الLearned Helplessness

سنه 1965 , عالم السيكولوجي Martin Seligman عمل تجربه غريبه شويه , التجربه كانت عباره عن انه يجيب كذا كلب و يحطهم في صندوق كبير , و يبتدي يرن جرس , بس أول ما الكلاب تسمع الجرس يروح علطول مكهربهم ... طبعا كل يحاولوا يهربوا ميعرفوش عشان كان رابطهم و الصندوق مقفول عليهم .. ! المهم , أستمر علي الموضوع ده حبه , يرن الجرس و يكهرب الكلاب ,,, لكن بعد فتره جيه عند الصندوق و عمل زي فتحه كده عشان الكلاب تهرب منها و فك الرباط اللي كان رابطهم .. و ابتدي يرن الجرس علي اساس انهم يربطوا الجرس بالكهربا و يهربوا ! بس محصلش كده و فضلوا مكانهم .. فابتدي يكهربهم علطول , بس المفاجأه انهم برضه منطوش !!! ,, انما فضلوا يستحملوا الكهربا من غير اي محاوله هروب .. !!! , و من هنا ظهر مصطلح الـ Learned Helplessness او (العجز المُكتسب ) 

علي المستوي البيولوجي , لما الأنسان بيبتدي يتعرض لضغوط في هرمون أسمه serotonin يبتدي يطلع عشان يواجه الضغط ده فيهدي الانسان ,, و مع كل مره الضغط يزيد , الهرمون ده بيقعد يتفرز بكميات أكبر , لغايه ما يوصل لمرحله انه كتير اوي بس مش عارف يقوم بشغله او يسيطر علي الوضع الخارجي اللي فيه الأنسان ,, و الحاله ديه بتتسمي الـ conditioned defeat (الهزيمه المشروطه ) .. 

الأسطوره بتقول , ان لما الأنسان يكون في ظروف صعبه مسببه له ضغط او ألم , بيحاول بكل الطُرق انه يغير الظروف ديه , و انه يناضل عشان يكون في حاله أفضل ,, أنما الحقيقه ان ساعات الأنسان لما يتعرض فترات طويله لظروف الصعبه ممكن يكتسب صفات اليأس و اللامباله و العجز ! و يكون قراره الأخير هو الاستسلام للوضع الحالي بدل ما يفضل يبذل مجهود أكتر علي ظروف عمرها ما حتتغير ,, طبعا مش كل البشر بتوصل للـ Learned Helplessness بنفس القدر او نفس السرعه , أنما في مؤشرات و صفات شخصيه بتفرق بين كل شخص و تاني ,, أنما اللي ثابت و مؤكد , ان كل انسان مُعرض في اي وقت انه يكون ضحيه للـ Learned Helplessness 

الـ Learned Helplessness موجود في طفل لسه صغير , كل ما يجي يحل مسأله حساب ميعرفش و كل اصحابه و المدرسين يفضلوا يترقوا عليه , فيوصل لنتيجه انه فاشل و عمره ما حيعرف يحل مسائل حساب تاني ,,, الـ Learned Helplessness موجود في بنت شابه كل ما تيجي تسوق العرابيه تغلط او كل ما تيجي تركن تبقي متعرفش و كل الشارع يتفرج عليها , فتوصل لنتيجه انها عاجزه عن السواقه و انها عمره ما حتعرف تسوق ابدا ,, الـ Learned Helplessness موجود في راجل عنده 39 سنه , كل ما يدخل في علاقه عاطفيه يفشل و يجرب ألم الفراق لغايه ما وصل لنتيجه أنه عمره ما حعرف يحب خلاص ,, الـ Learned Helplessness موجود في شعوب كل ما تنادي بالتغير تتصد و كل ما تجرب فرصتها في مستقبل أفضل تفشل , لغايه ما تستلم لواقع ان مفيش حل أو و مفيش فايده , لواقع انها شعوب عاجزه في الأساس عمرها ما حتبقي أحسن .. 

بالمناسبه في تجربه Martin Seligman , بعد خلاص أتأكد ان الكلاب مش حتحاول تغير من حالتها او حتي تفكر انها تهرب او تنُط , Martin Seligman جاب كلاب جديده متعرضتش للكهربا قبل كده , و حطهم في نفس الصندوق .. و اول ما ابتدي يكهربهم نطوا علطول !! .. و كان تفسيره ببساطه ان الكلاب الجديده مكنتش لسه داقت معني اليأس او العجز , مكنتش لسه عقولهم و افكارهم اتشوهت و صورت لهم ان الأستسلام للظروف هو الحل الوحيد .. مكنوش لسه وصلوا للـ Learned Helplessness