رايح مشاور ما .. و اتأخرت في السكه , بتنادي في سرك "ياه لو ألحق الميعاد !! " و مع انك بتوصل متأخر بس بتلاقي الميعاد لسه قائم و الناس اللي المفروض يقبلوك برضه هما اتأخروا و لسه مجوش !!
خرجت من الامتحان .. عاكك و حالل زي الزفت .. رجعت بتكوا , امك بتسألك عملت ايه رديت " مش اد كده , بس نفسي أنجح " .. بتظهر النتيجه و بتنجح فعلا و كمان بتقدير عالي !! مع ان حلك في الامتحان ميخلكش حتي تعدي السنه !!
واحد صاحبك بيعزمك في حفله .. بتروح عشان هو قالك لازم تيجي .. تروح و تلاقي واحده تعجبك اوي .. تتعرف عليها .. و تقضي معاها باقيه الحفله , بس الحفله تخلص , كل واحد منكوا يروح بيته ... و تندم انك مخدتش تليفونها او اي حاجه للتواصل معاها , و تقرر ان خلاص مش حتشوفها تاني ! بس تُفجأ انك تشوفها في الشارع بالصدفه و هي تسلم عليك و تتكلمتوا و تتعرفتوا علي بعض اكتر , و الموضوع يتطور لمرحله الخطوبه و الجواز !!!!!
قدامك حاجه من اتنين عشان تفسر اللي حصل في كل المواقف اللي فوق ... اما تقرر ان كل ده عباره عن عبث عشوائي , مجرد صدف متتاليه بصوره غريبه , و ده نتجيه ان مفيش اي دليل علمي او سبب موضوعي يفسر السبب ... او تقرر ان في محرك واعي ذكي للحياه , عنده زي خطه او هدف ورا كل خطوه بتحصل للبشريه و عشان توصل للمفهوم ده بيتطلب منك ما يسمي بالايمان !!
الايمان بصوره بسيطه ! هو يعني اني اقولك ان في الله (انت مش شايفه ) .. عنده خطه (انت مش فاهمها ) .. عشان هدف أسمي (انت مش عارفه ) .. عشان حياه بعد موت (انت مش واثق من وجدها ! ) ! و مطلوب منك انك تصدقني !! و بالرغم انك ممكن تحس الكلام انه غير متفق مع عقلانيتك الحياديه و منطقك المعتمد علي الدليل المادي برضه بطلب منك تصدقني ! .. فتحكم ان الايمان ده شيئ خيالي , اسطوري , وهمي .. يمثل عدم نضوج للعقل البشري !
و الصراحه و لو فكرت فيها من بعيد تلاقي عندك حق ... تخيل ناس بتكلم عن استنساخ خلايا و حياه برا كوكب الارض و الوصول لاعماق الذره و انت تيجي تكلمني عن ايمان بغيبات !! ناس بتكلم عن الاسلوب العلمي للبحث و الدلائل الحيه و انت تقولي صدق بحاجه مش شايفها !! اعتقد العقل وسط هذا الكم الهائل من التقدم و الثقافه صعب يتقبل فكره الاداره القدريه للحياه !! فكره الايمان الاعمي ديه لا يمكن تصمد قدام عقول عايشه علي منطلق الدليل النظري !
بس خلينا نشوف كده ,, من الف سنه فاتت , هل كنت ممكن اجي اقولك ان الانسان ممكن يعمل في المستقبل طياره تطير في السما ؟؟ علطول كنت حتفتكرني عبيط او بخرف !! طب لو كنت قلت لك نفس الكلام من ميت سنه ! لا ساعتها كنت حتصدقني و تقولي اه ممكن ... طب لو نفس الكلام ده اليومين دول كنت حتقول لي.. انت قديم اوي !! الملخص في الموضوع ان العقل البشري بيتطور مع زمن ,, و في حقايق كتير بيكتسبها يوم عن اللي قبله و ده معناه ان العقل البشري عمره ما وصل لمرحله الكمال و دايما في تطور مستمر .. و كل ما يحاول يدرك حقيقه ما , يلاقي الموضوع اتفرع منه و ظهرت علوم اكتر و مفاهيم و مصطلحات اكتر و هكذا ... و عشان كده لازم كل ما الانسان يحاول يفكر في حقيقه ما , يدرك ان عقله في مرحله النقصان الدائم .. و لكن في الطريق للاكتمال ... و تبقي اول حقيقه معتقدش ان في حد حيختلف معايا فيها ان المنطق البشري ذاته .. منطق ناقص يسعي للاكتمال ...
نيجي للنقطه التانيه ,,,, حاول كده تتخيل معايا اي فعل او سلوك معين من غير دافع ؟! مستحيل ! انت اللي مصبرك علي العك اللي انا بكتبه هو الدافع انك حتقرا حاجه كويسه , اللي بيخليك في عز البرد تروح الحمام و تقلع البنطلون و انت متلج و تعمل بي بي هو دافع انك حتستريح , اللي بيخليك مستحمل غلاسه واد معين معاك في دفعتك هو الدافع انه اخته اموره , حتي علاقه الحب فيها دافع , اب بيطلع عينه في الشغل عشان الدافع هو الفلوس اللي بيجبها عشان يبسط بيها ابنه , يا اخي ديه نظريه التطور نفسها ليها دافع ! .. و هكذا , و علي مقدار ما الدفاع ورا السلوك بيكبر , علي قد ما الادوات المستخدمه ورا البحث ورا الدافع ده بتكبر !! بمعني بسيط برضه ... واد ضرب صاحبه عشان زقه , مش محتاج تدور كتير عشان تعرف الدافع , بس مثلا حاجه زي الدافع ورا ان امريكا بتدعم طالبان ؟؟ محتاج تدور بطرق اعمق و اساليب اكثر تطورا عشان توصل للدافع او الهدف ... تخيل معايا انت عاوز توصل للدافع ورا الحياه !! او الدافع ورا وجود الكون , او الدافع ورا الذات البشريه نفسها !! تخيل ايه الادوات اللي ممكن تستخدمها ؟!!!
و هنا يتطلب من الانسان الاعتراف ان العقل البشري بنقصه الدائم للاسف مش حيقدر يوصله لليقين في امور تتخطي قدرته ... و هنا يجي دور الايمان عشان يساعد العقل !
بمعني , عمرك شفت اي مخترع , اخترع اي حاجه مكنش في بدايه شغله مؤمن انه حينجح ؟! ده حتي سبب اصرار توماس اديسون في كل اختراعاته انه مؤمن في نهايه انه حيوصل ! بصوره تانيه , تخيل معايا دكتور داخل يعمل عمليه هو مش مؤمن انه يقدر يعملها ؟؟ هل ممكن يكون زي دكتور مؤمن من قدراته و واثق في نفسه داخل يعمل نفس العمليه ؟! اكيد لأ , الاسمان بيدعم موقف الانسان مهما كان وضعه او حالته , ببساطه الايمان بالشيئ هو البدايه للوصل للشيئ نفسه .
الايمان عمره ما كان في تناقض مع العقل , و لا عمره ما كان مخدر عشان يريحك و خلاص ..و لا عمره كان معناه متفكرش او متسألش , بالعكس ده معناه فكر و اسأل , بس خلي عندك لو صخره ثابته تقدر تنطلق من خلالها في بحر تساؤلاتك و محيط افكارك ! و زي ما اول خطوه لليقين هي الشك , برضه اول خطوه للادراك هي الايمان ...
الايمان ملهوش دين , او طقوس , او كتب .. انما له قلب عايش بالتواضع , له عقل رافض للتحجر , له روح مشتاقه للمعرفه و عطشانه للبحث ! .... الايمان عمر ما حد بيقتنيه بالعنف او بالعافيه , و لا بالخداع او الغش .. و لا عمره كان زي المعلومات الجامده اللي ممكن تتحفظ من كتب او مراجع .! , انما الطريقه الوحيده اللي يقتني بيها الانسان الايمان هي انه يحيا بالايمان .!
و زي ما قال فيكتور هوغو :
"الإيمان ضرورة للإنسان .. فويل لمن لا يؤمن باي شيء. "
No comments:
Post a Comment