الـ Erotomania او اسمها التاني de Clérambault's syndrome , نسبة لعالم النفس الفرنسي Gaëtan Gatian de Clérambault , اللي يعتبر أول واحد أتكلم عن الموضوع ده بأستفاضه و شرح ,, الـ Erotomania هي حاله مرضيه بتكون موجوده في مرضي الـ schizophrenia و الـ bipolar mania بتيجي في شكل توهمات حب للمريض , بمعني انه بيحس ان في حبيب سري بيحاول يبص له نظرات حب , يحاول يقرب ليه , يحاول ينقله رسايل خفيه انه بيحبه , حتي و لو كان الشخص ده متعاملش معاه قبل كده !! .. بمعني ان المريض بيعمل قصه حب من الوهم و يعيشها و يتفاعل معاها ...
الـ Erotomania بيختلف تماما عن حاجه اسمها الـ Obsessive love , و اللي بتكون في ناس طبيعيه مش مريضه , ناس بتكون حساسه زياده عن اللزوم في علاقتها العاطفيه ,, أقل كلمه او همسه تفرق معاهم و يفسروها بمسميات ضخمه ,, بيكون الرفض او الانفصال في علاقتهم عاطفيه حاجه مأسويه من الدرجه الاولي ... و ممكن يوصلهم لمراحل بعيده في الاكتئاب و الأحباط ... ,, و برضه يختلف عن الـ Relationship obsessive–compulsive disorder و ديه حاله الخوف او القلق من الدخول في اي علاقه سواء عاطفيه او غير عاطفيه ,, بمعني ان اللي عنده الـ Relationship obsessive–compulsive disorder بيكون مرعوب من المسؤوليه او الخطأ اللي ممكن يحصل لو دخل اي علاقه , ده مش بيكون حساس لاي نظره اعجاب , لأ ده بيرفضها من الاساس عشان خايف لتطور او تتحول لاكبر من مجرد نظره ...
بس هو ليه في تقسيمات و انحرفات و امراض كتير بتدور علي فكره الحب او العلاقه العاطفيه ؟؟؟ ...
الانسان بطبعه مخلوق عاطفي و اجتماعي , بيحاول يكون صداقات و علاقات كتير عشان يقدر يعييش و يحس بقيمته كفرد في مجتمع ,, و اللي أجمل من انه يحب هو انه يتحب .. أنه يحس ان في حد تاني مهتم بيه او حاسس بوجوده ,, كل ده بيخلي الانسان بطبيعته بيدور علي الحب ده , و لو الحب ده مش موجود حيبتدي يختلقه و لو من عدم ! .. حيبتدي يفسر سلوك الناس علي مزاجه , يبتدي يسمع الكلمات بدماغه , يبتدي يعيش اوهام و قصص عشان يروي الحرمان العاطفي اللي عنده ,, و كل ده عشان يثبت لنفسه انه مرغوب فيه او محبوب ...
طبعا مش اي حد يفهم اعجاب حد ليه بالغلط او يتخيل ان في رساله مقصوده ليه و هي في الاساس مش حقيقيه يبقي مريض نفسي موهوم او عنده Erotomania .. الموضوع اشبه بمكالمات التليفون , مفيش اي مشكله لو طلبت نمره و طلعت غلط , عادي جدا ده ميتنقصش من كرامتك او نظرتك لذاتك , بكل احترام و أدب حتقفل الخط و ترجع تكمل حياتك عادي بتحاول تتصل بالنمره الصح .. الغلط او النقصان من الذات هو انك تستمر في المكالمه الغلط و تصمم انها النمره الصح !! .. بعد ما يكون اللي بيكلمك قالك النمره الغلط مرات كتير قبل كده !! .... و ساعتها حتبقي ضيعت وقتك و مجهودك علي نمره غلط ...
No comments:
Post a Comment