الاسعاف وصلت و الدنيا مقلوبه ... تشكيلات امنيه رفيعه المستوي حوالين المبني ...
كيرلس : و النبي يا باشا ركز , ابوس ايدك
الظابط : يا ابني بطل كلام شويه بقي , مش عارف ابطل القنبله ... قرفت امي ... و سؤال ! هو انت واقف هنا ليه اصلا ؟! .. ما تتنيل تروح اي حته بعيد !!..
كيرلس : يا باشا , ما اصل انا اللي مبلغ عن مكان القنبله , فقلت اوقف معاك و كده , جايز تحتاج حاجه اساعدك ,
الظابط : طب لو حتفضل .. يا ريت مسمعش صوت لغايه ما اخلص , و او لغايه ما خبير المتفجرات يجي
كيرلس (مصدوما ) : ايه ده هو حضرتك مش خبير متفجرات ؟!
الظابط : لا يا سيدي , انا من مباحث السياحه بس كنت قريب من مكان القنبله فقالوا اجي عقبال ما حد من المتفجرات يجي ..
كيرلس : يعني , حضرتك عمرك ما فكيت قنابل قبل كده ؟؟
الظابط : لا طبعا فكيت .. بس مكنتش قنابل بتنفجر
كيرلس : يعني كانت قنابل بتلعب تنس !!
الظابط : يا ابني افهم , فكينا قنابل ايام الكليه بس ده من زمان و كانت قنابل اختبار ... غير ان احنا كان بقي لنا بتاع عشرين سنه مش بنفك قنابل , و فجاءه رجعنا نفك قنابل كل يوم , فده اللي عامل المشكله .. ان لسه محتاجين نسخن عشان نرجع تاني بخبره زمان , زي لعيب الكره اللي يكون بقي له فتره منزلش ملعب , فهمت بقي ؟
كيرلس : لا تمام يا باشا , و انشالله محتاجين كام قنبله كده عشان تسخنوا بيهم ؟؟
الظابط : لا .. احنا خلاص الحمد الله رجعنا زي الاول و اقوي كمان , اطمن يا ابني الشرطه المصرييه مش حتسمح باي اذي لاي مواطن مصري ..
يدخل عليهم فجأه رجل مرتدي اسود في اسود و نضاره سوده ..
الرجل : سلامو عليكوا , هو فين القنبله ؟؟؟
كيرلس : الباشا الكبير وصل !! عمنا و عم الناس , اهي القنبله يا باشا ..
الرجل : هو كل اللمبات كانت منوره من الاول ؟؟
الظابط : اه يا باشا .. بس في لمبه كانت بترعش , دلؤتي ثبتت
الرجل : طب جربت تشيل السلك و ترجعه تاني
كيرلس (مقاطعا) : هو معلش يا باشا , انا ليه حاسس ان حضرتك بتتكلم عن راوتر مش قنبله !! هو مش حضرتك خبير متفجرات و لا خدمه عملاء تي اي داتا !
الرجل : لا انا مش خبير متفجارات , انا مباحث اتصالات عقبال ما يجي خبير المتفجرات
كيرلس : احيه !! هي مصر كلها مفهاش غير خبير متفجرات واحد !! , ايه المصيبه ديه !
الظابط : اهدي يا ابني .. اكيد الباشا عنده حل !! طب يا باشا دلؤتي في سلكين واحد علي اليمين لونه احمر و التاني علي الشمال لونه اسود , اشيل انهي ؟؟
الخبير : اتكل علي الله و شيل اللي علي اليمين , خلينا من اهل اليمين
كيرلس : استنا يا عم !! هو خبير المتفجرات ده جاي و لا مش جاي في يومكوا ده !!
فجاءه يدخل رجل مرتدي بدله و تبدو علي ملامحه الصرامه و الحزم ..
الرجل : فين القنبله ...
كيرلس : تحيا مصر يا باشا و الشرطه و الشعب ايد واحده !! فينك من بدري يا كبير ؟! اهي القنبله
الرجل : تمام , لفوها لي باي حاجه و طلعوهالي بره
كيرلس (ضاحكا ) : ههه هو حضرتك من مباحث الاداب و لا ايه ؟؟
وسط صمت رهيب ..
كيرلس : هو حضرتك شرطه اداب بجد !!!؟
الرجل : ايوه , في حاجه تضحك يعني !
كيرلس : لا خالص يا باشا , مفيش اي ديك ام مشكله !! بس انا شايف ان انا اعرف افك القنبله .. احنا حضرتك حنفتح القنبله من عند الاريل و نشيل الشريحه اللي تحت البطريه بملقاط و نربط الاسلاك ببعض و بعد كده نقفل بغرزتين عشان القطع يلم بسرعه
الرجل : ايه الهبل ده !! هو انت بتفهم في المتفجرات ؟!! و لا انت ايه اصلا ؟؟
كيرلس : لا يا باشا انا طالب طب جيت عقبال ما خبير المتفجرات يجي ,,و اهو بزيط زيكوا يعني جت عليا , ده علي الاقل لو فشلت , القنبله لوحدها حتموت , بس لو حضرتكوا فشلتوا , ده احنا كلنا حنموت ..
No comments:
Post a Comment