيرلس و كشفونا .. خلاص الخطه باظت يا كيرلس .. و حنلبس كلنا !
كيرلس (مصدوم ) : قصدك تقول ... ؟!
البرادعي : ايوه يا عم ...فعلا اوباما كان مديني قرشين عشان ابوظ مصر و اعمله فوضي خلاقه , بس السيسي كشفني و ضيع المصلحه .. ربنا ينتقم منه ! كانت مصلحه العمر , و كان زماني مخلصها و قاعد في بيتنا علي الاقل كنت لما اموت , كنت حموت و انا سايب قرشين كويسين يستروا البت و امها .!
كيرلس : يعني انت فعلا كنت مع الاخوان ؟؟؟! يعني الدكتور توفيق عكاشه و الدكتور مرتضي منصور و الدكتور احمد موسي و الدكتور مصطفي بكري و الدكتور ..
البرادعي (مقاطعا ): ما خلاص يا عم .. ايوه كل كليه طب ديه كانت صح ! بس مين فينا مبيغلطش يا كيرلس !؟ كنت في عوزه يا اخي .. و الشيطان لعب في دماغي ساعتها .. بس اهي في الاخر مكملتش و بقيت في الاخر في مكان حقير زي ده , مع واحد زيك ..
فجأه يأتي رجل يسلم علي البرادعي ..
البرادعي : اتفضل يا حبيبي , اتفضل .. كيرلس مش غريب , اعرفك يا كيرلس .. ده اقباط المهجر
كيرلس : اهلا و سهلا , ايوه يعني مين برضه ؟؟
البرادعي : يا عم هو اسمه كده .. اقباط المهجر صاحب شباب الثوره برضه , المهم اكمل لك .. احنا لازم الفتره اللي جايه نوقف قدام السيسي عشان ميكسبش , عشان الراجل ده لو كسب كلنا حنضيع و كأن ثوره لم تقم !
كيرلس :, بس انت فيك صحه توقف قدامه يا بوب ؟؟ قصدي يعني حتستحمل توقف قدامه ؟! , انت مشوفتش السيسي اليومين دول بقي ينزل يلعب عجل و يجيب ترنجات من التوحيد و النور , بقي حد تاني خالص يا بوب , صحته شدت و بقي يضرب ديكا و هرمونات , اخاف عليك يا بوب توقف قدامه الصراحه ؟!!
فجأه يدخل شاب ملتحي و شعره طويل نسبيا ..
كيرلس : متقولش , عرفته .. ده شباب الاخوان , صح ؟؟
البرادعي : لا يا عم ده الاشتراكين الثورين ..
كيرلس : اهلا و سهلا ... , طب بقول لك يا بوب ما تيجي بدل ما نوقف قدام السيسي , نوقف ورا حمدين ؟؟ و اهو برضه ورا حمدين اكيد حيكون اخف مليون مره من قدام السيسي ؟؟
فجأه تدخل سيده , تسلم علي البرادعي
كيرلس : عرفتها .. ديه اكيد نساء مصر , صح ؟؟
البرادعي : لا ديه اسماء , بنت اخويا جايه تاخد مفتاح بوابه العماره ,
كيرلس : ممممم طب نرجع لموضوع الانتخابات , قلت ايه في حوار حمدين ؟؟ توقف وراه ؟؟
البرادعي : مش عارف يا كيرلس , مش حاسس حمدين ثوري يعني .. غير متنساش انه حط ايده في ايد العسكر قبل كده ؟!
كيرلس : طب و انت حططها في ودانهم مثلا ؟!!
البرادعي : لا انا شايف ان حمدين ينسحب و ميدخلش المهزله بتاعه الانتخابات ديه ! و نفضل في نضالنا الثوري ! عشان كده شكلها مطبوخه للسيسي !
فجأه يتأتي خبر في التلفاز عن تقدم مرتضي منصور للترشح في الانتخابات , فيصدر البوب بعض العبارات و الاصوات الغريبه ... ثم يتجه لكيرلس و يقول : انا ولله يا كيرلس شايف ان مفيش اي مشكله لو السيسي كسب المرحله ديه و بعد اربع سنين نبقي نشوف موضوع الانتخابات ديه .. مش كده و لا ايه ؟؟؟!!
No comments:
Post a Comment