شريف داخل مصلحة حكومية عشان يخلص شوية أوراق , الموظف المسؤول قاعد يتلكع و يستهبل و مش راضي يخلص الشُغل , و لما شريف بيقوله ينجز عشان شريف عنده شغل عاوز يلحقه , الموظف بيرد " يعني هي فارقه معاك يا باشا لو مروحتش شغلك انهارده , انتا شاكلك مرتاح و مش فارقه معاك مرتب شغلك أصلا ! " .. علطول بيستنتج شريف أن الموظف ده "مُعقد " بعقدة النقص !
نورهان خالتها جايب لها عريس , العريس ده ابن ناس و شكله كويس ومستقبله مستقر , بس كل ما يقعد مع نورهان يبتدي يتكلم معاها عند قد ايه هو ندمان في حياته ! و ان هو مر بتجربه عاطفيه فاشله خلته يخسر خطييبته اللي قبل كده .. و حواراته بتدور حوالين الخوف و القلق المستمر من فشل علاقته بنورهان .. و اللي بتخلي نورهان تستنج ان العريس ده مش طبيعي و "مُعقد " بعُقدة الذنب !
الموضوع بيتدي في لما عالم النفس سيجموند فرويد بيحاول يفسر هو و العبقري كارل يونج سلوكيات البشر الغير طبيعيه .. و اللي بتبتدي بشاب مراهق بيحب أمه بشكل مفرط جدا , لدرجه أنه ممكن يشتهي أمه ! و يغير عليها من أبوه !! ,, و من هنا طلعت "عُقدة أوديب " , و طلع مصطلح العقُدة النفسية ... مع مرور الأيام يونج و فرويد بيبتدوا يختلفوا في نقطة تفسير العُقد , ففرويد مُصمم ان الرغبة الجنسيه هي العامل الأساسي في العُقد و يونج مقتنع ان الموضوع أعمق من كده .. و فعلا يونج بينفرد و يطلع نظريته الخاصه في العُقد و يسميها analytical psychology (علم النفس التحليلي )
خلينا نقول , ان الحكايه عامله زي حبل جديد مفرود و سليم .. طول ما هو سليم , حيكون ربطه سهل و فكه بسيط .. المشكله , لو حد تطوع و عمل "عُقدة " في الحبل ده ,, هنا حيكون اي تعامل مع الحبل حيكون في صعوبه و تعب ... و ده بالظبط اللي بيحصل في لاوعي الأنسان .. لما التجارب اللي بيمر بيها , بتُقعد تلف و تربط في حبل نفسه ,, و يبقي أنسان " معقد " , مش سهل التعامل معاه وفق الادراك البسيط و الواقع المألوف ,, .. فالعقُده النفسيه مش مرض , أنما مجرد تشوه في سلوك الفرد ده .. بتخليه يفهم المواضيع اللي حواليه بشكل مُشوه و يتفاعل معاها برضه بشكل مُشوه ..
عبء العُقدة النفسية , مش بيقع علي الشخص المُعقد , أنما علي اللي حواليه .. فالموظف المُعقد اللي بيعطل شريف , و العريس المُعقد اللي بيأذي نورهان , و غيرهم من ضحايا التجارب النفسية المضطربه اللي بيكونوا في وضع مسؤوليه او أتخاذ قرار ,, ممكن هما نفسهم يكونوا تجربه نفسيه مضُره للي بيتعاملوا معاهم .. و تجربه تعقد لهم حبلهم السليم , و تخليه مليان عُقد زيهم ! و عشان كده المجتمعات المتخلفه نفسيا بتنتج أجيال مُعقدة ..
في النهايه , لازم ندرك ان مفيش حد فينا ممرش بتجربة نفسيه – و لو حتي واحده - مأثرتش فيه و عملت له علي الأقل حتة عقُده صغيره , مفيش حد فينا عايش وسط الكم الهائل ده من الحبال المعقدة , و لسه قادر يحافظ علي حبله مفرود سليم !! عشان ده مش طبيعي ,, .. أنما الطبيعي أن الواحد يفهم أزاي يتعامل مع مشاكله , ازاي يتصالح مع نفسه , ازاي يحاول يرجع حبله سليم مهما كان مليان عُقد .. فمش مطلوب منه أبدا يصنف او يعالج اللي حواليه أنما يشوف نفسه هو الأول ... فقبل ما تتريق علي حبل أخوك اللي فيه عُقده , شوف حبلك اللي مليان ضفاير ..!
No comments:
Post a Comment