الVictim Identity

نهال في كلية طب , كل ما تقعد ما صحبتها رانيا تفضل تشتكي لها عن الدراسه الصعبه و ان ازاي هي حتضيع في الامتحانات و المستقبل الاسود اللي في انتظارها ... لدرجه ان رانيا بقت تتخنق من نهال و شكوتها اللي مش بتخلص !! 

عاصم بيشتغل في بنك و متجوز و حياته مستقره , بس كل ما يقعد ما نادر صاحبه يفضل يشكي له عن الحياه الصعبه و الظروف المنيله اللي هو فيها .... نادر بيكون حيتجنن , هو عاصم بيشتكي من ايه !! 

الـ Victim Identity , أغلبنا لو مكنش كلنا , نعرف علي الأقل واحد من بين اصحابنا او اقرايبنا عنده الـ Victim Identity .. الشخص اللي كل ما يقعد معانا يسود في الدنيا في وشنا , الشخص اللي مش عاجبه حاجه و حاسس دايما انه مقهور و مظلوم .. في نظريا سيكولوجيه كتير بتفسر سلوك الـ Victim Identity , بس أهم دافعين ورا الـ Victim Identity :

1- الـ attention seeking behavior : الشخص اللي بيحب دايما بعيش في دور الضحيه المظلومه , بيكون انسان باحث عن الاهتمام , انسان حاسس بحاجه شديده جواه ان الناس تلفت ليه و تركز معاه .. حتي و لو مش محتاج مساعده فعليه , هو محتاج يشوف الناس بتواسيه و بتطبطب عليه , عاوز يحس بقيمته علي مستوي أعلي .. 

2- تقليل التوقعات : خلينا نقول ان شوقي بيشتكي دايما من صعوبه الحياه بالرغم انها زي الفل معاه , بس لو فعلا الحياه بقت لسبب ما صعبه و سوده في وش شوقي , يبقي شوقي مدي لنفسه زي تأهيل نفسي قوي عشان يواجهه الصعوبه ديه , و هنا تبقي الـ Victim Identity وسيله دفاعيه بالنسبه لشوقي .. أما لو الحياه فضلت زي ما هي كويسه , يبقي شوقي مخسرش حاجه و اهي ماشيه 

علم النفس بيقولك , ان انتا لو بتعاني من الـ Victim Identity , و ليل نهار عمال تشتكي و تعيط علي حالك , فانتا بتاعني من انحراف نفسي مش كويس , ممكن يخسرك حاجات كتير .. مشكله الـ Victim Identity انه سلوك ممكن الانسان يدمنه , و يبقي بيشتكي لا ارادي , لدرجه انه ممكن يكون سامع خبر مفرح , و بيشتكي ! خارج من فرح لواحد صاحبه و حاسس انه متضايق ! .. و يتحول لكتله بارده من الكائبه و الحزن , يعيش وهم الضحيه علي الفاضي و المليان .. و الوهم ده حيخسره ذاته قبل ما يخسره اللي حواليه , هو مش يقدر يستمتع باي حاجه في حياته , و اللي حواليه مش حيقدروا يستحملوا شكوته المستمره و حالته البائسه اللي هو مصمم يخلقها لنفسه ! ... أما لو ليك صديق بيعاني من الـ Victim Identity , فحاول بقدر الامكان متقلقش من شكوته او ألمه , بس بلاش تشجعه علي شعور الضحيه الدائم ده !.. بلاش تخليه هو اللي يسحبك للسواد اللي هو اللي عايشه , انما حاول بكلامك الواضح و منطقك العقلاني تسحبه للواقع اللي كلنا عايشين فيه ,,, الـ Victim Identity سلوك مصغر من وهم نفسي مشهور في امراض الفصام أسمه Persecution delusion , و اللي بيتخيل فيه مريض الفصام انه بيتعرض لمؤامره كوينه من كل الناس عشان تضطهده و تعذبه ! الـ Victim Identity مش بيوصل للمرحله ديه , بس مزجع برضه , .. فلوسمحت متستهنيش بالـ Victim Identity ..