مسألتش نفسك , ليه العذاب في الاخره بالنار ؟! ليه مثلا مش بالكهربا او الغاز السام , او يمكن مثلا عذاب بالبروده ؟؟! طب مش فكره ان العذاب الابدي في حد ذاتها حتخلق حاله من الملل , يعني واحد يفضل يتعذب للابد اكيد حيتعود في وقت من الاوقات و يفقد العذاب قيمته ؟! طب رحمه ربنا فين في متعه التعيذيب ؟! فين الهدف من خلق انسان ثم تعذيبه ؟؟ و بعد الموت اصلا وعي الانسان حينتهي بانتهاء عقله ؟ طب فين اساسا ادراك العذاب و الانسان حيكون من غير عقل يدرك بيه اي حاجه ؟!
و اسئله كتير و كتير بخصوص موضوع نهايه الحياه و العذاب ملهاش اجابات واضحه و منطقيه..
خلينا نمسك الموضوع من الثوابت .. يمكن الثابت الوحيد في قضيه الموت , هي ان حياه الانسان بتنهي , و المعني البيولوجي لانتهاء حياه الانسان هو موت عقل الانسان و موت فكره وجوده العقلي و ادراكه لذاته ... الاختلاف او وجهات النظر كلها بتبتدي بعد ما الانسان يموت ؟! ايه بقي اللي بيحصل ؟!! في رأي بيؤمن بالحياه بعد الموت , و رأي مؤمن بانتهاء الحياه و فناء الانسان .. و يمكن نقطه الاختلاف نابعه من الايمان بوجود ما يسمي بروح الانسان اللي بتفضل موجوده بعد انتهاء جسده ! بحيث ان روح الانسان بتبتدي تحرر من الجسد البشري و تبقي الكيان الوحيد المعبر عن الشخص ذاته ...
مبدأيا حسب الاديان , ان روح كل انسان موجوده معاه في حياته , يعني الانسان مش مجرد جسد بس لأ ده روح , و زي ما في احتياجات للجسد من اكل و شرب و جنس , في احتياجات للروح من روحنيات و سلام ذاتي و تأمل .. و ساعات بتتنافي احتياجات الروح مع احتياجات الجسد لدرجه الصراع ... و علي الاساس ده يتولد فكره الاختيار الانساني , بين متطلبات الجسد و متطلبات الروح , مثل بسيط للتقريب الجسد عاوز جنس مجرد او شهوه سيطره جسديه , الروح عاوزه محبه و سمو مشاعر .. بمعني ابسط برضه , ان الجسد مايل للنظره الارضيه للحياه من سعاه دنيويه ممكن تسيطر علي الانسان , اما الروح مايل لفكره تهذيب الجسد حتي و لو بتلجيم الجسد عشان مفيش اي حاجه ارضيه تسيطر علي الانسان ..
و بموت الجسد , مش بيبقي للانسان غير روحه , يا اما انسان روحه شبعانه بالقوه و المحبه , او انسان روحه مستعبده و سجينه شهوات الجسد .. و في وجهه نظري ان الجحيم او العذاب الابدي مش بيكون انتقام ألهي من الانسان , قد ما هو اختيار الانسان نفسه لمصيره .. انا مؤمن ان بعد الموت مفيش ملايكه واقفه علي بوابه حتدخل ارواح الناس جنه او نار حسب ديانتها , او حسب افكارها و لا حتي حسب اعمالها , انما حسب اختيار الناس ديه للوضع اللي هي عاوزه تكون فيه , فلنفترض واحد عاوز يروح يعيش في مكان جميل جدا , بس مليان تلوث مثلا بس هو قرر انه يتحمل اعباء التلوث في سبيل المكان الجميل , و عشان كده الحريه دايما مصحوبه بمسؤوليه .. في موضعنا انسان قرر انه يعيش حسب الجسد و يتعامل من منطلق اشباع الفطره الجسديه اللي جواه حتي لو انغمس في كل ما هو دنيوي من كدب او قتل او كُره .. او واحد قرر ان هو يكون عبد لرذيله معينه , او واحد متعته في الاغتصاب و تعذيب الاخر , كل ده هو حر يختار طريق حياته , بس هل واحد زي ده يتقارن علي المستوي الروحي بواحد بيغفر لللي بيضره , او واحد بيراعي مشاعر الاخرين حتي لو اذوءه , واحد عايش فقط لاسعاد الاخرين و بيضحي بمتعته الارضيه في سبيل مبادئ عايش بيها , ففي رائي الشخصي البحت , ان السعاده الروحيه هي ارقي انواع سعاده ممكن الانسان يوصلها و ان الفقر الروحي حتي لو الانسان بيشبع كل غرائزه بطريقه كامله اصعب انواع الجحيم !! اه الجحيم !! رائي ان الجحيم مش بيبتدي بعد الموت , بس انا شايف ان الاصح انه بيستكمل بعد الموت !! انت ممكن تكون مؤمن باي دين , او بتعمل كل الطقوس الدينيه او بتقرا كل الكتب اللي في الدنيا , بس لو عندك كل ده و معندكش علاقه روحيه مع الكمال الجوهري للاخلاق المتمثله في الله , علاقه قايمه علي المحبه و السلام , علاقه قايمه علي سعاده و الرجاء , علاقه قايمه علي الاخلاص المطلق مش مجرد لمنفعه او مصلحه مؤقته , علاقه قايمه انك في منظومه انسانيه واحده قايمه علي الاخوه و العدل بين البشر , للاسف لو معندكش العلاقه ديه انت عايش في جحيم من وجهة نظري ..
يمكن انا مجوبتش علي كل الاسئله اللي تطرحتها ؟؟؟ عشان الاهم من ان الواحد يعرف اصل الحياه اللي بعد الموت , انه يعرف اصلا ااصل الحياه اللي قبل الموت ,
و في رائي ان سواء جنه او جحيم ... هما مجرد امتداد لاختيارات الانسان ... بين انسان اختار يكون عبد لجسده و انسان قرر يرفض اي عبوديه و يعذي روحه بالمحبه و القيم ...
"فان الجحيم شيئ تحمله معك و ليس مكان تذهب اليه "
( نيل جايمان )
No comments:
Post a Comment