في القهوه يجلس صاحبنا يشرب مشروبه الرائع الذي يحبه و هو عصير الجوافه ، مستمعا بجو القهوه الجميل الهادي و اذا فجاءه يجد شاب يصغره سنا , قد دخل القهوه و جلس علي الطاوله و طلب نعناع !! فتعجب كيف يمكن له ان يطلب النعناع و عصير الجوافه بهذه الروعه ؟! ، فلابد انه مخبول او احمق !! ... ثم بعد فتره قصيره وجد ان اعداد الشباب التي تتردد علي القهوه طالبين نعناع في زياده مستمره ! .. فأمتلأ غيظ و سخط !! و ذهب منفعلا صارخا في وجه هذا الشباب الذي كان له التأثير الاول في باقي الشباب حتي يطلبوا النعناع ..
صاحبنا : انت ازاي يا جدع انت ، تشرب نعناع و تسيب الجوافه ؟
الشاب : و انت ايه اللي يضايق حضرتك ؟! هو انا اللي بشربه و لا انت !!
صاحبنا : انت لسه صغير و مش فاهم حاجه !! و متعرفش انك لازم تشرب جوافه لمصلحتك ..
الشاب : يا عم انا معجب بالنعناع و مبسوط .. اشرب انت جوافتك براحتك في اي حته ؟!
صاحبنا : تصدق انت قليل الادب و مش محترم ! و بكره تندم بنعناعك ده !
الشاب : طب يا عم ربنا يسمحك , سبني بقي , اولع باللي اشربه و ملكش دعوه
- صاحبنا لا يجد طريقه حتي يقنع الشاب بتغير رأيه ، فيخرج مسدس من جيبه و يهدده !! فلا يكترث الشاب لتهديده ! فيقتله !! مبررا انه يريد ان يحمي باقي شباب القهوه من ان ينصاعوا وراء تلك الافكار الفاسده في شرب النعناع و ترك الجوافه الرائعه !! ... يقتنع البعض و يختلف البعض و لكن اختلافهم بلا جدوي ، فهو معه المسدس و صاحب السلطه في تقرير من يعيش و من يمت ... مع الوقت بدأ صاحبنا يستعيد بهجته و استقراره النفسي , فالطلب علي النعناع يكاد يكون شبه منعدم ! و تعود الجوافه لتكون المشروب الاول في القهوه ,,,
.... و لكن تمر الايام و يظهر شاب اخر يدخل القهوه و يطلب نعناع في مشهد لم يحدث منذ فتره طويله !! ففورا يذهب أليه بعض الجالسين محظرينه من شر صاحبنا ، يحاولون ان يقنعوه ان يبدل مشروبه او يبحث عن قهوه اخري لشرب مشروبه هذا ...
فيرد : يعني هي قهوه ابوه !! زي ما هو زبون هنا ، انا برضه زبون ... هو شايف مشروبي وحش .. طب ما انا شايف مشروبه ستين وحش ! ... انما هو فاكر ان الحل انه يقتلني زي ما قتل غيري و محدش كلمه , .. يتفضل يقتل .. بس اللي ميعرفوش ان النعناع عمره ما حيخلص .. بالعكس ده هو او اللي زيه هما اللي حيخلصوا ... و حيفضل النعناع و حتفضل الجوافه ، بس الفرق ان بكره لما يجي ، حيتكتب ان اللي بيحبوا النعناع ماتوا عشان قرروا ميتنزلوش عن حاجه بيحبوها ، و اللي قاتلهم اللي كانوا اللي بيحبوا الجوافه عشان مقدروش يقتنعوا ان في مشروبات تانيه غير الجوافه ! ...
ثم نادي باعلي صوته صبي القهوه : هاتلي يا ابني اكبر كوبايه نعناع عندك .. !
No comments:
Post a Comment