سنة 1938 , و تحديدا في 30 أكتوبر , الساعة 8 بليل .. علي إذاعة الـ CBS تم إذاعة خبر "غزو سكان المريخ لكوكب الأرض ! " , فاللي حصل بالظبط , ان كان في برنامج موسيقي شغال علي الراديو , اتقطع البث عنه ,, و جيه بداله صوت راجل بيقول : "ايها السادات و السادة , عذرا علي انقطاع البث , و لكنه جاءنا خبر غزو مجموعة من سكان كوكب المريخ علي الأرض و سنوافيكم قريبا بأخر الأخبار " ,, و بعد كده جت مرشات عكسرية , لكن رجع الراجل تاني و المرة ديه فضل يوصف الغزو بتفاصيل اكتر ..
طبعا اغلب اللي بيقرا الكلام ده حيقول , إيه التهريج ده ؟! يعني ايه غزو مريخي علي الأرض ! أكيد محدش حيصدق ! .. لكن اللي حصل ان شريحة كبيرة جدا من سكان أمريكا صدقوا و ابتدوا يتعاملوا انهم فعلا تحت غزو فضائي ,, لدرجة ان في بعض الناس أتجهوا فعلا لموقع المركبة الفضائية اللي شرحها المذيع , عشان يحاربوا الكائنات ديه ! ,, بس ليه ده حصل ؟! ليه الناس مكدبتش الخبر او تخيلت انه ممكن يكون هزار او خبر كاذب ؟؟ ليه الناس فضلت تسمع مين غير ما تفكر تقلب علي اي قناة تانيه تتأكد من صحة الخبر ؟ ليه الرعب و الخوف ده , من مجرد خبر في الأساس كان عبارة رواية خيال علمي للكاتب H.G. Wells ؟!
فحسب عالم النفس Hadley Cantril , اللي كان مسؤول عن تجميع رأي سكان المنطقة في الموضوع ده ,, أكتشف أن في مجموعة من الناس بدل ما تستخدم إدراكها عشان تقيس مصدقية الخبر , لا هما عملوا العكس و سخروا إدراكهم أنه يرسم لهم صدق الخبر !! ففي واحدة قالت له انها اتخنقت من غاز الفضائيين ! و واحد تاني قاله أنه فعلا شاف أثار المركبة و النار اللي طلع منها ! فعنصر مهم لنشر الخوف بين الناس هما الناس نفسهم ! فحتي و لو الخبر كدب او مش منطقي , ممكن إدراك الانسان الشخصي يصور له أنه حقيقي و يبتدي كمان يطوع حواسه أنه تصدقه ! ..
في مقالة للدكتور Robert E. Bartholomew بخصوص الموضوع ده , كتبها سنة 1998 , شرح ان أزاي تصديق الإنسان بيختلف حسب المصدر اللي بينقل له الخبر ,, فلو كان حد في الشارع قال ان في غزو فضائي , مكنش حد حيصدقه , بس ده الراديو , يعني حاجة كبيرة و بيسمعها ناس كتير , يعني لازم يكون ليها مصدقيتها !,, فإكيد هما قطعوا البرنامج الموسيقي و ضربوا مرشات عكسرية عشان الموضوع حقيقي ! لا يمكن بعد كل ده يطلع الكلام ده خيال علمي !؟
في مغالطة في علم المنطق أسمها الـ Cherry picking ( قطف الكريز ) , و زي ما شرحها العالم Richard Crossman , هي أن الواحد لو بيسمع كلام نصه كدب و نصه حقيقة , بيميل أكتر انه يصدقه ,, فمن أهم أساليب نشر الخوف , أنه يكون في نسبة حقيقة .. فالمذيع لما أتكلم عن الغزو الفضائي , قال أسامي امكان حقيقة , أتكلم عن تفاصيل موجودة فعلا , ضاف كلام ناس كتير مصدقاه و عارفه انه حقيقي , فلما نشر الكدب .. الناس تخيلته حقيقي , فتقديم الذعر فن و له أصول !
فلو في حاجة ممكن تأكدها حادثة الغزو الفضائي , هي أن بالأدوات المناسبة و الأساليب المدروسة , سهل جدا تضحك علي مجموعة كبيرة من بشر , سهل جدا ترعب دولة , سهل جدا تصنع الخوف ..
No comments:
Post a Comment