سنه 1990 , خرج علينا عالم النفس المشهور Daniel Kahneman بنظريه مهمه في علم النفس الاقتصادي بتقول ,, ان الانسان بيفضل ميخسرش علي انه يكسب ... بمعني ان التفكير في الخساره بالنسبه للأنسان أشد و أقوي تأثير عن التفكير في المكسب ... و أتسمي الموضوع ده بالـ loss aversion
.. فلنفترض ان في أكله حلوه جدا قدام حد بيعمل رجيم , الأكله الحلوه ديه حتسبب له متعه دلؤتي (هو ده المكسب ) , بس حتسبب له قدام ألم زي انه ينحرف عن الرجيم (هي ديه الخساره ) ,,, اللي بيحصل ان الانسان الطبيعي حيختار انه يضحي بالمتعه اللحظيه ديه في مقابل انه ميخسرش قدام , فيختار انه ميكسرش الرجيم ... أومال ليه ساعات كتير بنشوف ناس عامله رجيم , و بتكسره و بتختار المكسب اللحظي ده ؟؟ .. السبب ببساطه ان الناس ديه مش قادرين يدركوا المعني الحقيقي للخساره ,, عشان لو حسوا فعلا الألم اللي حيصاحب قرارهم ده , عمرهم ما حيكملوا في الطريق الغلط .. عمرهم ما حيمشوا ضد الـ loss aversion ,
مثل الرجيم ده , مجرد مثل ساذج جدا و بسيط .. بس الـ loss aversion له تطبيقات كبيره جدا و واسعه جدا في كل مجالات السلوك الانساني , اولها السلوك الاقتصادي للشخص , و هو ده اللي أتكلم عليه العالم Daniel Kahneman بالأخص ,,, نظريا , في حاجه في علم الاقتصاد السيكولوجي أسمها الـ Sunk costs او ( التكلفه الغارقه ) , و اللي قايمه علي اساس الـ loss aversion , ببساطه التكلفه الغارقه ديه , هي انك تشتري سلعه و تكتشف انها مش عجباك , بس تستمر في الاستفاده منها لمجرد انك مش عاوز تحس بالخساره منها , يعني .. تشتري تذكره سينما لفيلم معين , و تدخل الفيلم تكتشف انه سيئ جدا .. هنا الـ loss aversion يشتغل و يجبرك انك تقعد تكمل الفيلم , عشان متحسش بينك و بين نفسك ان انتا اتضحك عليك او انك خسران ,,, الـ loss aversion برضه موجود في التطبيقات الاجتماعيه في الحياه , كتير اوي بناخد قرارات مصيريه علي اساس اننا منخسرش حتي و لو في احتماليه اننا نكسب في المستقبل ,, و ده اللي يأكد لنا ان السائد في النفس البشريه انها ضد المغامره .. ده اللي بيفسر برضه فكره "اللي نعرفه أحسن من اللي منعرفوش " .. و ده اللي يفسر لنا ليه الانسان بطبعه مستعد يعيش من غير اي مكسب علي انه ميخسرش اللحظه اللي تحت رجله ديه !! و ده للاسف سلوك لا بيقدم و لا بينفع .. سلوك كارهه لاي تغير !
الـ loss aversion , له تطبيق مهم في حياه الانسان العاطفيه .. كتير اوي , بنشوف السلوك البشري , اللي بيتعامل مع الحياه العاطفيه من وجهه نظر دفاعيه انغلاقيه بحته ... و يبقي الانسان مستعد انه ميستمعش بحياه عاطفيه ممكن تكون في غايه الجمال و الروعه , لمجرد انه خايف ان العلاقه ديه تسبب له اي نوع من انواع الألم ( خساره ) , سواء ألم الرفض من الاساس , او ألم الفراق في المستقبل .. الـ loss aversion حاجه مهمه جدا لكل انسان , و نظام حمايه نفسي محترم أوي , بس للأسف في ظل الحمايه ديه , في حاجات كتير اوي بتضيع علي الانسان .. لمجرد أنه بيكون مطلوب منه انه يجازف شويه او يصدق أكتر بالمكسب اللي في المستقبل , بس التفكير في الخساره بيعميه و بيعيشه طول عمره فريسه لوحش الخوف من المجهول ...
No comments:
Post a Comment