في مذكرات أعز اصدقاء القائد النازي هتلر August Kubizek , و اللي اتسجلت في كتاب Adolf Hitler, My Childhood Friend .. تم ذكر أول قصه حب في حياه هتلر مع Stefanie Rabatsch ... , و اللي بدأت لما هتلر كان عنده 16 سنه .. و زي اي قصه حب , بتبدأ بنظره , هتلر أول ما شاف إستيفان , بقي مش علي بعضه و صورتها اتحفرت في مخه .. لدرجه انه فضل يتابعها من بعيد و تبقي قمه سعادته لما يشوف ضحكتها .. كان بصفه يوميه يحكي لصديقه August Kubizek عن قد ايه هو واقع في غرامهاو عاوز يقضي باقي عمره معاها .. و لما كان صديقه ينصحه انه لازم يصارحها بحبه ليها , كان بيرد عليه "بكره حيحصل " , و بكره ده مكنش بيجي أبدا ... و فضل الحال علي ده لمده اربع سنين !! أربع سنين هتلر الشاب بيشوف إستيفان و مش قادر يقولها "بحبك " .. لدرجه ان إستيفان نفسها بعد سنين طويله قالت انها مكنتش تعرف ان هتلر كان بيحبها كل الحب ده .. و كانت نتيجه سكوت هتلر و خوفه من المواجهه ان إستيفان عاشت حياتها بعيده عنه و هو الوحيد اللي اتعذب بالفراق .. بس السؤال هنا ... لو ليه هتلر عمل كده ؟؟ ليه ضحي بكل الحب و العشق ده عشان ميقولش كلمه ؟؟ كلمه يمكن لو كانت اتقالت في وقتها المناسب , كانت فرقت معاه كتير ... ؟
في اي قصه حب .. في الأول بيكون الإعجاب .. و بعد كده بيكون التفكير .. و بعد كده بيجي الاختيار , و اللي علي اساسه خلاص العقل ياما بيرفض فلان , او يحط فلان ان هو الشخص المناسب للحب ده .. من هنا بتبدي تتبني الاوهام الورديه و التخيلات الرومانسيه.. بتتبني أحلام و طموحات ان فلان ده خلاص حيبقي معايا و مش حيسبني .. و كل الحاجات الحلوه الجميله اللي كلنا عارفينها , و اللي للأسف مجرد افرازات فكريه في عقل العاشق بيختلقها عشان يزود شعور العاطفه و الهيام تجاه الفلان ده و يستمتع و يتلذذ بالعلاقه الرومانسيه ديه ... المشكله كلها ان بالرغم من كل القصص و الافلام ديه ! لسه قصه الحب ديه موصلتش لفلان نفسه عشان يقرر دوره فيها حيكون ايه !!.. و هنا بقي بيبتدي الألم و التوتر و الخوف من المواجهه .. طب مش يمكن فلان يرفض حبي ؟! طب مش يمكن فلان ميكونش قادر يحبني زي ما بحبه ؟! طب مش يمكن فلان يكون السبب ان كل الاحلام و الخيالات و الاوهام الحلوه اللي انا عايشها مع نفسي تتهد و تضيع !!!؟؟؟؟
ببساطه , هتلر زيه زي كتير اوي بيدفعوا تمن حبهم .. جُبن من المواجهه و خوف من المجهول .. بيختاروا يعيشوا في وهم هما عاملينه و مبسوطين , بدل ما الحقيقه تصحيهم علي واقع مؤلم من غير حبيبهم ..... و يبقي بالرغم من انه بيحبها .. و واثق ان حبه ده مش مجرد نزوه او إعجاب .. يكون مش قادر يقول لها .. " بحبك " ...
No comments:
Post a Comment