ليه هي مش بتبدأ ؟

سنة 1995 , في كتاب أسمة The Rules, أتذكر ان من أهم قواعد العلاقات العاطفية : " أن البنت المفروض حتي و لو مُعجبة بإي حد تخفي إعجابها ده و تحاول تصعب عليه الدنيا ! فده بيعلي من قيمتها و بيضمن لها وضع أقوي في العلاقة .. أما البنت اللي بتظهر إعجابها ديه هبلة و سهل تنكسر ! "

في مقالة للدكتور Michael Mills , بيشرح ليه البنات في الإغلب مش هما اللي بيبدأوا اي علاقة ؟ .. فالموضوع له أبعاد نفسية موجودة من ايام الإنسان الأول ,, زمان , كانت بداية العلاقة العاطفية بين اي راجل و ست , مش هدفها بس البداية , انما كانت مؤشر مهم شكل العلاقة ديه قدام .. فكل ما كان الراجل قوي و جرئ في بداية العلاقة , ده معناه انه شخص شجاع و مش بيخاف حيقدر يحافظ علي أسرته من مخاطر الغابات و يضمن لها حياة مستقرة .. علي الناحية التانيه الراجل كان بيشوف في الست الخجولة المكسوفة , مثال للشخصية الهادية اللي حتعرف تربي ولادة و متعملهوش مشاكل في البيت !! , و عشان كده بنشوف البنت اللي بتفرح بالراجل اللي بيعمل حركات مجنونه و جريئه في بداية اي علاقة عاطفية ,,, فهي عاوزة الشخص القيادي ده ,, أما هو مش عاوزها كده ! .. 

و ده يوصلنا للسؤال العبثي اللي لازم يتسأل في المواضيع ديه , "هل ترضي أختك تصارح حد بإعجابها قبل ما هو يقولها ؟! , فبالرغم من سطحية السؤال , إلا انه بيلخص نظرة المجتمع للقضية ديه .. و عشان نلاقي الإجابة , خلينا نسأل " ايه الضرر اللي حيعود عليها لو هي اللي بدأت ؟! " , هل الشخص ده حيتعامل مع تصريحها أنه تقليل منها ؟! ممكن , بس ساعتها حيبقي ميستحقش إنسانه مشيت عكس المجتمع عشان تظهر له إعجابها و هو مقدرش الموضوع ده ,, و هنا أختي مخسرتش أنما كسبت لما بعدت عن حد زي ده !! و ممكن برضة يرفض مش عشان هو بيقلل منها او من مشاعرها انما فعلا عشان هو حاسس نفسه مش مناسب ليها او هي مش مناسبة ليه ,, و برضة ساعتها أختي حتبقي هي الكسبانه انها مكملتش في علاقة محتوم عليها بالفشل قبل ما تتعلق بإحلام وهمية ممكن تأذيها في المستقبل ! ,, مش ممكن برضة يوافق و علاقتهم تستمر .. و يكون هو كمان بيبادلها نفس مشاعر الإعجاب و كان مستني الفرصة ,, فنظريا اختي في كل الحالات كسبانه ! ! ففي مقالة للدكتورة Susan K. Whitbourne بتتكلم عن أهمية دور البنت في رسم ملامح علاقتها من البداية ,, فهي شايفه ان البنت اللي بتكون جريئه و شجاعة في بداية علاقتها , بتقدر تحدد شكل علاقة صوتها فيها مسموع و شخصيتها فيها واضحه ,, 

فالموضوع ببساطة , مش دعوة للبنت انها تنزل توزع ورود و دبايب حمرا علي كل ولد هي مُعجبة بيه , و انها تستسهل كلمة بحبك علي لسنها و تبقي عاملة زي اللبانه تقولها للي يستحقها و اللي ميستحقاش ! .. لكن المطلوب مني أني بدل ما أعنف اختي او أخوفها من مصارحة مشاعرها لاي حد , اني أفهمها إزاي توظف مشاعرها ديه و تكون علي قدر كافي من النضوج أنها تتحمل نتيجة أختيارها ! ,, فالحقيقة , أن فعلا في نظرة نمطية متخلفه بتبص علي اي بنت بتبدأ اي علاقة انها بنت مش كويسة او إخلاقها مشكوك فيها ! و ان عشان تغير النظرة ديه محتاج وقت و مجهود كبير و خصوصا عند الست قبل الراجل ! بس الموضوع مش مجرد بداية في علاقة عاطفية و بس , انما بداية في تغير وضع البنت عموما ,, بداية تحيركها من خانة المفعول بيها لخانة الفاعل ! فهي مستنيه حد يقولها بحبك , مستنيه حد يرتبط بيها , مستنيه حد يجيب منها عيال , مستنيه حد يعملها كل حاجة لغايه ما تموت ! ففي وقت من الأوقات لازم تتعلم تبدأ .. و إلا حتفضل طول عمرها مستنيه ..