أحمد مسك أبنه (8 سنين ) و نزل فيه ضرب و شتيمه ,, و كل ده عشان وقع الطبق و هو بياكل .. بعد ما الموضوع خلص و أبنه دخل اوضته يعيط , سوسن مرات أحمد راحت تقوله انه شد علي الواد من غير لزمه و كبر الموضوع علي الفاضي .. أحمد قالها انه بيعمل كده عشان يربي الواد و يخليه يركز أكتر .. عمل كده لمصلحه الواد في الأول !! .. بس من جواه , أحمد عارف انه غلط , و فعلا مصدق الكلام اللي قالته سوسن ,, بس في صوت غريب في دماغه بيبرر له اللي هو عمله , و بيقوله انتا صح .. الصوت ده هو الـ Self-justification
ساعات كتير بنكون عارفين اننا غلط , و متأكدين اننا خدنا القرار المش مظبوط .. و مع كده بنفضل نعاد و نبرر أختياراتنا و مواقفنا .. بنفضل نقنع نفسنا اننا عملنا الموضوع الفلاني للسبب ما , اننا قلنا الكلمه ديه لهدف أسمي , و المدهش اننا بنقتنع في الأخر ..طب ليه و ازاي ؟؟
الموضوع بيبتدي لما الأنسان يحس أنه علي أعتاب الـ Cognitive dissonance (الأدراك الغير منسجم ) , بمعني انه يحس ان مبادئه الأخلاقيه اللي هو متربي عليها مش منسجمه مع تصرفاته و سلوكه الحالي ,,, و المشكله تتأزم أكتر لما يكون مش عارف يغير مبادئه عشان تمشي مع تصرفاته , او تصرفاته عشان تمشي مع مبادئه .. فيكون عامل زي اللي بيتلكك كده , و يحاول يعيد تفسير مبادئه بشكل ملتوي عشان تليق مع تصرفاته .. أحمد عارف ان الأب اللي بيزعق لأبنه عشان حاجه تافهه زي ديه ده أب تافه , عارف ان ضرب الطفل غلط , عارف انه اتعصب و خرج عن طبيعته , عاف انه مكنش صح في الموقف ده ! بس حيقدر يعيش أزاي بالغلط ده ؟؟ .. و عشان كده عقله بيقوله أطمن , انتا مغلطتش ..
نظريا , الـ Self-justification معمول عشان خاطر الأنسان ميفضلش يفكر في كل موقف حس انه غلط فيه و مش عارف يغيره , او يفضل محبوس كتير في ذنب تأنيب الضمير و مش قادر يخرج برا الإطار ده .. بس للأسف ساعات كتير الـ Self-justification بيزيد عن حده و يخلي الأنسان يوصل لمرحله انه بيبرر كل تصرفاته او سلوكه حسب مزاجه , و يعيش وهم انه بلا خطأ و انه الصح المطلق .. و ده طبعا بيخليه يخسر ناس كتير , مش قادرين يتعايشوا مع واحد معندوش الجرأه انه يعترف بغلطه .. دايما بيرمي العبء يا علي الظروف يا علي اللي حواليه ..
في قصه أحمد و أبنه , المشكله كانت لما أحمد قعد مع نفسه و أبتدي من نقطه " أنا كنت صح ليه ؟!! " مش " هما كانوا شايفيني غلط ليه ؟؟! " .. و هو ده أساس الكارثه !! .. أن الأنسان لما بيجي يحاول يحل مصيبه الادراك الغير منسجم الـ Cognitive dissonance , بيفضل يدور لنفسه علي أسباب تحاول تثبت له انه صح , مش أسباب تنفي عنه انه كان غلط .. يبقي عامل زي قضيه , القاضي فيها هو هو المتهم في نفس الوقت ,, فكره العدل و الأنصاف في القضيه اللي زي ديه تكاد تكون مستحيله .. !! فببساطه , لو حسيت انك عمال تبرر كل موقف بتمر بيه او تدافع عن نفسك قبل ما تحاول تدرك وجهه نظر اللي حواليك .. لو حسيت ان اللي حواليك مش قادرين يفهموا عبقرية تصرفاتك او روعه تفكيرك ! .. لو حسيت انك بقي لك كتير صح و مش بتغلط !! أعرف انك واقع في الـ Self-justification ...
No comments:
Post a Comment