في مكان ما للتصوير في الشارع ... المخرج يكلم مجموعه من الكومبارس ,,,
المخرج (بعصبيه ) : مش معقول يا اخونا !! مشهد واحد في اعلان بقي لنا 3 ساعات بنصوره !!
كيرلس : باشا , معلش سؤال , هو احنا بنجري و بعد كده نضحك ,,,, و لا نضحك و بعد كده نجري ؟؟
المخرج : تعالي هنا يا حبيبي , انت اسمك ايه ؟؟
كيرلس : كيرلس ...
المخرج : تمام , بص يا كيرلس ..للمره المليون و ركز ,, عشان انا مش بحب الغبي ! الاعلان عباره شويه شباب واقفه مستنيه الاتوبيس في المحطه و فجأه يشوفوا بوستر الحمله الانتخابيه بتاع سياده المشير السيسي متلزق علي اتوبيس جاي من بعيد , فيجروا كلهم ناحيه الاتوبيس ده و هما بيضحكواو فرحانين انهم لاقوا اخيرا اتوبيس ,, فيركبوا الاتوبيس و يخلص ام الزفت الاعلان ! مفهوم !؟
كيرلس : اااه , تمام اوي يا باشا , فهمت .. لا خلاص انشالله مش حنعيد تاني
المخرج : اتمني يا كيرلس ,, يلا كله يجهز , امنع صوت .. حنصور ... اكشن
يبدأ التصوير و يروا جميع الكوبارس الاتوبيس فيجروا ناحيته , اما كيرلس فيقف مكانه
المخرج (بعصبيه ) : استوووووووووب !! انت يا بهيمه !! واقف عندك بتعمل ايه ؟!! مش شفت ام البوستر و الاتوبيس ؟!! مش بتجري عليه ليه ؟؟
كيرلس : يا استاذ ! ما الاتوبيس كده كده حيدخل المحطه , اول ما يدخل المحطه حبقي اجري عليه و انا بضحك مش كده ؟!!
المخرج : لا انت مش ممكن !! يا ابني ده رمز ان انتوا اللي بتجروا ورا الاتوبيس ! مش انت واقف و الاتوبيس هو اللي جاي لك !! ده فن ! ابداع , رؤيه .,, و لا تيجي تخرج انتا مكاني احسن ؟!!
كيرلس : العفو يا استاذ , خلاص فهمت انشالله ديه اخر مره ..
المخرج : لما نشوف .. يلا يا ابني ابدأ تصوير .. سكوت حنصور .. اكشن !
يبدأ التصوير .. فيجري كيرلس فورا !
المخرج (باندفاع) : استووووووووووووب !! الحيوان اللي جري !! بتجري علي ايه ؟!!!
كيرلس : يا استاذ ما عشان الحق اركب الاتوبيس ؟؟
المخرج : انهي اتوبيس ؟!! انت شايف اتوبيس ؟
كيرلس : لا , بس ما انا عارف ان هو حيجي ؟؟
المخرج : انت لا يمكن تكون طبيعي يا ابني !! تعالي يا كيرلس يا حبيبي , قرب متخفش , مش حعملك حاجه .. بص يا حبيبي الاتوبيس ده بيرمز للسيسي , و انتوا بترمزوا لشعب مصر , و انتوا محتاسين مش عارفين تعملوا ايه , بس اول ما تشوفوا الاوتبيس اللي هو رمز النجاه بتعاكوا حتركبوه و تضحكوا و يخلص الاعلان ! فهمت يا ابني ؟؟
كيرلس : ياااااااه , تصدق يا استاذ , مكنتش فاهم خالص الموضوع كده , لا خلاص انشالله بجد ديه اخر مره و انشالله مش حنعيد خالص
المخرج : علي البركه .. يلا يا جماعه كله يجهز .. حنصور .. سكوت .... اكشن
يبدأ التصوير , فيبدأ الكوبارس في الجري و لكن وسط الجري , يتوقف كيرلس و يمسك احد الافراد و يقوم بضربه مرددا كلمات : اه يا اخواني يا ارهابي !! عاوز تفجرنا و احنا راحين نركب الاتوبيس !!
المخرج : استووووووووووووووب !! انت ايه ابني ؟!! انا مدرستكش في معهد السنميا ؟؟ انت عاوز مني ايه ؟!!
كيرلس : يا باشا , ما منطقي و احنا بنجري يكون في واحد اخواني لابس قنبله و عاوز يفجرنا و كده , فالشعب حيضربه و كده
المخرج : كيرلس , يا حبيبي .. حد قال لك تعمل حاجه من دماغك !! يا ابني خلينا نخلص ابوس ايدك !! بقي لنا اربع ساعات عشان نصور دقيقه !! كيرلس يا حبيبي انا مش عاوزك تجري و لا حتي تضحك و لا تعمل اي حاجه , غير ان اول ما الاتوبيس يقرب منك تركبه و خلاص .. هل الموضوع ده في اي صعوبه ؟!!
كيرلس : لا خالص
المخرج : تمام !! يلا بقي يا جدعان .. اخر مره .. كله سكوت .. تصوير . اكشن !!
يبدأ التصوير .. يجري الجميع .. و كيرلس يركب الاتوبيس عندما يقترب منه , لا يكاد المخرج يعلن عن الانتهاء من التصوير حتي فجأه ينزل احد الاشخاص من الاتوبيس ..!
المخرج : استوووووووووووووووووووووب !!! مين الحيوان اللي نزل من الاتوبيس ده ؟!!!
اسفنجه ( صديق كيرلس ): ده انا يا استاذ ..
المخرج : و نزلت ليه يا بني ادم , انا قلت حد ينزل بعد ما تركبوا ؟!!
اسفنجه : اصل طلع الاتوبيس مش رايح الحته اللي انا عاوزها
المخرج : نعم يا روح امك ! و انت رايح فين بسلمتك ؟!! مين قالك كده بقي ؟؟
كيرلس : انا يا استاذ , ايه رأيك ؟؟ علي اساس ان في ناس ممكن منتخبش السيسي , واقعيه و كده .... !
يصاب المخرج بانهيار عصبي و يسقط في نوبه شديده من الصرع ..
اسفنجه : تفتكر هو بيعمل كده ليه يلا يا كيرلس ؟؟
كيرلس : مش عارف صدقني يا اسفنجه يا صديكي ,, باين عليه تعب من الاخراج و لا حاجه ... هو اصلا باين عليه من الاول مخرج ضعيف ...
No comments:
Post a Comment