ثانية واحدة !! يعني انا عاوز امارس الجنس مع واحدة .. ده يبقي غلط و مش مسموح في الدين ؟!! و في نفس الوقت لو قررنا انا و نفس الواحدة نتجوز حسب الدين ده ,ساعتها يبقي مسموح و مش غلط !! فالكلمتين اللي قالهم رجل الدين , سواء شيخ او قسيس !! هما اللي خلوا للجنس ده معني تاني , هما اللي خلوه كويس و حلال ؟!! ففي المرة الأولي اللذة الجنسية ضد مشيئة الله ! اما في المرة التانية نفس اللذة الجنسية بقت مع مشيئة الله ؟!!! ده بقى بإي منطق !؟
فالحقيقة , إن اللي خلي لللذة الجنسية معني مختلف في المرتين , مش مجرد الكلمات اللي قالها راجل الدين , أنما فكرة الرباط الروحي اللي اتربطوا بيه الشخصيين دول , فلو قال مليون شيخ او قسيس كلام و الرباط الروحي ده مش موجود , يبقي مفيش اي فرق !! ... فانا مش حمارس الجنس عشان لذتي المجردة , عشان رغبة بحته جوايا اني عاوز امارسه و خلاص ! ,, لا انا حمارسه بعد علاقة تفاهم و حب موصلاني اني عاوز اندمج جسديا مع الشخص ده , عاوز انا و هو نكون مبسوطين , يكون في إتحاد نفسي , روحي , جسدي بيني و بينه ! ..
عشان الموضوع يبقي أسهل برضة , خليني اقول اني بحب الأيس كريم ,, و بالمناسبة انا ممكن اعيش طول عمري من غير ما اكل ايس كريم و عادي يعني ! فالأيس كريم مش ضروري للحياة , بس انا بحبه !! و مش عيب ابدا اني اجيب أيس كريم و افضل استمتع مع كل لحظة و طعمة بيدوب في بوءي , ده مش عيب و لا غلط !! انما لازم في كل مرة استمتع بالايس كريم أدرك ان المستفيد الوحيد هو انا , انا و بس !!! ,,, بعد فترة اتعرفت علي واحدة حبيتها اوي , و عرفت انها بتحب الايس كريم زيي , روحنا احنا الاتنين و جبنا ايس كريم و كلناه مع بعض ,, فبالرغم من اني باكل الايس كريم زي المرة الاولي , بس هنا لذتي مش بطعم الايس كريم , قد ما لذتي بوجودي مع حبيتي بنشارك بعض اللحظة ديه .. فهنا اللذة مش بتنتهى بانتهاء الايس كريم , لكن حتعيش عشان تكبر في علاقتي مع حبيبتي !!
في الجزء الأول من البوست ده https://www.facebook.com/
مشكلتي مع اللذات الحسية – و دية مشكلة من وجهة نظري الشخصية – أنها لذات قايمة علي الصب في الأنا الشخصي , بمعني انها معتمدة علي منفعة فردية بحتة !! فأنا عاوز لنفسي .. أنا حعمل لنفسي .. أنا حستمتع لنفسي .. أنا و بس ! ده ميقلش من كونها لذات مهمة و ضرورية لناس كتير , بس انا بطمح لنوع اعلي من اللذات .. نوع بيعيش في اللي بنحبهم , في اللي مستعدين نضحي عشان خاطرهم , نوع له بُعد روحي سامي قادر يصمد قدام اي شهوة مؤقتة او نزوة عابرة .. نوع مستمر و حي !
في النهاية , حختم بقصة كانت بتتقال لي زمان , عن كلب و نسر مربوطين بسلسلة في إشارة عن علاقة جسد الإنسان بروحه , .. فالكلب لو أكل و شبع حياخد النسر و ينزل بيه الارض , اما النسر لو هو اللي كل , حيقوي و حيقدر يطير الكلب معاه .. ففي النهاية القوي هو اللي بيشد التاني ناحيته ... و قرار دايما في ايد الإنسان ..
No comments:
Post a Comment