عدت 9 ساعات , كله بيدور علي قسطره مان , و للأسف مفيش حد من النواب الصوبر هيروز قادر يعرف مكانه ,,
نورهان : ايه الاخبار يا شباب , حد لقي قسطره مان ؟؟
ندي : احنا قلبنا الدنيا , بس ملوش أثر !
بدر : انا عندي اقتراح , إيه رأيكوا نستعين بـ consent مان ؟!
الجميع في ذهول !!
جوجو : بس هو consent مان حيرضي يساعدنا ؟!!
بيبو : و ميساعدناش ليه ؟!
جوجو : أصل انتا متعرفش consent مان ! ده مفيش حاجه ميعرفهاش , ده أسطوره الأبطال الخارقين .. ده أجمد صوبر هيرو في الدمرداش !!
نورهان (بجديه ) : خلاص , حد يتصل بـ consent مان , يقوله حنقابله في خلال ربع ساعه ..
بعد ربع ساعه , في قسم 12 باطنه .. كل الصوبر هيروز قاعدين مستنين الـ consent مان ,,, فجأه بيدخل رجل غامض الشكل , مرتدي نضاره شمس زي بتاعة السيسي .. من غير لا سلام و لا كلام ... بيشد كرسي و يقعد بكل تقل و ثقه في النفس ...
شريف مجاهد : يا نعم ؟! عاوزين ايه المره ديه ؟!
نورهان : مكان قسطره مان ..
شريف : قسطره مان بقي في الماضي , انتوا بتدورا علي الشخص الغلط
بدر : اومال ايه اللي بيحصل في العيانين بتوع المستشفي ده ؟!
شريف : مين فيكوا بيتادين مان ؟؟
بيبو : أنا ... محمد علي , انا اصلا نايب كلي , بس حاليا موجود في قسم باطني 2 , لكن ..
شريف (مقاطعه ) : بس , بس !! انتا حتصحبني ؟! ,, المهم المطلوب من الليله ديه التنكيل ببيتادين مان ,
بيبو : بس , انا معنديش عدواه مع حد
شريف : مش شرط يكون ليك عدواه , يكفي انك الـ most junior ,,, اللي عامل القلق ده كله هو الـ seniors بتوع كل قسم ... من زمان , و هو في زي تراث ان لازم الـنايب الـ senior يعذب النايب الـ junior , يعقده , يكرهه في حياته , و لما الـ junior يكبر و يبقي senior بيطلع عين الـ junior اللي تحتيه , هي ماشيه كده و مش بتخلص !
بيبو : حتي و لو علي حساب المريض ؟!
شريف : انتا هندي يا ابني ؟! اخر حاجه بنفكر فيها هنا هي المريض ! و اوعي تتخيل ان عشان عندك قوه خراقه او انتا مميز في حاجه , ده حيفرق معاهم في حاجه , بالعكس ده يخليهم يكسورا فيك أكتر ! .. علي العموم , انا كده عملت معاكوا الواجب و زياده , شوفوا انتوا بقي حتعملوا ايه .. بس نصيحه لو قررتوا تقفوا قدام الـ senior , ابقوا خدوا معاكوا ABG وومان , شريهان بتاعه 5 باطني !
بيمشي consent مان في هدوء ,, و يسيب الصوبر هيروز قاعدين مع بعض , بيفكروا حيعملوا إيه ..
بيبو : انا شايف يا اخوانا ان مهما عملنا , عمرنا ما حنقدر نوقف قدام الـ seniors .. و معلش دوشتكوا معايا في حوار انتوا ملكوش دعوه بيه ..
ندي (بحماس) : لأ ! لينا دعوه يا بيتادين مان ! انهارده بيتشطروا عليك , بكرا حيتشطروا عليا , و بعده علي قطن مان , و بعده علي جوجو ,, مش حيسبونا غير لما يحطمونا و يقتلوا اي قوه خارقه فينا
جوجو (مقاطعا ) : بس انا معنديش قوه خارقه
ندي : لأ , اكيد عندك , بس انتا مش عارف ! دور جوا ذاتك , حتلاقي في حاجه انتا مميز بيها عن باقي الناس , حاجه بتكرر معاك في نايبتك مش بتحصل مع باقي النواب .. و ثق انك مختلف
جوجو : مممم , انا أكتر نايب بيتسرق منه موبيلاته .. فين القوه الخارقه في كده ؟؟
ندي : شوفت , مش قلت لك !! ديه , قوه خارقه مهمه جدا ,, بس مش حنستخدمها دلؤتي .. المهم , اللي عاوزه اقوله بعيد عن جوجو , ان اننا لازم نتحرك و بسرعه ,,
بيبو (بنظره حائره , يتجه لنورهان ) : حنقدر يا نورهان ؟
نورهان (مبتسمه ) : و لو مقدرناش , يبقي مخسرناش شرف المحاوله , يا .. بيتادين مان .. !!.
<<<< to be continued
No comments:
Post a Comment