ماجد و هو ماشي مع خطيبته غاده , في عيال سيس قالوا كلام مش لطيف , ماجد اتنرفز من جواه بس معملش حاجه عشان الموضوع ميطورش لحاجه أخطر , بس بعد ما العيال ديه مشيت بعشر دقايق , غاده حسيت ان ماجد متعصب عليها من غير مبرر و بيفتعل اي حاجه عشان يزعق و خلاص ...!
مروه خارجه مع سمير جوزها يتعشوا برا , و هما برا جيه لسمير تليفون من المدير بيزعق فيه و بيهدده انه حيرفده من الشغل , سمير بعد ما خلص المكالمه مع المدير , تعابير وشه اتغيرت مع مروه و فجأه كده بقي يتلكك لها علي اي حاجه ... !
سنه 2011 , الدكاتره Jennifer K. Bosson و Joseph A. Vandello عملوا تجربه غريبه شويه , و هي انهم جابوا شويه رجاله و قسموهم مجموعتين , مجموعه اطلب منها تتضفر حبل , و مجموعه اطلب منها تتضفر شعر بنت !! , بعد ما كل مجموعه خلصت , خيروا الرجاله ديه يحبوا يعملوا ايه بعد ما نفذوا الطلب , هل يلعبوا puzzle و لا يضربوا في بوكسره ملاكمه ؟! و كانت النتيجه , ان الرجاله اللي أتطلب منها تضفر الحبل اختارت الـ puzzle اما اللي ضفروا شعر البنات اختاروه الملاكمه ! و الملاحظه انهم كانوا بيضربوا البوكسره بعنف و شده !! .. و اللي فسره الدكاتره انه manhood-restoring tactic ...
ببساطه اللي حصل في التجربه , ان العلماء قسموا الرجاله لمجموعه تحافظ علي ذكوريتها و ديه اللي ضفرت الحبل , و مجموعه تانيه اتسلبت منهم ذكوريتهم (حسب اعتقادهم ) , اطلب منهم انه يعملوا نشاط نسائي و هو تضفير الشعر ! .. و يشوفوا ايه اللي ممكن يحصل , و اللي خلانا نوصل لاكتشاف مهم , و هو , ان نسبه كبيره من الرجاله لما تحس ان ذكوريتها تحت التهديد , بتزيد درجه عنفهم و شدتهم ,,,
في تجربه Jennifer K. Bosson و Joseph A. Vandello, الذكوره اتهددت لما الرجاله عملوا انشطه متسجله في دماغهم انها بتاعه ستات , و ان مجرد تنفذها ده بيجردهم من كونهم رجاله !! و عشان كده ممكن نلاقي الرجاله اللي ترفض تساعد في شغل البيت او حتي تعمل اي حاجه معروفه اجتماعيا انها للستات !! و المبرر الوحيد هو ان فعلهم ده بيهدد كيانهم كرجاله !! ... في المثلين اللي في الأول بتوع ماجد و سمير , مطلبش من الرجاله ديه انها تعمل اي نشاط نسائي و مع كده ذكوريتهم كانت محل تهديد ..
ساعات الراجل بيتخيل ان لما يتزعق فيه او يتقلل من قدره قدام مراته او خطيبته او حتي اي حد , ان كده مبقاش راجل !! .. او بمعني اصح عاجز انه يحافظ علي رجولته !! .. فبدوره عشان يحاول يسترجع المكانه اللي كان فيها , او يبرهن للشخص اللي شافه في وضع العاجز ده , يروح يبقي أعنف , اشرس , و لو وصلت يقل أدبه أو يهين اللي قدامه !! كده هو بيتخيل انه بصوته العالي او ترهيبه للاخرين انه رجع راجل تاني .. و ده طبعا مش حقيقي ..
الفكره في الموضوع ده , ان كونك راجل في مجتمع بيتمارس عليك ضغط و بتهدد ذكوريتك كل يوم .. لازم تبقي واعي انتا بتحاول تعمل راجل علي مين ؟! مراتك , خطيبتك , ولادك , الناس ديه ملهاش ذنب أنك عايش في رعب و خوف علي ذكوريتك و رجولتك .. انما حاول تكون راجل بجد و توجه غضبك علي اللي سبب لك الغضب من الأساس ... أما انتي لو زوجه , خطيبه , بنت .. لراجل عصبي او عنيف بيعاني من الضغط المستمر , مش حقولك استحملي او تعالي علي نفسك فوق طاقتك , انما حقولك حاولي بقدر الامكان تتعاملي معاه زي اي شخص مريض .. بعين الشفقه و المساعده .. مريض .. بذكوريته المهدده ..!
No comments:
Post a Comment