التعود

ليه ساعات في ناس بنحبهم بس لما بنقرب منهم اوي بيبتدي حبنا ليهم يقل ؟؟ ليه في اصدقاء لينا لما بيبقوا معانا وقت الطويل بنحس اننا عاوزين نبعد عنهم شويه ؟؟ إيه الفكرة ورا أننا ,, بنشتاق اوي للبعيد عننا , مع انه هو نفسه لو بقي قريب او متاح بسهولة مش حنشتاق له كده ؟

الموضوع بيبتدي لما كريم شاف أميرة في الجامعة و كان نفسه يتعرف عليها ,, فعلا حصل و اتعرف عليها و بقي هما الأتنين أصحاب جدا .. في بداية صداقتهم كان كريم موهوم بأميرة , كان بيتصل بيها يوميا و عاوز يقضي معاها وقت أطول , من ناحيتها أميرة أبتدت تقرب لكريم أكتر من الأول , بقوا يقضوا مع بعض فترات طويله و يتتواصلوا بصورة مستمرة ... لكن فجأة كريم ابتدي يفقد الشغف اللي شاده في العلاقة مع أميرة , أبتدي يحس انه مش عاوز يقرب لها زي زمان , مع ان هي هي الحد الجميل الرائع اللي هو مُعجب بيها و بيحبها ! بس كريم حصله Habituation

الـ Habituation ( التعود ) , و ديه ظاهرة نفسية جسدية بتحصل لإي كائن حي , لما بيتعرض لنفس مقدار الإثارة الـ Stimulus لفترة زمنيه طويلة , فمع الوقت رد فعل الكائن ده علي الإثارة ديه بيبتدي يُفقد .. و تتحول الإثارة ديه لعديمة الفايدة , فببساطة أتعود عليها .. , بس إزاي أتعود علي الحب ,هو الحب فيه تعود ؟! .. الحقيقة الحب مفهوش تعود أنما الإحتياج فيه ... 

الدكتور Kent Berridge , بيشرح ان في فرق مهم بين نظامين مختلفين في النفس البشرية و هما الإحتياج الـ wanting و ده معتمد علي هرمون الدوبامين و نظام الإعجاب الـ liking و ده معتمد علي هرمونات تانيه أسمها الـ opoids ,, لما كريم كان محتاج انه يكون مع أميرة كان في النظامين الشغالين , الإحتياج و الإعجاب .. و خصوصا نظام الإحتياج اللي كان بيعمل حاجة أسمها الـ Anticipatory Joy ,, لما كريم ابتدي يشوف أميرة بأستمرار الـ Anticipatory Joy ديه ضاعت , حصلها تعود Habituation ,, فهو مبقاش يكرها او بيحاول يسيبها , إنما مبقاش في إحتياج ليها زي زمان .. فحاليا هو شغال علي نظام الإعجاب بس الـ liking 

يمكن عشان كدة في ناس كتير بتتقل علي بعض ! فبتعمل حاجة عكس الـ Habituation , أسمها الـ sensitivity , و هي ان الإثارة مش مجرد تعمل رد فعلها الطبيعي , لا ده من ندرتها تدي مفعول اقوي من الأساسي ! فأميرة مش حترد خالص علي كريم , عشان لو حصل و ردت مرة , تدي رد فعل عالي اوي عنده !! .. فساعات بُعد الاصدقاء او المحبيبن لبعض , بيرجع علاقتهم اقوي من الأول الـ Less is more " effect " ..

بس الحقيقة , أن ساعات "التُقل" علي الناس اللي بنحبهم - و خصوصا لو بإفراط - بيوصل لنتايج مش مرغوبة , زي أنهم يبعدوا خالص عنا !! فالمطلوب مش تُقل او تعالي , إنما الذكاء في تحديد المسافات , فتحديد المسافات بين الأصدقاء او حتي المحُبين عامل مهم جدا في نجاح العلاقة ديه ,,, فلازم ندي للطرف التاني في العلاقة فرصة انه يحس بغيابنا , عشان لما نتوجد يدرك فرق وجودنا .. فبباسطة , مش لازم نقرب اوي اوي من الناس اللي بنحبهم لو عاوزين نفضل بنحبهم .. لأن أخطر تهديد لإي علاقة صداقة او حب , هو التعود .. الـ Habituation