هو يعني تحرش اصلا ؟؟؟؟
اتذكر مره كنت بقرا خبر في الجرنال و لاقيت جمله "الجيش الاسرائيلي يتحرش بقوات المقاومه الفلسطنيه !! " ساعتها مكنتش فاهم يعني اللي هو ازاي ده هل مثلا خدوهم ورا تل ابيب و عملوا لهم حاجه مش كويسه مثلا ؟!! و لا ازاي تم التحرش ده ؟؟!
دورت علي معني كلمه "تحرش " في المعاجم و القواميس العربيه و اكتشفت ان ليها معاني كتير , بس المعني الاهم هو " استفز " !! يعني كل الموال الكبير اللي احنا عاملينه علي التحرش ده !! و هي في الاخر معنها "استفزاز " !! طب و ايه مشكله الاستفزاز يعني , عادي يعني ؟؟!! .. ده انا لو كل واحد في يومي الطبيعي بيستفزني بيقوم بعمليه التحرش بيا !! علي كده انا بمر يوميا بما لا يقل بالف عمليه تحرش و واقف علي رجلي زي الفل
الغرض من الهري اللي فوق ده هو تفسير عمليه الاستفزاز ديه او التحرش ده , ملخصه في الصوره العقيمه اللي انا عاملها علي ال paint brush ديه ..
بصوا يا جماعه .... حياه كل واحد فينا عباره عن الدايره اللي مرسومه ديه ..نظرا لان كل واحد منا له دايرته الخاصه , جسده , فكره , نفسه ... حاجات بتاعته هو بس ! ... فيها اسراره و خبايا شخصيته .. حاجات بتميزه عن غيره و بتكون كيانه ... من الاخر زي منطقه الخصوصيه بتاعته ... الاخرين كلهم برا الدايره و دول العلامات السودا .. ,, كل شخص منا بيسمح لبعض الاشخاص اللي هو يختارهم بنفسه انهم يقتحموا دايرته ديه و دول رمزهم العلامات الزرقا , في بقي ناس تانيه .. متحرشين !! عالم مستفزه , بجحه بتتعدي علي حق الانسان ده و تقحم نفسها جوا دايرته بالعافيه و دول العلامات الحمرا ...
مثل بسيط علي كلامي ... و ليه علاقه بالتحرش الجنسي ...
فلنفترض الدايره اللي حنتكلم عليها هو جسم بنت معينه ... البنت ديه سمحت لزوجها , لشريكها , لاي حد مش قضيتي , المهم انه بسماح منها انه يقتحم الدايره ديه ... ده مسموش تحرش او تعدي علي حقوقها
انما التحرش او التعدي او الاستفزاز !! هو لما يجي حد غصب عنها يقحم نفسه بالعنف او القوه .. تحت اي مسمي حتي و لو جوزها !!! ده جوزها قدام الناس و متحرشها بيبنها و بين نفسها ... بس ده مثل واحد لنوع واحد بس عن التحرش .. انما في انواع كتيـــــــــر للتحرش ...
و عشان نفهم التحرش علي نضافه , و نشوف تطبيقاته في حياتنا اليوميه ,, لازم نركز في المواقف اللي بتستفزنا و بتتعدي علي دايره خصوصيتنا ... زي مثلا :
- الست اللي كل شويه تقحم نفسها في حياه بنت ما و تفضل تسألها مش حتجوزي ؟؟ مش حتعملي ؟؟ مش حتتنلي ؟!! ديه متحرشه كبيره اوي علي فكره مع انها ست !!!
- الراجل اللي معاك في الشغل اللي عاوز يعرف اسم ابوك .. عشان يعرف اسم جدك .. عشان يعرف ديانتك ايه .. عشان يقرر حيدخلك الجنه حتي و لو غصب عنك ... ده متحرش من الدرجه الاولي , مع انه ملسمش جسمك اصلا !!
- الزميل اللي مش عاوز يدرك ان فيه خصوصيه .. الزميله اللي بتتزعل لما انتي متحكليهاش كل اسراريك .. دول كائنات متحرشه بطبعها ...
- جارك الطفيلي .. خالتك الفضوليه ... انت نفسك لما بتقتحم حياه الاخرين غصب عنهم تحت اي مسمي برضه متحرش !!!
اخيرا و ليس اخرا .. اعتقد لو كل واحد مننا قرر بجد انه يحترم خصوصيه الاخر .. قرر بحد يدرك ان كل انسان كيان قائم بذاته له اراده حره في تحديد مين يدخل دايرته او مين ميدخلش .. قرر بجد انه مش واصي علي حد .. او مش احسن من حد .. او مش اعلي من حد !! .. يمكن ساعتها لو قدررنا نحقق كده حتي و لو بصوره مش كامله اوي .. احتمال كبير وقتها المراهق اللي بتحرش يحس ان المتحرشين اللي في حياته الشخصيه اختفوا و سمحوا له بمساحه من الاراده الشخصيه , فيمكن يحترم برضه اراده البنت الغلبانه اللي ماشيه في حالها ...
حاول بقدر الامكان متكنش انت متحرش .. متنكش مستفز .. متنكش معتدي علي حقوق الاخر النفسيه و الفكريه حتي قبل حقوقه الجسديه ... حاول تحترم الحدود , الفواصل , الدواير , عشان غيرك يحترم دايرتك ...!
No comments:
Post a Comment