الإكتئاب Vs. الكوميديا

تخليدا لذكري رحيل النجم الرائع Robin Williams , و اللي كان يوم 11-8-2014 , حبه شباب عملوا علي التوتير hashtag أسمه#TheWorstPartOfDepressionIs ( أسوء شيء في الاكتئاب هو .. ) عشان يتكلموا عن الاكتئاب و اخطاره , و طبعا من غير اي اندهاش سجل الـ hashtag ده أعلي المشاركات و التعليقات .. 

ناس كتير بتتخيل ان الشخص المكتئب لازم يبقي حزين او مضايق , شخص مش بيكلم حد او بيضحك , شخص طول الوقت بيعيط و بيشكي ... بالرغم ان في مكتئبين كتير عايشين وسطينا و بيضحكوا و يهزروا عادي .. ده بالعكس علماء النفس اكتشفوا ان أغلب ممثلين الكوميدي بيعانوا من اكتئاب مزمن ! فحسب Jamie Masada صاحب مسرح الـ Laugh Factory و اللي يعتبر أضخم مسرح كوميدي في أمريكا قال قبل كده في تصريح : ان حوالي 80% من الممثلين الكوميديين جايين من ظروف صعبه جدا و ان أغلبهم بيتابع مع عيادات نفسيه بشكل دوري ... ,,, بس ايه علاقه الكومديا بالاكتئاب ؟؟ , الحقيقه ان في تفسيرات كتير للموضوع ده : 

1- الكوميديا و السخريه يعتبروا من أهم أليات الدفاع النفسي اللي بيلجأ ليها الانسان المُحبط .. لو كانت الظروف اللي حواليه زي الوحش المفترس , بيحاول يتريق عليها و يسخف من قدرها .. في الكوميديا بيكسر التابوهات و يخرج عن المألوف .. Samuel Janus عالم نفس أمريكي كتب في مجله TIME مقال سنه 1978 بيفسر ان ليه أغلب نجوم الكوميديا في امريكا في الوقت ده كانوا يهود ؟؟ و كان تفسيره ان اليهود اكتر فئه اتعرضت لضيق و ظلم في الحرب العالميه التانيه و عشان كده كان رد الفعل هو السخريه .. 

2- الكوميديا بتخلي من صاحبها محط انظار الكُل , و في أغلب حالات الأكتئاب بيكون المطلوب هو شويه أهتمام .. فالمكتئب بيكون جعان لاي حد يركز معاه و يتفاعل مع مشاكله .. و عشان بيضحك الناس .. اللي بتكون عاوزه تسمعه اكتر , فتهتم اكتر .. فيستريح هو و يضحكوا هما ..

3- قبل كده سألوا Robin Williams عن سبب وجود الكومديا بين الناس المكتئبين , فكان رده : "ان أتعس الناس يحاولون بأقصي ما عندهم لجعل الأخرين يفرحون , لأنهم يشعرون بصدق كيف ان تكون تعيس و بلا قيمه , فذلك الشعور المؤلم لا يريدوا ان يجربه أحد " .. ساعات الشخص اللي عمال يضحك الناس و يهزر بالرغم من حزنه و يأسه بيكون دافعه الوحيد هو انه ميخليش حد يمر باللي هو مر بيه ..

4- ليه دايما بنفكر ان الأكتئاب بيوصل للكوميديا , مش الكوميديا اللي بتوصل للأكتئاب ؟؟ الـ Smile mask syndrome , عالم النفس الياباني Makoto Natsume أكتشف ان في ستات كتير من اللي بيشتغلوا في مجال الـتسويق و العروض , و اللي بيكون مطلوب منهم يضحكوا و يهزروا مع الزباين أغلب الوقت , الستات ديه بتتعرض أكتر للأكتئاب و الاحباط .. و السبب انهم ساعات كتير بيكونوا مجربين يضحكوا و يبتسموا غصب عنهم عشان خاطر شغلهم و أكل عيشهم , فبيحبسوا مشاعرهم الحقيقيه و يدفنوه لغايه ما تتراكم و تكون علي وشك الانفجار !

في نظريات كتير و تفسيرات كتير بتحاول تربط بين الكوميديا و الأكتئاب , بس مهما أختلفوا في سبب العلاقه الحقيقه بيتفقوا في المضمون , و هو ان مش كل واحد بيضحكك او بيخليك مبسوط , يبقي شرط انه يكون سعيد او فرحان في حياته .. أنما ساعات كتير بيخفي اسرار و خبايا من حياته المؤلمه التعيسه ورا قناع المهرج الكوميدي .. , و يبقي أسوء شيئ في الاكتئاب هو انك متقدرش تشوفه او تلمسه في عين المكتئب .. بالرغم انه بيكون بيتقطع من جواه بسكاكين الهموم و التعب , بيغلي في أتون الوحده و العزله , بيتخنق تدريجيا في بهدوء و صمت .. لغايه ما يموت في النهايه علي ايد ضحكته ...