انا اسمي ماجد .. شاب عندي 16 سنه .. اتعرضت اول امبارح لحادثه كانت السبب اني حعيش طول عمري علي كرسي متحرك .. لسوء حظي ولدي متوفي و امي هي اللي بتصرف علينا انا و اخواتي التلاته .. اللي بيضايقني ان ولدتي بتنزل الشغل كل يوم تركب الاتوبيسات و تمشي في الشوارع بالساعات , بتتعرض لاهانات و القرف في الشوارع عشان تجب لنا اللقمه اللي بناكلها , و بترجع بعد يوم متعب تحضر لنا الاكل , نقعد ناكل بس هي بتفضل تفترج علينا لاحسن الاكل يخلص قبل ما نشبع , فبتاكل اللي بيفضل مننا .. بحس ان عنيها بتعيط من غير دموع كل ما تشوف ابنها الكبير مشلول عايش علي كرسي ... , و ساعتها بيكون نفسي اجري عليها و اخدها في حضني و اقولها انا اسف .. اسف علي الذل و القهر اللي بتشوفيه كل يوم عشان خاطري انا و اخواتي , اسف علي اللي كل اهانه او الم بتمري بيه يا امي .. اسف علي وجودي في حياتك التعسه ! .. و في النهايه احب اشكر كل واحد اتعاطف معايا و مع اسرتي , بالرغم من اننا شخصيات وهميه , شخصيات اصلا ملهاش وجود .. مجرد افرازات فكريه لكاتب معقد , كئيب , قرر انه يرسم حياتي كده .. قرر يخليني اعمل حادثه و قرر انه يموت لي ابويا .. قرر ان امي تتعب و تشوف القرف بعنيها كل يوم .. و الغريب ان لسه في ناس بتكمل قرايه .! يا جماعه انا شخصيه وهميه اصلا ! مفيش حاجه اسمها ماجد و لا ام ماجد و لا اي حاجه ... انا مش موجود اصلا .. انا فكره يا اخوانا , فكره مش عارفه هي فين اصلا , و لا عارفه هي حتروح فين , فكره ملهاش حق في اختيار وجودها .. متشغلوش بالكوا بفكره وسط بلاين الافكار , يلا يا جماعه انسوا اي حاجه قريتوها .. انا و لا حاجــــــــــــــه , انا فارغ ! .. لا ... بالعكس ! ده انا كل حاجه .. ايوه كل حاجه , بصوا... انا اسمي ماجد , شاب عندي 16 سنه .. اتعرضت اول امبارح لحادثه كنت متخيل انها حتكون السبب اني حعيش طول عمري علي كرسي متحرك , بس قمت بعدها باسبوع و وقفت علي رجلي .. ده بالعكس الراجل اللي عمل لي الحادثه هو اللي عالجني علي حسابه و قرر يشغلني عنده في شركته بمرتب مغري كمان .. و بالرغم ان والدي متوفي , بس مرتبي كان بيصرف علي البيت و بيفيض .. بعد سنه اترقيت و بقي مرتبي 3 اضعاف , اخواتي دخلتهم مدارس خاصه و امي جبت لها عرابيه بسواق مع انها مش بتنزل خالص , بس عشان لو حبت تروح اي نادي او موول تلاقي اللي يوصلها , و بعد 5 سنين اتجوزت بنت صاحب الشركه و بقيت من اغني شباب رجال الاعمال .! ... شوفتوا بقي انا كل حاجه ازاي .. انا بجره قلم اقدر اكون سوبر مان و بجره قلم تانيه اقدر اعيش في اجدع جزيره فيكي يا كره ارضيه ... شويه حبر و لا شويه موجات كهربائيه خلوني من حقير لامير , عايش في عالم اكون فيه اللي انا عاوزه , في الوقت اللي انا عاوزه ... بحبها , حجيبها لغايه عندي و اخليها كمان تقولي انها مش قادره تعيش من غيري ... عاوز اضربه , حجيبه لغايه عندي و اخليه يضرب نفسه و انا واقف بضحك و انا برمي عليه قشر اللب , عاوز جايزه نوبل , عاوز كاس العالم , عاوز نسخه من لوحه الموناليزا , كله في ثواني يكون عندي ... عاوز فلوس حبقي صاحب بنك .. عاوز جنس , حوصل لقمه الشهوه في دقايق .. عاوز انتقم , مفيش اسهل من كده .. عاوز انتحر , بسيطه , كله موجود , كله بمزاجي .. ملك مطلق لجمهوريه ذاتي , الكلمه كلمتي و السلطه في ايدي انا بس ! .. الا حاجه واحده , حاجه واحده مش قادر اعملها ... اني أهرب .. مش قادر أهرب !!! انا عاوز اهرب برا الزمن , برا الامكان , برا نفسي . مش عارف !! انا محبوس جوا , و مش عارف اخرج , و طول ما انا موجود , انا محبوس .. عندي كل حاجه , بس في الاخر محبوس ... اجري من الصين لفرنسا , برضه محبوس ... اسهر في لاس فيجاس لتاني يوم , برضه محبوس .. انا مش مشلول , و لا ابويا ميت و لا امي بتتذل و لا اي حاجه .. انا كل مشكلتي .. اني محبوس ... فالحقيقه , ان انا اسمي ماجد , محسن , شكري , جعفر , مهما كان اسمي , مهما كان سني , مهما كنت فين او امتي , مهما كان حصل لي او حيحصلي .. مهما كان وجودي ايه ... عمري ما حعرف اهرب عشان عمري ما حعرف مبقاش موجود .. كل اللي بعمله اني بحسن ظروف حبسي , بحط زينه علي حيطان الزنزانه , بركب سماعات موسيقي في ممر السجن ... و اهو بستمع بالحبس مدام مش عارف اهرب .. فاستمتعوا انتوا كمان .... عشان عمرنا ما حنعرف نهرب !
No comments:
Post a Comment