الحب الأول

" عند اللقاء الأول ،،

لا تستمع لأي أغنية ، 

ولا تضع أي عطر ،

وإياك أن تحب المكان كثيرا ، ولا تسأل عن السبب... " .... نزار قباني 

سنه 2009 , في جريدة The Guardian كتبت المُفكره Amelia Hill مقالة بعنوان " Why we can never recover from first love " و كانت بتكلم فيها عن أسباب صعوبه نسيان الحب الأول .. الكاتبة Amelia Hill ذكرت أن حالة الهيام الخيالي و الـ euphoria اللي بيكون فيها اي حد بيحب لأول مره , هي اللي بتخلي من تجربة الحب الأولي تجربة مميزه و لا يمكن نسيانها .. و خصوصا ان غالبا أول علاقه حب بتم في فتره الشباب و المراهقه و اللي بيكون فيها عقل الأنسان لسه حالم و متفائل , لسه متصدمش بمشاكل و كوارث الواقع ... حتي معاير أختياره لشريك حياته - الي حد ما - بتكون قايمه علي صورة عاطفيه أكتر منها صوره عمليه .. بمعني انه لا فارق معاه شريك حياته مستقبله ايه و لا معاه فلوس قد ايه و لا حيبقي ايه و لا كل الحاجات اللي بتقيد و بتعقد الحب بتاع الكبار ده , أنما بيكون مجرد أنسان مشاعره أتحركت تجاه حد , فقرر يمشي ببساطه تجاه المشاعر ديه .. 

في كتابه “A General Theory of Love " وضح عالم النفس Thomas Lewis , ان صعوبه نسيان الحب الأول بيكون لسبب هرموني كيمائي أكتر منه لسبب عاطفي حسي .. فالموضوع بيبتدي لما الانسان يقع في غرام حد و يبتدي يفرز كميات كبيره من هرمونات معينه بتدي الأنسان شعور رائع و ممتع , فأول مره يحس بيها الأنسان بلذه تدفق الهرمونات ديه بتكون زي علامه فارقه في حياته .. المصيبه بتيجي لما يخسر الشخص اللي بيحبه ده و مترجعش تتدفق الهرمونات ديه بالكميات الكافيه .. و اللي للأسف لما يرجع يدخل في علاقه عاطفيه تانيه و ترجع تطلع تاني , مش بتكون بنفس تأثيرها الأول .. و يعيش الأنسان في وهم أنه عاوز يقارن اي علاقه حب يدخلها بنفس علاقته الأولي .. 

في حاجه في عقل الأنسان أسمها الـ Flashbulb memory , و هي نوع من انواع الذكريات شديده التفاصيل ! و اللي بتحصل في حالات كتير من اهمها حالات الحب , يعني في أغلب لقاءاتك مع الشخص اللب تحبه , انت مش مجرد بتشكل ذاكره عابره زي اي ميعاد تاني , لأ ده انتا بتبقي في قمه تركيزك في تكوين الذاكره ,, و السبب ان الموقف ده بيسبب له شعور عظيم , بتكون عاوز تسجله كده في مخك , عشان تبقي ترجعه لما تبقي لوحدك براحتك ,, كأنك بتسجله بكاميرا الموبيل , بس هنا بكاميرا عقلك .. بتسجل كل نظره , كل ضحكه , كل تفصيله ده ساعات بتوصل للـ perfume بتاع حد كان قاعد جنبكوا !! .. 

نظريات كتير و تفسيرات ملهاش حصر , عن صعوبه نسيان الحب الأول , و قد ايه هو قوي و مؤثر في حياة الانسان بعد كده ,, و بالرغم ان في ناس بتاخده بنوع من انواع الاستهزاء و التقليل من قيمته , و ناس كتير بتتعامل مع الحب الأول كتجربه او انه تسليه لوقت فراغ ! , إلا انه ممكن يسبب صدمه نفسيه و ألم مزمن للناس ديه ,, و يعيش الشخص بعد كده و يدخل في كذا علاقه بعده , بس يفضل الحب الأول عامل زي الجرح في ذاكرته مش راضي يخف ... فقدسوا شويه الحب الأول ..