ماجد انهارده في الشغل اتدلق علي بنطلونه طحينه , و بالصدفه نورهان البنت اللي هو معجب بيها , شافته و فضلت تتضحك علي منظره .. ماجد روح البيت و بقي لوحده بس فكره ان نورهان فضلت تتضحك عليه مش قادره تسيبه ! القصه ديه مسيطره عليه بشكل غبي , و مع انه بيحاول ينساها او يشغل نفسه في حاجه تانيه ! بس الفكره مش راضيه تختفي !
شروق راحت حفله عيد ميلاد صاحبتها , بس عماله طول الحفله تفكر "هو انا قفلت باب الشقه كويس " ..شروق كل شويه تحاول تبطل تفكر في الموضوع ده , بس الفكره ديه مش راضيه تسيبها في حالها .. و كل ما تحاول تبعدها , ترجع اقوي من الأول !!
علم نفسك بيقولك , ان ساعات كتير بتحس ان عقلك ضدك ! و انه ساعات كتير بتكون عاوز تخرج افكار كتير من دماغك و هو مش راضي يساعدك ! ده بالعكس , ساعات الافكار اللي انتا عاوزها تخرج , هو بيثبتها اكتر .. و السبب هو الـ Ironic process theory او أسمها التاني white bear problem (مشكله الدب الابيض ) , و اللي أتسمت كده نسبه لجمله مشهوره في مقال للكاتب الروسي دوستافسكي , و اللي بتقول "حاول تدي لنفسك مهمه , و هي انك متفكرش في صوره دب ابيض .. و المفأجاه انك حتلاقيك كل ثانيه عمال تفكر فيه ! "
و بعد حوالي قرن , من مقال دوستافسكي , علماء النفس قدروا يفسروا ليه عقل الانسان بيرخم علي صاحبه بالطريقه ديه ؟! .. و اللي استمت بنظريه المهزله او الـ ironic !! و اللي الصراحه أسم علي مسمي ! .. حسب عالم النفس Daniel Wegner .. الانسان لما بيدي امر لعقله انه ينسي حاجه .. العقل ينفذ و فعلا بنسي الحاجه , المشكله كلها في الخطوه اللي جايه ! و هي انه عشان يتاكد انه نسيها فعلا بيدور عليها عشان يشوفها لسه موجوده و لا فين اختفت ! فبترجع تاني في الوعي !!! .. فبيقرر ينسيها بصوره أشد .. بس بعد شويه بيحب يتأكد هو فعلا نسيها و لا لأ !!! فبترجع تاني !! و هكذا !! .. و عشان كده نصحيه علماء النفس ليك , هي انك متجبرش مخك انه ينسي الحاجه و متقلقش هو حينساها لوحده .. بس بلاش تضغط عليه و تحمله فوق طاقته , و ان دلؤتي ميفكرش في الموضوع الفلاني , يبقي سمع و طاعه و حينفذ ! .. لأ , الوعي الانساني أعمق من انه يكون أله ألكترونيه بزرار !!
المثير في الموضوع , ان مش بس الافكار بس اللي مش بنقدر نخرجها من دماغنا بمزاجنا , لأ , ده كمان المشاعر .. بمعني ان الموقف الأولاني بتاع ماجد اللي اتدلق عليه طحينه قدام نورهان , مش مجرد بس الفكره اللي مش قادر يخرجها من مخه , لا ده كمان أحساس الاحراج و الشعور يالخجل اللي صاحب الموقف مش راضي يفارقه ... و الكلام بيشمل اي مشاعر سلبيه او محبطه اللي بيمر بيها الانسان عموما ..
فببساطه لما تلاقي فكره مجنناك و مخلياك حاسس انك عاوز تفتح دماغك تخرجها باديك ! اعرف ان الـ Ironic process theory مش سايباك في حالك , و ان في دايره مغلقه من الغباء , شغاله في مخك ...
No comments:
Post a Comment