الSexual Misperception

كتير اوي , بنشوف الشاب اللي بيتخيل ان البنت مادام ضحكت له يبقي هي عاوزه توصله رساله اعجاب , مادام بتتكلم معاه كتير يبقي هي واقعه في غرامه , ده ساعات بيتخيل انها بتحبه عشان لف وشه لقها بتبص عليه !! .. كلنا عندنا اصحابنا او حتي ساعات احنا نفسنا بنوهم ذاتنا ان في بنت معينه مُعجبه بينا او مركزه مع وجودنا لمجرد حاجات احنا خلقنها في دماعنا , و نبتدي نترجم تصرفتها و حركتها علي مزاجنا عشان نقنع نفسنا بالإعجاب المزيف ده .. بس نكتشف مع الوقت ان الكلام ده مش حقيقي و أنه مجرد sexual misperception ..

سنه 2003 , عالم النفس النرويجي Mons Bendixen , عمل دراسه عشان يفسر ليه الشباب بيقع فريسه للـ sexual misperception , و الصراحه طلع بتفسيرين : 

1- الـ Error-management theory : ديه معتمده علي الـ Evolutionary Psychology (علم النفس التطوري ) , بيقولك زمان الراجل البدائي كان لازم يركز مع كل ست يقابلها , عشان الست ديه كانت بالنسبه له الطريقه اللي حيتكاثر من خلالها و يورث موصفاته الجينيه من خلال أطفالها .. فعشان يقول لنفسه انه عنده قبول و لو بسيط عند الست ديه , كان بيقنع ذاته ان في إعجاب متبادل بينهم , لمجرد انه يلاقي اي طريقه عشان يتقدم للأنثي ديه و يحصل التزاوج بينهم 

2- الـ Social-roles theory : و ديه معتمده علي علم النفسي الأجتماعي , بيقولك ان نظرا , ان السائد في المجتمعات هو الفكر الذكوري , فده بيخلي الراجل حاسس بنرجسيه و زهو علي الفاضي , بمعني ان الراجل عنده غرور غير منطقي لقدراته و مواهبه , و بيتخيل ان الست هي اللي المفروض تعجب و تندهش بالقدرات ديه .. و ان ازاي يكون قدامها حد بالموصفات العبقريه اللي عنده و هي متعجبش بيه ؟!! .. و عشان كده بيوهم نفسه دايما ان هو دايما مطمع للستات اللي حواليه !! 

العالم Mons Bendixen , موقفش عند النقطه ديه و بس , أنما فسر ليه مش العكس , يعني ليه الست مش بتتوهم كتير زي الراجل , يعني ليه الانثي لو راجل ضحك لها او أتكلم معاها لفترات طويله مترجمش ده لإعجاب ؟؟! .. نرجع تاني للـ Evolutionary Psychology و نقول ان الأنثي عندها underperceive sexual interest , بمعني انها بتحاول بقدر الإمكان تقلل فكره أهتمامها او تركزها مع الإعجاب ده ,, و السبب هو ان التكاثر للمرأه مش سهل او بسيط اوي زي ما للراجل ,, التكاثر بالنسبه لها حمل و ولاده و تعب و عبء تربيه .. و عشان كده هي مش عاوزه اي ذكر يخصبها و خلاص , لا ديه بتحاول تركز اوي عشان تختار صح و تجيب أطفال كويسه .. 

فأخيرا و ليس أخراً , لو انتا شاب متخيل أن في بنت ما معجبه بيك او مهتمه بوجودك في حياتها , فالأول أتأكد انك مش واقع تحت تأثير الـ sexual misperception , اه طبعا لو البنت مُعجبه حتحاول تظهر او توضح بطريقه ذكيه , بس انتا متبقاش زي الجردل و تدلع علطول علي أي حاجه .. يؤسفني اقولك انك لو بعت لها Friend request و هي عملت confirm ده مش معناه انها عاوزه تتجوزك و تكمل بقيه حياتها معاك !! .. بالنسبه للبنت , معلش طبعا انتي أكيد مُحاطه بشباب كتير ضحايا للـ sexual misperception , و انتي في خيالهم خطيبتهم و مراتهم المستقبليه و حلم عمرهم و الكلام ده .. فمعلش حاولي تشفقي بالمراهقين دول و متعلقيهومش أكتر من كده .. طبعا انتي ملكيش ذنب ان الذكر بطبعه مخلوق عبيط و أهبل , بس حيبقي شيئ كويس جدا و أنشالله يكتب لك في ميزان حسناتك , لو كنتي صريحه في كلامك و حاده في تصرفاتك مع الكائن الذكر ..