فجأه تجري تجري سيده كبيره السن نحو هذا التكتل البشري المذدحم ... و تصرخ : ابني !! سيبوا ابني !! ابني يا كفره !!!!!
الرجل من الواقفين حول هذا الشاب : هو انتي يا حاجه , ام الواد ده ؟؟!
السيده : اه انا امه !! امه يا عالم مفتريه ! امه يا عالم معندكوش لا قلب و لا ضمير بتتشطروا علي عيل في اولي ثانوي قد ابنكوا و نازلين فيه ضرب ؟!
الرجل : يا حاجه .. ده كان ماسك بت و قاعدين لامؤخذه في الخفا بيعلموا حاجات مش كويسه ! .. و لما جيه راجل كبير يكلمه , قال له انت مالك .. يصح كده يا حاجه ؟!
الام : انت شوفته بعينك ؟!! ابني لا يمكن يعمل كده ؟؟! و لو فرضنا عمل كده , تموتوهلي ؟!!
الابن (يتكلم بصعوبه من شده الضرب ) : يا امي .. محصلش كده خالص ! ده واحد شافني قاعده واحده زملتي , راح جيه شتمني و شتمها , فانا قلت له انا مش حرد عليك عشان انت راجل كبير و انا متربي , راح غلط فيكي يا امي و فجأه لاقيته بيضربني بالقلم و بعدها كلهم اتلموا عليا و ضربوني .. !
رجل اخر : يا حاجه , يعني يصح ولد محترم يمسك ايد بنت في الشارع و يقعدوا مع بعض كده ؟! ده حتي منظرها مش كويس في حقنا !
الام : و انتوا ملكوا !!!؟؟ انتوا عاملين فيها بلطجيه و بتتشطروا علي الواد !
الرجل : مالنا ازاي يا حاجه ؟؟ طب هو فين ابو الواد و احنا نكلمه , عشان الواضح ان هو معرفش لا يربي ابنه و لا يشكم مراته ! اما حرمه ابيحه صحيح , مش مكسوفه من عمايل ابنها لا ده كمان جايه تزعق !!
الابن (بعصبيه ) : احترم نفسك !!
الرجل : يا عم لم امك انت الاول .. الواضح ان الواد طلع مش متربي عشان امه اصلا مش متربيه !
الام ( تنظر الي وشوهم الوحشيه فتري قهر و ذل ليعذبها اكثر , فتقول بضعف و انكسار ) : يلا يا ابني نمشي من هنا .. عالم معندهاش ضمير و لا قلب ..
تأخذ الام ابنها وسط شتيمه و اهانه , و تسنده حتي يبتعدوا عن انظار الجميع ... ثم تكلمه ..
الام (بنبره حازمه ) : و البنت فين دلؤتي ؟؟
الابن (بشكوه و اندفاع ) : يا امي ! انا مش غلطان .. ده هما ..
الام لا تجعله يكمل جملته حتي تضربه هي الاخري بالقلم ! : لا غلطان !! و ستين غلطان ! فاكر نفسك فين عشان تعمل كده ؟!! مفكترش ايه اللي ممكن يحصلك او يحصلها ؟!! محولتش تفكر بعقلك قبل ما تفكر بغريزتك !!
الابن : بس يا امي .. انا حر ! هو انا جت جنبهم ! انا فعلا بحبها و هي بتحبني .. و كنت قاعدين عادي , مش بنعمل حاجه غلط !
الام (ببكاء و حزن ) : يا ابني افهم ! كل اللي كانوا بيضربوك دول اوسخ من الوساخه نفسها ! عقولهم و قلوبهم متعرفش الحب , مضايقين منك عشان قعدت مع زميلتك و هما بيبصوا علي اي واحده بعيون مليانه شهوه و ساديه ! .. بيضربوك عشان شفوك قاعد مع زميلتك في النور , و ولادهم بيمارسوا العاده السريه في حمامات بيوتهم !! بيشتموا الرقصات و هما اول ناس تريل علي افلام الدعاره و الجنس ! عالم منافقه و جبانه .. بيدعوا الفضيله و التقوي و هما من جواهم قذاره و نجاسه ! بس كل ده في الضلمه .. عشان دول اعداء الحياه !!
الابن : بس بابا الله يرحمه كان بيقولوا ان اللي خاف اعمله في نور يبقي مينفعش اعمله في الضلمه و انتي نفسك معلماني ان الضلمه ديه للناس الجبانه !
الام : انا مش بقول لك كده عشان تعمل حاجه في الضلمه ! انا بقول لك كده عشان تفكر تاني مره قبل ما تعمل حاجه في النور ! انت فكرك انهم ضربوك عشان قعدتك مع البنت اذاتهم !؟ .. دول ضربوك عشان يثبتوا لنفسهم ان في حد اقل منهم , عشان يحسوا انهم هما اعلي من حد او انهم نضاف , ضربوك عشان يحسسوك بالنقص !! و انا مش عاوزه ابني يكون ناقص ! انا عاوزه ابني يكون حكيم ... زي ما ابوك سابك انا في اي وقت ممكن اسيبك , .. عاوزه اسيبك و انا مطمنه اني سايبه راجل .. راجل محترم , راجل واعي .. راجل مش بيخاف و لا ينافق , انما راجل مسؤول ! انا مش بقول لك متحبش او متتعاملش مع بنات او بطلب منك تبقي بني ادم معقد زيهم ! .. انما بقول لك راعي المجتمع المتخلف اللي احنا فيه , راعي كميه الجهل و الانحطاط اللي احنا فيه .. و لو مش عشانك , يبقي علي الاقل عشانها
No comments:
Post a Comment