شجع الجزاير

كيرلس : انت متأكد يلا يا اسفنجه , ان القهوه ديه حتعرض متشات كاس العالم ؟؟ يا ابني ده كل اللي قاعدين عليها من ايام الحرب العالميه الاولي !!

اسفنجه : عيب بقي , و لعلمك اللي انت بتريق عليهم دول احلي حاجه في القهوه ديه , لا صداع و لا دوشه حواليك .. تحس انك بتتفرج لوحدك بمزاج .. 

ياتي لهم العامل في المقهي : معلش يا حضرات , لو جاين لكاس العالم , احنا معندناش قناه الجزيره الحقيره !! 

اسفنجه : مش مشكله يا ريس , مش عندكوا الهوت بيرد ؟؟ 

الصبي : لا شاي و قهوه و سحلب بس .. 

اسفنجه (محبطا) : حضرتك اديني ريموت الريسفير و انا حتصرف ,, 

يأخذ منه الريموت و يستأذن الجالسين بان يقلب علي قناه كأس العالم في القمر الاوروبي .., و اثناء البحث عن القناه اذا برجل عجوز يتوجه لكيرلس بالكلام : 

العجوز : و انتوا بتشجعوا مين بقي في كاس العالم ؟؟ 

كيرلس : انا بشجع فرنسا يا حاج ... بس اسفنجه .. 

العجوز ( مقاطعا كيرلس بعصبيه ) : ليه ؟!! ليه كده يا بابني !!! ما تشجع الجزاير ؟!!

كيرلس (باستغراب ) : فيه ايه يا حاج , مالك ؟؟ هو انا قلت لك اسرائيل ؟! ديه فرنسا , عادي يعني , بحب لعبها .. 

العجوز : لا برضه يا ابني , شجع الجزاير !!

كيرلس : اصل يا حاج .. 

العجوز (مقاطعا ) : يا ابني خد نصيحه من راجل كبير و شجع الجزاير !! , و العريس التاني بيشجع مين ؟؟ 

اسفنجه ( مسرعا ) : الجزاير انشالله يا حاج 

كيرلس لاسفنجه : انت يا ابني كنت بتشجع المانيا ؟؟

اسفنجه : يا عم بقيت اشجع الجزاير ! انت مالك ؟؟

العجوز : برافو عليك يا ابني .. ايوه الجزاير بلد عربي مسلم لازم نشجعه , مش كده و لا ايه ؟؟

اسفنجه : اه طبعا يا حاج , بس بعد اذنك عشان نعرف نركز نجيب القناه اللي حنشوف عليها كاس العالم 

العجوز : اتفضلوا يا ولادي , ربنا معاكوا ..(يصمت لوهله ثم يتكلم ) بس هي الجزاير بتلعب في الماتش انهارده ؟؟ 

كيرلس : لا ده ماتش , البرازيل و كوروتيا .. 

العجوز : طب ما تقلبوا لنا علي اي ماتش لاي دوله عربيه او مسلمه .. او هاتوا لنا الاهلي و الزمالك ؟؟

اسفنجه : اهلي و زمالك ايه حاج دلؤتي ؟!! , احنا بس الاول نجيب القناه و بعدين نشوف موضوع الفريق ده !! غير علي فكره يا حاج كوروتيا ديه دوله عربيه مسلمه , 

العجوز : ايوه عارفها يا ابني , ديه اللي هي من دول شرق اوروبا زي البانيا و الشيشان , كده .. 

اسفنجه : بالظبط , يا حاج 

فجأه يتدخل باقي الجالسين في الحوار .. 

عجوز 2 : بس انشالله السيسي راجل رياضي و حيوصلنا لكاس العالم اللي جاي !

عجوز 3 : السيسي بتاع الانقلاب ؟!!! طب احنا لعلمك اصلا كنا المفروض نوصل لكاس العالم من زمان , بس امريكا الماسونيه و الغرب هما اللي مانعين اننا نوصل .. 

عجوز 4 : يا جماعه كاس العالم ده كبر خدعه للشعوب اللي زينا , عشان نسيب شغلنا و حياتنا و نفضل نتفرج علي كوره ؟؟ ما تقلبوا يا جماعه لنا علي نشره الاخبار نشوف درجه الحراره بكره كام , اهي افيد من اللي احنا حنشوفه ده ؟؟ 

كيرلس لاسفنجه : اسفنجه !! للعلم مش حينفع الجو ده , لا عارفين نقعد و لا عارفين نجيب القناه , .. ما تيلا يا عم نمشي من هنا !!! 

اسفنجه : يا عم اتقل كده , خلاص شكلها هي القناه ديه .. 

يضغط علي قناه ما , فاذا بها قناه سكس تشتغل !!! .... و لكنه يغير القناه سريعا ! 

العجوز( بحرقه ) : قلبت ليه يا ابني ؟!! هي مش ديه القناه اللي حتجيب الماتش ؟؟ ما تسيبها ! 

اسفنجه : بس اصل يا حاج الماتش اللي جاي ده , مش ماتش لاي دوله عربيه مسلمه ..

العجوز : يا ابني , احنا بنتابع كوره حلوه , مالنا بالدين و البلد دلؤتي , اقلب يا ابني الله يرضي عليك .. 

اسفنجه : طب مش عاوزين تشوفوا النشره الجويه بتاعه بكره ؟؟ 

العجوز 4 : نشره جويه ايه و بتاع ايه !! , برضه بكره حيكون حر , يعني حتمطر مثلا ؟؟؟ غير كاس العالم بيجي كل اربع سنين مره , اما النشره الجويه كل يوم ! اقلبوا يا ولاد بسرعه عشان نشوف المباره من اولها !! 

وسط الحاح كل من في القهوه ... لا يجد اسفنجه و كيرلس مفر الا بان يتركوا قناه السكس! , و وسط فرحه عارمه بين كل من كان في القهوه بتلك القناه الرائعه .. و روح البهجه و السعاده التي تعم المكان , يقوم كيرلس و اسفنجه بمجالسه هؤلاء العواجيز غير عابئين هم ايضا بكاس العالم او المباره ... فتجتمع كل القهوه علي قلب رجل واحد , نابذبن اي خلاف بينهم لمشاهده قناه السكس :)